Ka Tru Thangane Catre La Itre Ini Qa Thei Akötresie
1 Atraqatre la madrine së troa kapa la itre ini qa thei Iehova Akötresie, lo Akötresie ka cas, Atr xupi së! (Sal. 50:1; Is. 30:20b) Nge kola löpi enehila qa ngöne la nöjei nöj, la itre ka alanyim, matre troa elë kowe la wetre i Iehova, wetre ne la hmi ka nyipici, nge tro angatr’a kapa e cili la itre ini qa thei nyidrë. (Mika 4:2) Itre milio pekö la itretre saene kowe la itre hnaini ka atrune la aqane mekune ne la atr me inamacane ne la fen. Ngo ame la inamacane ka thatre Iehova me trenge ewekë i nyidrë hna cinyihane hnine la Tusi Hmitrötr, ke qenahmo lai qëmeke i nyidrë, nge ame la itretre xötrethenge la inamacane cili, ke, itre ka pë wangatrehmekun. — Sal. 14:1; 1 Kor. 1:25.
2 Ame ngöne lo kovasio së ka ase hë, ke, kola amekunë së la itre thangane ne la ini qa thei Akötresie. Ame lo porogarame ne lai kovasio, ke hna eköthe eje hune la topike celë: “Ini qa thei Iehova”. Hne së hna inine laka hnene la wesi ula i Akötresie memine la ua i nyidrë hna acasi së matre tro së ihnimekeu e cailo fene hnengödrai asë, nge hnene fe la lue ewekë cili hna ujëne la itre thina së, me thupë së qemekene ne la ini dremoni, me aijijë së troa itre hlue ka sisitria. Nemene fe la hnei epuni hna hane kapa qa ngöne la ini Akötresie?
3 Thangane kowe la melene la keresiano: Tro la ini qa thei Akötresie a xatua së troa ujëne la itre mekuthethewe së. Hnahone pi hi la atr, nge hetre mekuthethewe i angeic, ngo e ajane së tro ej’a eatrongë së ngöne la gojenyi ka meköti me troa nyihlue i Iehova thenge la aja i nyidrë, ke, nyipi ewekë catre troa pane amekötin’ej (Sal. 19:7, 8; Rom. 2:15) Ame la itre atrene fen, ke, tha ase kö angatre ujëne la mekune i angatre thenge la Trengewekë i Akötresie, celë hi matre menumenu nge mi koi angatre troa atre pengöne hnyawa la ewekë ka loi memine la ewekë ka ngazo. Nge kola icilekeu la itre aqane mekune, me itre aqane mel, pine laka kola isa catrefë la isa aqane trotrohnine la loi nyine troa kuca. Nge alanyimu catre la ka mekune laka qanyi angatre casi hi ketre axeciëne la aqane troa mele hnei angatr. Xele kö angatre ma drenge la sipu qeqe ne la nyipi inamacan. (Sal. 111:10; Iere. 8:9; Dan. 2:21) Ngo kola hmaloi la itre hace së hnene la itre ini qa thei Akötresie, nge easë a cetro palahi ceitune me itre nekö i Akötresie ka cas, pine laka hna ini së hnei nyidrë. Nge easë a cile qëmeke kowe la itre drai ka calemi cememine la mejiune me mekuthethewe ka nyipici, me ketre kuca palahi la hnëqa së.
4 Tro la ini qa thei Akötresie a xatua së troa cile qëmeke kowe la “enyin’asë ne la ihaji.” (Efe. 4:14) Tha tro pi kö së ngöngöne qa ngöne la edromë i atr, ke, jëne ixöjetriji hi lai me luelu, nge jëne pi ketre thele gojeny, ngo ame la pune lai, ke, tro hë a paatre la itre tulu ka loi. Hetre aja së troa kapa la ini qa thei Iehova, ke, matre troa ananyi së hnene la akötre me treije ka traqa kowe la ka alanyim. Ame la itre wathebo i Iehova memine la itre hnei nyidrëti hna amekötin, ke, kösë ‘aqane ewekë hutrö së’, kola hape: “Drei la gojenyi tro nyipunie a trongën’ej.” — Is. 30:21.
5 Enyipiewekëne la itre icasikeu: Ngöne la tusi Heberu 10:23-25, ke, ketre ewekë lai hnei Iehova hna ahnithe koi së. Ngöne la itre icasikeu ne la Ekalesia, Iehova a ini së. Hapeu, majemine kö së troa hane sine palahi la itre icasikeu, maine easë wangacone itr’ej? Mekune ju së laka ame la itre icasikeu, ke, ketre götrane lai hnëqane la atr hmi. Nge tha tro kö a mekune ka hape, nyine tro hi a tuluth, ke, thatreine kö tro së a triane la hnepe porogarame ne xeni ne la ua hnei Iehova hna hnëkëne koi së.
6 Hnei Mose hna thithi koi Akötresie ka hape: “Tro cilieti a atreinë huni troa e la itre drai hun, matre tro huni a hetrenyi la hni ka inamacan.” (Sal. 90:12) Hapeu, thithi fe kö së tune lai? Kapa madrine kö së la itre drai ka sisitria cili? Maine eje hi, ke, easë a “hetrenyi la hni ka inamacan” ngöne laka easë a melëne la itre drai cili thenge la aqane troa melëne itr’ej, nge nyine atrune la Atre Ini Ka Tru, ene Iehova Akötresie. Nge epi tro la ini nyidrë a xatua së troa tro tune lai.