La Enyipiewekëne La Tusi Hmitrötre Enehila
1 Alanyimu la itre atr ka mekune ka hape ame la Tusi Hmitrötr, ke, ka hekö hë, nge ka tha ihmeku hmaca kö memine la itre ewekë enehila. Ngacama ketre itusi lai hna ujëne me hna hamën’atrune hune la nöjei itusi asë, ngo ame pe, ke, tha nyipi tru kö la itre atr ka e, nge ala xalaithe hi la itre ka xötrethenge la hnen’eje hna qaja.
2 Ngo ame pena ha koi së, ke, wesi ula i Akötresie la Tusi Hmitrötr. Mama ha koi së, ngöne la mele ne la atr laka, nyipici catre la Tusi Hmitrötr. Ketre mina fe hnene la aqane caasine alien’ej, me itre hna perofetaane hnen’eje memine la wangatrehmekune hne së hna öhne qangön’eje hna amamane laka, hetre thangane ka loi kowe la mele ne la nöjei atr, nge kola amamane fe laka Tusi Akötresie “qathene la ua i Nyidrë.” (2 Tim. 3:16) Ame la itre hne së hna melëne memine la madrine së kowe la ahnahna celë ka sisitria, ke, celë hi ka troa upi së troa xatuane la itre atr troa wangatrehmekune la thangane ka loi.
3 Ijije tro së a qaja ka hape:
◼ “Jole kowe la ka alanyimu troa lapaune koi Akötresie pine laka angatr’a öhne la nöjei ewekë ka hace ka traqa kowe la fen, nge tha mekune hmaca kö angatre laka atreine Akötresie troa apatrene itr’ej. Nemene fe la mekune i nyipë? Nuepi troa sa, nge amamane jë lo tarak, ‘Pourquoi avoir confiance en la Bible.’ ” Amamane ju lai iatr, nge e jë la hnapane me hnaluene paragarafe ne la götrane 2. Maine kola mama la hnepe aja thene lai atr, ke, e jë me ce ithahnataane jë la itre mekene Tusi hna cinyihane hnine lai hnaluene paragaraf. Thupene lai, hamëne ju lai itus La Bible: Parole de Dieu ou des hommes? nge qaja ju fe la thupen.
4 Maine qaja jë pena epuni ka hape:
◼ “Hapeu, nyipiewekë kö tro la atr a hetre ixatua matre troa cile qëmeke kowe la itre ejolene la mel? [nue pi troa sa.] Ame petrekö ekö, ke, itre atr a e la Tusi Hmitrötre me trongën, ngo ame enehila saze hë la itre drai. Nemene fe la mekuna i nyipë, hetre thangane ka loi kö qa hnine la Tusi Hmitrötre enehila? [nue pi troa sa.] Amamane jë la hnei 2 Timoteo 3:16 hna qaja. [E jë.] Ame la trenge ewekë i Akötresie hna cinyihan, ke, tha eje kö a xatua së troa wangatrehmekune hmekuje hi la nyine troa kuca, ngo kolo fe a xatua së troa mejiune kowe la itre drai hnapin.” E jë Ioane 17:3. Thupene lai, nyijëne ju hnene la casi maine lue mekune ka tru hnei epuni hna iëne hnyawane qa hnine lai itus La Bible: Parole de Dieu ou des hommes? nyine troa amamane la enyipicine la Tusi Hmitrötr.
5 Tru la ixatua fe koi së, e hne së hna huliwaane lo itre aqane nyiqaane ithahnata hna cinyihane ngöne la götrane 10, 11 ne lo itus Comment raisonner fene lo hna cinyihane ka hape “Bible/Dieu”. Ngöne la götrane 51-60, hetre itre xaa aqane troa sa la itre hnyingene la itre atr maine pena aqane tro së a sa kowe la itre ka iönin.
6 Aqane amamane la Traduction du monde nouveau: Ngöne la xötrei iöhny, ijije hi troa amamane mekötin. Hnyingë nyidrëti ju ka hape hetre Tusi Hmitrötre i nyidrëti kö, nge hapeu, tha jole kö koi nyidrë troa e. Qanyine kö la aqane sa, nge amamane jë la itre enyipiewekëne la itre ixatua qangöne la aqane kuca ne la Tusi Hmitrötre Traduction du monde nouveau. Köjane ju fe la casi maine lue mekune ka ijije qa hnine lo itus Comment raisonner ne la götrane 408-411.
7 Loi e troa thupëne la nöjei ijine matre troa xatuane la itre atr troa e la Tusi Hmitrötr. xatuane jë la itre atr ka ajane matre troa hetre metrötre me ihnime kowe la wesi ula i Akötresie. E tro angatr’a trongëne la itre hna amekötine ngöne la mele i angatre me atrehmekune hnyawa la nyipici, ke, tro angatr’a hetrenyi la itre manathithe katru enehila me epine palua. — Sal. 119:105.