Wala Ka Jehoova Yuori Na E Tegroŋ Ko Yezu Aseŋ?

1-2. (a) Zisoɔree na baŋ na nyɔge Yezu te ko na, bo yɛlɛ oŋ da erɛ? (b) Bo soorebie nɔɛ iribo teŋ na nyɛ a zannoo ŋa poɔŋ?

A BEBIRI da eɛ Nisan 14, 33 C.E. Zimaanee saŋa da la. Ana zisoɔree na, Yezu bitontonee na kaŋa na iruuŋ tere, ka ba di o sɛrɛɛ, a dɔgroo, a puoriŋ ka ba koo. Yezu neŋ o bitontonee naŋ da e yelmeŋɛ deme na da di la bondirii baare peɛ die kaŋa zuŋ. Beŋ la ka Yezu da eŋ ba faŋa. Kyɛ, sɛre ka ba zaa na yi a die poɔ a gaa na, Yezu da puore sɔrɛɛ Jehoova. A puore sɔroo ŋa da eɛ tegroŋ yaga zaa. Azuŋ, bitontona Gyɔɔn da sɛgɛɛ yɛlɛ na Yezu naŋ da yeli a puore sɔroo poɔŋ. Te na baŋ kannɛɛ a yɛlɛ ŋa yi Gyɔɔn o zuri 17.

² A zannoo ŋa poɔŋ, te na zannɛɛ yelnimizeere mine a yi Yezu puore sɔroo na poɔŋ. Ana zisoɔree na baŋ da waana ka ba nyɔge Yezu te ko, kyɛ bo yɛlɛŋ da e nimizeɛ yaga zaa a koo? Bo yɛlɛŋ da e nimizeɛ yaga zaa ko Yezu saŋa na oŋ da be a teŋɛzuŋ a tonɔ o naaŋ moɔloo toma na? Te na nyɛɛ a soorebie ama zaa nɔɛ iribo a zannoo ŋa poɔŋ.

‘N EƐƐ LA KA BA BAŊ HO YUORI’

3. Bo yɛlɛ ka Yezu da yeli kyaare Jehoova yuori? Bo ka yɛlɛ na Yezu naŋ yeli na wuli? (Gyɔɔn 17:​6, 26)

³ A yi Yezu puore sɔroo na poɔŋ, o da yeleeŋ ka: ‘N eɛɛ la ka ba baŋ ho yuori.’ A yɛlɛ ŋa da eɛ nimizeɛ yaga zaa ko Yezu. Azuŋ, o da yelee a yɛlɛ ŋa neŋ o zu gbɛre boyi ko o potuuribo na. (Kanne Gyɔɔn 17:​6, 26.) Wala ka Yezu da boɔrɔ ka o wuli? Yezu potuuribo na da ba baŋ Naaŋmen yuori na bee? Ai, lɛ naane. Yezu potuuribo na da eɛ Izerayɛl biiri, azuŋ, ba da baŋɛɛŋ ka Naaŋmen yuori la Jehoova. Jehoova yuori na da be la a Hiburu Sɛgre na poɔŋ yaga zaa. Azuŋ, a da ba lɛ fɛre ka Yezu wuli o potuuribo na ka Naaŋmen yuori la Jehoova. Kyɛ, Yezu da wuli baŋ Neɛ na Jehoova naŋ waa meŋɛmeŋɛ. Yezu da wuli baŋ gyogri na Jehoova naŋ taa, o poboɔbo, ane o tontonee. Yezu da wuli baŋ Jehoova yɛlɛ gaa tɔɔre yaga zaa, bonso Yezu la neɛ naŋ baŋ Jehoova velaa a gaŋ neɛzaa.

4-5. (a) Ka ba naŋ yelka te wa baŋɛɛ neɛ kaŋa velaa, wala ka lɛ wuli? De yelmannaa wuli a muni. (b) Boŋ da soŋ Yezu potuuribo na baŋ wa baŋ Jehoova velaa zaa?

⁴ Te de yelmannaa kaŋa wuli a muni. Te de ka ho lantaapuoruu neŋkpoŋ kaŋa baŋ boɔlɔ Deevid eɛ dɔkta. A yi a yuomo ŋa zaa poɔŋ, ho neŋ Deevid maŋ laŋ erɛɛ yɛlɛ, azuŋ a vɛŋɛɛŋ hoŋ wa bamoo velaa. Beŋ la ka baaloŋ faa kaŋa kpɛ bo bebiri kaŋa. Azuŋ, noba da lonnee wieoŋ a de bo gaaneŋ asibiti na Deevid naŋ tonɔ na. Beŋ la ka Deevid mãã o meŋɛ a kaa ho zieŋ soŋ zaa ka lɛ vɛŋ hoŋ nyɛ laafeɛ. Ho nyɛɛ, ho da baŋɛɛ ho yɔɔ na yuori, kyɛ yɛlɛ na oŋ e ko bo na vɛŋɛɛŋ hoŋ maaleŋ bamoo yaga zaa a gaŋ saŋa kaŋa naŋ pare. Pampana ŋa yɛŋ, Deevid ba lɛ e a lantaapuoruu neŋkpoŋ kaŋa yoŋ ko bo, kyɛ o wa leɛ la dɔkta naŋ saŋ ho baaloŋ ko bo.

⁵ Lɛ neŋ o zu la, Yezu potuuribo na da baŋɛɛŋ ka Naaŋmen yuori la Jehoova. Kyɛ, Yezu da wuli baŋ Jehoova yɛlɛ velaa zaa, azuŋ, a da vɛŋɛɛŋ baŋ wa nyɛ ka Jehoova yuori na eɛ tegroŋ yaga zaa. Bonso teŋ yeli lɛ? Ananso la ka, Yezu da tɔglɛɛ o Saa Jehoova gyogri a yi o yelyelii ane o yel-eree zaa poɔŋ. Azuŋ, yɛlɛ na Yezu naŋ da wuli ba, ane lɛ na Yezu naŋ da maŋ wulo nɔmmo korɔ noba na da vɛŋɛɛŋ ka o potuuribo na baŋ ka lɛ ka Jehoova meŋ waa.—Gyn. 14:9; 17:3.

‘A HO YUORI HO NAŊ DE KO MA ZUŊ’

6. Sobuo ka Jehoova de o yuori na ko Yezu? (Gyɔɔn 17:​11, 12)

⁶ Yezu da puore sɔrɛɛ Jehoova ka o kaara o potuuribo na zu. O da yeleeŋ ka: ‘Gu ba a ho yuori ho naŋ de ko ma zuŋ.’ (Kanne Gyɔɔn 17:​11, 12.) Lɛ wuleeŋ ka aseŋ ka te leɛ boɔlɔ Yezu ka Jehoova bee? Ai. Ka hooŋ kyɛlle yɛlɛ na Yezu naŋ yeli na soŋ, ho na nyɛŋ ka o yeleeŋ ka “ho yuori.” Azuŋ, Yezu da ba wulo ka o yuori leɛ la Jehoova. Kyɛ, sobuo ka Jehoova de o yuori na ko Yezu? A dɛndɛŋ soba, Yezu eɛ Jehoova gbɛbɔg-ara. Azuŋ, o maŋ arɛɛ Jehoova gbɛbɔgriŋ a manna o yɛlɛ korɔ noba. Yezu de la o Saa Jehoova yuori meŋ a wa a teŋɛzu. Jehoova yuori eŋɛŋ ka Yezu da toŋ toŋseɛlɛ na zaa oŋ da toŋ na. (Gyn. 5:43; 10:25) Ayi soba, a yuori Yezu muni la, “Jehoova La Faabo.” Azuŋ, Jehoova yuori na be la Yezu yuori na poɔŋ.

7. De yelmannaa kaŋa wuli lɛ na Yezu naŋ maŋ are Jehoova gbɛbɔgriŋ a de o yuori manna yɛlɛ korɔ noba.

⁷ Te lɛ de yelmannaa kaŋa wuli a yɛlɛ ŋa muni. Naa kaŋa na baŋ toŋɛɛ o potuuribo na kaŋa ka o gaa zie kaŋa a te manne o yɛlɛ ko noba mine. Yɛlɛ na a naa naŋ manne ko o potuuro na yoŋ la oŋ na te manne ko a noba. Ka a nobaŋ wa kyɛlle woŋ a potuuro yelyaga, ba na de aŋ ka a naa la manna a yɛlɛ korɔ ba. Lɛ neŋ o zu ka Yezu meŋ da e. O da maŋ arɛɛ Jehoova gbɛbɔgriŋ, a de o yuori na manna yɛlɛ korɔ noba.—Mat. 21:9; Luk. 13:35.

8. Sɛre ka Yezu na wa a teŋɛzu na, sobuo ka Jehoova yuori da be Yezu ‘eŋɛŋ’? (Yiibu 23:​20, 21)

⁸ A Baabole boɔlɛɛ Yezu ka “a Yelbiri.” Lɛ wuleeŋ ka Jehoova maŋ tu la Yezu zie a de duoro naŋ seŋ neŋ korɔ a malekere ane nensaaleba zaa. (Gyn. 1:​1-3) Aminekaŋaŋ, saŋa na Jehoova naŋ da faa a Izerayɛl biiri yineŋ a Igyipiti noba nuuriŋ, a taa ba gɛrɛ neŋ a Noɔre Emmo Teŋgane na, Yezu da la a maleke na Jehoova naŋ da kaa iri oŋ kaara a Izerayɛl biiri zu na. Bonso, saŋa na Jehoova naŋ da eŋnɛ a Izerayɛl biiri faŋa ka ba sagra a maleke nɔɛ na, Jehoova da yeleeŋ ka: ‘N yuori be la o eŋɛŋ.’a (Kanne Yiibu 23:​20, 21.) Bonso ka Jehoova yelka o yuori be la Yezu ‘eŋɛŋ’? Ananso la ka, Yezu la neɛ naŋ maŋ are Jehoova gbɛbɔgriŋ a erɛ yɛlɛ. Ane meŋ, Yezu yel-eree zaa maŋ vɛŋeŋ ka Jehoova yuori na pɛgeyi, a maŋ lɛ vɛŋ aŋ pɛle meŋ ka Jehoova yel-eree zaa toreeŋ.

‘N SAA, E KA HO YUORI NYƐ PUUBU’

9. Wala teŋ e baŋ ka Jehoova yuori na eɛ tegroŋ yaga zaa ko Yezu?

⁹ Saŋa na Yezu naŋ da naŋ be sazuŋ na, o da eɛ yɛlɛ naŋ wuli ka Jehoova yuori na eɛ tegroŋ yaga zaa koo. Azuŋ, saŋa na Yezu naŋ wa wa a teŋɛzu na, o yel-eree zaa da maŋ wuliŋ ka o nɔŋ la Jehoova yuori na yaga zaa. A yɛlɛ ŋa ba e te seɛlee fẽẽ zaa. Saŋa na aŋ da wa kyɛre fẽẽ ka o toŋ o teŋɛzu toma baare na, Yezu da puore sɔrɛɛ Jehoova a yelka: ‘N Saa, e ka ho yuori nyɛ puubu.’ A tɔntɔbaalɛ ka Jehoova da be sazuŋ a kyɛ de kɔkɔkpeɛŋaa a yelka: ‘N eɛɛ la ka a N yuori nyɛ puubu, kyɛ N na la eŋ ka o la nyɛ puubu.’—Gyn. 12:28.

10-11. (a) Wala ka Yezu da e a vɛŋ ka Jehoova yuori nyɛ pugibu? (Kaa a foto.) (b) Bonso aŋ e nimizeɛ yaga zaa ka Jehoova yuori na pɛgeyi?

¹⁰ Yezu meŋ da vɛŋɛɛŋ ka o Saa yuori na nyɛ pugibu. Sobuoŋ? O da vɛŋɛɛŋ ka noba baŋ gyog-sonne na Jehoova naŋ taa, ane lɛ na oŋ maŋ erɛ yelsonne korɔ noba. Kyɛ, a da eɛ nimizeɛ yaga zaa ka Yezu lɛ e yelnimizeɛ kaŋa meŋ. Aseŋ ka Yezu tu o yel-eree eŋɛŋ a vɛŋ ka Jehoova yuori na pɛgeyi, a lɛ vɛŋ ka a pɛle meŋ ka Jehoova yel-eree zaa toreeŋ. Saŋa na Yezu naŋ da wa wulo o potuuribo sori baŋ na toɔ̃ tu a maŋ puore sɔre na, o da vɛŋɛɛŋ baŋ baŋ ka a yɛlɛ ŋa eɛ nimizeɛ yaga zaa. Yezu da yeleeŋ ka: “Te Saa naŋ be sazuŋ, vɛŋ ka ho yuori pɛgeyi.”—Mat. 6:9.

¹¹ Bonso aŋ e nimizeɛ yaga zaa ka Jehoova yuori na pɛgeyi? Bonso aŋ fɛre yaga zaa ka nensaaleba zaa baŋ ka Jehoova yel-eree zaa toreeŋ? Aseŋ ka te leɛteɛre yɛlɛ naŋ da e Eedin gaadin poɔŋ na, a na soŋ teŋ ka te nyɛ a soorebie ama nɔɛ iribo. Setaana a Dɛɛvul da yelee yɛlɛ naŋ ba seŋ neŋ a kyaare Jehoova Naaŋmen, a dɛge o yo-forifori na. Setaana da yeleeŋ ka Jehoova eɛ ziri-ŋmaara, a lɛ e Neɛ naŋ de bonsoŋ kaŋa a sɔgle Adama neŋ Hawaa. (Mun. 3:​1-5) Setaana da lɛ boɔrɔŋ ka o wuli ka sori na Jehoova naŋ maŋ tu a erɛ o yɛlɛ na ba tori. A zirii ŋa zaa Setaana naŋ ŋma dɔgle Jehoova na vɛŋɛɛŋ ka noba teɛre ka Jehoova eɛ neŋfaa. Gyoob saŋa na meŋ, Setaana da yeleeŋ ka yelsonne na Jehoova naŋ erɛ korɔ o puorebiiri na zuŋ baŋ puoruu. Setaana da boɔrɔŋ ka o wuli ka nensaalaa zaa kyebe a yi o sukyiri zaa poɔŋ a puoro Jehoova o naŋ nɔmoo zuŋ. Lɛ wuleeŋ ka, ka neɛŋ puoro Jehoova a tuoro yelkpeɛne, o soba na barɛɛ Jehoova puoruu. (Joob 1:​9-11; 2:4) A da fɛrɛɛŋ ka Jehoova tere sori ka wagre pare wa gaa. Lɛ na vɛŋeŋ ka neɛzaa wa baŋ neɛ naŋ la ziri-ŋmaara, ka Jehoova la bee ka Setaana la.

“N DE LA N NYƆVORE TERE”

12. Yezu nɔŋɛɛ Jehoova yaga zaa, azuŋ boŋ oŋ da yi o poɔ zaa a e?

¹² Yezu taaɛ nɔmmo naŋ e zuluŋ ko Jehoova. Azuŋ, o da moɔrɛɛ o moɔbo zaa ka o e yɛlɛ naŋ na vɛŋ ka Jehoova yuori na pɛgeyi, a lɛ vɛŋ ka a pɛle meŋ ka Jehoova yel-eree zaa meŋ toreeŋ. Yezu da yeleeŋ ka: “N de la N nyɔvore tere.” (Gyn. 10:​17, 18) Yezu da eɛ siri ka o kpi ko Jehoova yuori na.b Adama neŋ Hawaa yɛŋ da leɛ la ba puori ko Jehoova, a kyɛ de ba menne te mare Setaana. Kyɛ, Yezu da yi la o poɔ zaa a wa a teŋɛzu, a wa vɛŋ ka neɛzaa baŋ ka o nɔŋɛɛ Jehoova. Yezu da wuleeŋ ka o nɔŋ la Jehoova saŋa na oŋ di yelmennoŋ ko Jehoova te ta a baaraa, ka o ba ŋmɛ gbɛre zaa na. (Hib. 4:15; 5:​7-10) Haali saŋa na baŋ kpa o a dabɔl zuŋ na, kyɛ o da ba zagre Jehoova bare. (Hib. 12:2) Lɛ na oŋ da e na wuleeŋ ka o nɔŋ la Jehoova neŋ O yuori na.

13. Bonso teŋ na baŋ yelka Yezu la neɛ naŋ na baŋ vɛŋ ka a pɛle ka Setaana eɛ ziri-ŋmaara? (Kaa a foto.)

¹³ Yɛlɛ na zaa Yezu naŋ wa e a teŋɛzuŋ na vɛŋɛɛŋ aŋ pɛle ka Setaana eɛ ziri-ŋmaara, kyɛ Jehoova ba e ziri-ŋmaara. (Gyn. 8:44) Yezu la baŋ Jehoova velaa zaa a gaŋ neɛzaa naŋ daaŋ zeŋ a teŋɛ ŋa zuŋ. Azuŋ, ka yɛlɛ na Setaana naŋ yeli kyaare Jehoova na bonyenaa gbaŋ da e yelmeŋɛ, Yezu da naŋ baŋeŋ. Kyɛ, Yezu da arɛɛ Jehoova puoriŋ kpeɛŋaakpeɛŋaa, a erɛ yɛlɛ naŋ vɛŋ ka Jehoova yuori na pɛgeyi. Haali saŋa na aŋ da waa ŋa Jehoova gyɛ la Yezu bare na, kyɛ Yezu da naŋ kpimarɛɛ Jehoova. Yezu daaŋ koŋ sage bare o Saa naŋ taa nɔmmo na zaa, haali ka ba naŋ na iri o nyɔvore gba.—Mat. 27:46.c

‘N BAARƐƐ A TOMA NA HOŊ KO MA KA N TOŊ NA’

14. Saŋa na Yezu naŋ da di yelmennoŋ te ta a baaraa na, bo maaloo ka Jehoova da koo?

¹⁴ Yezu da lɛ yelee yelkaŋa naŋ e nimizeɛ a yi o puore sɔroo na poɔŋ. Leɛteɛre ka ana zisoɔree na baŋ da waana ka ba nyɔgoo a te ko. Yezu da yeleeŋ ka: ‘N baarɛɛ a toma na hoŋ ko ma ka N toŋ na.’ Yezu da taaɛ sagediibu ka, ka onaŋ di yelmennoŋ ko Jehoova te ta a baaraa, Jehoova na ko oŋ maaloo naŋ e kpoŋ. (Gyn. 17:​4, 5) Lɛ neŋ o zu ka Jehoova da e ko Yezu. Jehoova da seŋɛɛ Yezu oŋ iri yi kũũni poɔŋ. (Tom. 2:​23, 24) Saŋa na Yezu naŋ da leɛ gaa sazu na, Jehoova da ko oŋ arezi-kpoŋ. (Fil. 2:​8, 9) A baaraa zaa, Jehoova da kaa iree Yezu oŋ e O Naaloŋ na Naa. Bo toma ka Naaŋmen Naaloŋ na na toŋ? Saŋa na Yezu naŋ da wulo o potuuribo sori baŋ na toɔ̃ tu a puore sɔre na, o da lɛ yelko baŋ ka ba maŋ puore sɔre ka: “Vɛŋ ka ho Naaloŋ wa. Vɛŋ ka [Jehoova] poboɔbo nyɛ eebo a tendaa zuŋ aŋa lɛ a naŋ nyɛrɛ eebo sazuŋ na.”—Mat. 6:10.

15. Bo toma ka Yezu na lɛ toŋ?

¹⁵ A koŋ kɔɔre, Yezu na zɔɔ neŋ la Naaŋmen dɔndɔnne zaa, a sãã ba kpɛlɛŋkpɛlɛŋ Hammagedon zɔɔre na saŋa. (Yel. 16:​14, 16; 19:​11-16) A puoriŋ, o na de la Setaana lɔɔ eŋ bog-zuluŋ naŋ ba taa baaraa poɔŋ. Lɛ wuleeŋ ka o na nyɔgɛɛ Setaana, a deɛ kpeɛ̃o na zaa oŋ taa na. Azuŋ, ana saŋa na Setaana koŋ baŋ lɛ e yelzaa. (Yel. 20:​1-3) Yezu Yuoŋ Turi Naaloŋ Diibu na saŋa, o na toŋɛɛ toma a vɛŋ ka nensaaleba zaa a pɛgeyi, ka emmaaroŋ meŋ be nensaaleba laŋ zemmo poɔŋ. Yezu na seŋɛɛ noba naŋ kpikpi na ka ba iri yi kũũni poɔŋ a voorɔ. O na toŋɛɛ toma a vɛŋ ka a tendaa ŋa zaa leɛ paradiisi. Poboɔbo na Jehoova naŋ taa a piilee saŋa na na nyɛɛ eebo.—Yel. 21:​1-4.

16. Wala ka zemmo na waa Yezu Yuoŋ Turi Naaloŋ Diibu na baaraa saŋa?

¹⁶ Ka Yezu Yuoŋ Turi Naaloŋ Diibu naŋ wa baare, bo yɛlɛŋ na lɛ e? Nensaaleba zaa naŋ be a teŋɛzuŋ na pɛgeyiŋ. A koŋ lɛ fɛre ka te maŋ lɛ tu Yezu yɔɔdeɛbo sareka na eŋɛŋ a sɔre Jehoova ka o di te yelfaare suuri ko te. A koŋ lɛ fɛre ka Yezu neŋ a 144,000 are te neŋ Naaŋmen kpakyagaŋ a sɔrɔ te yelbebe sudi korɔ te meŋ. A Baabole lɛ yeleeŋ ka: “A dɔndɔn-baaraa O naŋ na sãã bare la kũũ.” Lɛ wuleeŋ ka kũũ na Adama naŋ de waneŋ na koŋ lɛ bebe. Azuŋ, ba na seŋɛɛ noba na zaa naŋ be Jehoova teɛroŋ poɔŋ na ka ba iri yi kũũni poɔŋ a voorɔ. Neɛzaa naŋ be a teŋɛzuŋ na pɛgeyiŋ a e forifori.—1 Kor. 15:​25, 26.

17-18. (a) Ka Yezu Yuoŋ Turi Naaloŋ Diibu naŋ wa baare, bo yɛlɛŋ na e? (b) Ka Yezu naaŋ diibu naŋ wa baare, wala oŋ na e? (1 Korinti 15:​24, 28) (Kaa a foto.)

¹⁷ Bo yɛlɛŋ na lɛ e Yezu Yuoŋ Turi Naaloŋ Diibu na saŋa? Yeltegroŋ kaŋa na nyɛɛ eebo ana saŋa na. A malekere zaa ane nensaaleba zaa na wa nyɛŋ ka Jehoova eɛ forifori, ka o yɛlɛ meŋ zaa tori. Ɛɛ, Jehoova yuori na pɛgeyiŋ kpɛlɛŋkpɛlɛŋ. Bonso teŋ yeli lɛ? A Eedin gaadin na poɔŋ, Setaana da yeleeŋ ka Jehoova eɛ ziri-ŋmaara, a lɛ e Neɛ naŋ ba de nɔmmo kaara neŋ nensaaleba zu. Kyɛ, a yi ana saŋa na a waana, noba naŋ nɔŋ Jehoova a taa gyeremɛ naŋ e zuluŋ meŋ koo mɔɔ la ba moɔbo zaa a de ba yel-eree a vɛŋ ka Jehoova yuori na pɛgeyi. Ka Yezu Yuoŋ Turi Naaloŋ Diibu naŋ wa baare, a na wa pɛleŋ ka neɛzaa baŋ ka sori na Jehoova naŋ maŋ tu a erɛ yɛlɛ na toreeŋ. Neɛzaa kyebe a na lɛ taa bonnoo ka Jehoova eɛ te Saa naŋ taa nɔmmo.

¹⁸ Ka Yezu Yuoŋ Turi Naaloŋ Diibu naŋ wa baare, neɛzaa na baŋeŋ ka yɛlɛ na zaa Setaana naŋ yeli kyaare Jehoova na eɛ zirii. Ka Yezu naaŋ diibu naŋ wa baare, wala oŋ na e? O na tɔglɛɛ Setaana a meŋ de taawae bee? Ai. (Kanne 1 Korinti 15:​24, 28.) Yezu na leɛ de la a Naaloŋ ko o Saa. O na sigree o meŋɛ ko Jehoova naaŋ diibu na. Yezu naŋ nɔŋ Jehoova zuŋ, o na yi la o poɔ zaa a de a kpeɛ̃o zaa leɛ ko Jehoova.

19. Bo yɛlɛ teŋ zanne yi a zannoo ŋa poɔŋ a kyaare Yezu?

¹⁹ A ba e te seɛlee Jehoova naŋ yi O poɔ zaa a de O yuori na ko Yezu. Yezu sereŋ vɛŋɛɛŋ teŋ baŋ neɛ na o Saa naŋ waa meŋɛmeŋɛ. Azuŋ, wala ka Jehoova yuori na e tegroŋ ko Yezu aseŋ? Jehoova yuori na eɛ tegroŋ a ko Yezu a gaŋ bon la bonzaa. Yezu yɛŋ zieŋ, Jehoova yuori na eɛ tegroŋ yaga zaa a gaŋ nyɔvore na oŋ taa na. Azuŋ ka Yezu da yi o poɔ zaa a kpi ko Jehoova yuori na. O Yuoŋ Turi Naaloŋ Diibu na baaraa saŋa, Yezu na lɛ yi la o poɔ zaa a leɛ de bon la bonzaa eŋ Jehoova nuuriŋ. Wala teŋ na baŋ e a tɔglɔ Yezu ewuli soŋ na? Te na nyɛɛ a soorebiri ŋa noɔre iribo a zannoo naŋ tɔnne na poɔŋ.