Amë Jë Thene La Itre Xane La Mejiune Kowe La Mele Ka Pë Pun
1 Maine kola mama laka, hnene pala hi la atr hna thele jëne troa hmitre canga qatr, me thele jëne troa aqeane trongëne la mele i angeic, ngo eje hi laka, thatreine jë kö troa neëne la troa qatr me mec. Ngo easë pe a olene laka, thaa Tusi Hmitrötre hmekuje kö a qeje pengöne la kepine matre kola qatre trootro la itre atr me mec, nge kolo fe a amamane la aqane troa paatre trootro la itre ethane la mele ne qatr, me aqane troa apaatrene la mec. Thatreine kö troa jele thoine la itre trenge nyipici cili, hna amamane hnine la itus, Atrehmekune Ka Eatrongë Nyipunie Kowe La Mele Ka Pë Pun. Kola sa hnyawa hnene la itus la itre hnyinge ka jole e troa qeje pengön, göi mele me mec, me eatrongëne la atr ka e la itusi cili, kowe la ijine kola troa acile hmaca la paradraiso.
2 Ame ngöne la treu maac, easë a troa tro fë la itus, Atrehmekune, nge loi e troa hetrenyi the së la ajane troa nyiqaane inine la Tusi Hmitrötre memine la itre atr. (Mat. 28:19, 20) Qa ngöne lai, troa wange hmaca la nöjei atr asë ka hetre hni ne ajane troa drenge la maca ne Baselaia. Maine tro së a catre huliwa tune lai, haawe, tro hë së a amë thene la itre xaa atr la mejiune troa mele epine palua. (Tito 1:2) Hanawange cahu itre xaa mekune ka lolo nyine ixatua koi epun.
3 Ame ngöne la kola xötrei iöhny, hnyingëne ju ka hape:
◼ “Hapeu, ase fe hë nyipëti hane thele la kepine matre itre atr a piine troa mele aqeany? [Nue pi troa sa.] Kola mejiune kowe la ketre mele e thupene la hna mec, hnene la itre Budis, me itre keresiano, me itre Ëduis, itre Mizilima, me itre xane ju kö.” Fe jë la itus Atrehmekune kowe la mekene 6, “Pine Nemene Matre Easë a Qatre Me Mec?,” nge e jë la paragarafe 3. Ithahnatane jë lai itre xötre ne la Tusi Hmitrötre hna cinyihan. Wange ju la lue hnyinge ngöne la pune la paragaraf, nge hnyingëne jë lai atr, maine angeice a ajane troa atre la itre mekune ka sa la itre hnyinge cili. Maine ajane hi angeic, haawe, wange ju la itre xaa paragarafe thupen, nge ce ithahnatane jë. Ase hë lai nyiqaane lai ketre etid! Maine pena, amë ju pë hë koi angeice la itus matre tro angeice a e, nge ce wange ju matre troa iwai hmaca; loi e troa canga bëeke troa ce ithahnatane me angeice la itre mekune nyine sa lo lai itre hnying, maine caas, maine lue drai pena thupen.
4 Maine hna amë hë la itus “Atrehmekune,” qaja ju ngöne la kola iwai hmaca ka hape:
◼ “Eni a bëeke hmaca troa ce wange me nyipëti lo lue hnyinge göi mec, hnei nyiso hna amë pe.” Amexeje hmaca jë lai lue hnying. Thupene lai, ithahnatane jë la mekune ka eje ngöne la mekene 6 fene la hna cinyihane hna hape “Ketre Trepene Mekune Ka Iamenu.” Nge thenge la hna kuca hnene lai atr, troa sisedrëne la etid, maine pena xome jë la hnyinge tixenuë ne la paragarafe 7 nyine topike thatraqane la etidi ka troa xulu. Ce wange ju troa iwai hmaca. Hamëne ju kowe lai atr la ketre pepa ne ihë, nge hamëne ju la itre xaa hnepe ithuemacanyi ngöne la aqane trongene la itre icasikeu. Qa ngöne la hni ka menyik, hane jë fe hë angeice troa hane sine itre ej.
5 Maine kola cainöje ngöne itre hnalapa trootro, maine ngöne la nöjei ijin, nyiqaane qaja jë ka hape:
◼ “Hapeu, hane kö nyipëti mekune la pengö së elany, memine la ihnadro hne së hna mele ngön? [Nue pi troa sa.] Caasi hi la aqane qeje pengöne la drai elanyi hnei Tusi Hmitrötr—Paradraiso! Eje a qaja ka hape, ame ngöne la qaan, hnei Akötresieti hna nyidrawane la ketre hnepe götrane la ihnadro nyine ketre paradraiso ka mingöming; nge e cili hnei Nyidrëti hna amë e cili la lue trefëne hnei Nyidrëti hna xup. Qa i nyidroti troa nyialiene la fene hnengödrai asë, me nyihnyawane trongëne la ihnadro uti hë la paradraiso ej. Hanawange la aqane qeje pengöne lai.” Fe jë la itus Atrehmekune ngöne la götrane 8, nge e jë la paragarafe 9 fene la hna cinyihane hna hape “Mele Ngöne Paradraiso.” Thupene lai, ithahnatane jë la itre mekune ngöne la paragarafe 10, nge e jë la itre xötre ne la Tusi Hmitrötre hna cinyihan, Isaia 55:10, 11. Sisedrëne jë me ce ithahnatane la pengöne la mele ngöne la paradraiso hna troa acile hmaca, nge ce wange ju la paragarafe 11-16. Maine pena upe jë lai atr troa ketre e lai, nge isa pui ju matre troa ce ithahnatane hmaca.
6 Maine thaa hna nyiqaane kö la etid ngöne la xötrei, tupathe ju troa kuca tune la ngöne la kola iwai hmaca:
◼ “Tune lo hnei nyiso hna ithahnatane hë, aja i Akötresie la troa aparadraisone asë la fen. Matre kola hnyinge ka hape, ‘Troa tuneka la paradraiso?’ ” Fe jë la itus Atrehmekune, ngöne la mekene 1, nge wange ju la paragarafe 11-16 fene la hna cinyihan, hna hape “Mele Ngöne La Paradraiso Hna Acile Hmaca.” Thupene lai, amamane jë la iatr götrane 4-5, nge hnyingëne ju kowe lai atr, maine angeice jë kö a ajane troa hane mele ngöne lai götrane ka mingöminge cili. E jë la pane xötrehnaewekë ne la paragarafe 17 götrane 10. Thenge la hna kuca hnene lai atr, troa sisedrëne la etid, maine pena qaja ju koi angeice ka hape, ame la epuni a iwai hmaca, tro epuni a qeje pengöne koi angeice la ewekë hna thele thene la ketre atr, matre tro angeice a hane mele hnine la paradraiso hna acile hmaca. Hamëne ju kowe lai atr la ketre pepa ne ihë, nge hamëne ju la itre xaa hnepe ithuemacanyi ngöne la aqane trongene la itre icasikeu. Cememine la hni ka menyik, hane jë fe hë angeice troa hane sine itre ej.
7 Ketre jiane huliwa ka sisitria catre la itus Atrehmekune, ngöne laka, eje a troa amamane kowe la itre xaa atr la “mele ka tha ase palua kö” hna thingehnaeane hnei Akötresie. Tro la itre etid hnei epuni hna kuca kowe la itre atr, a amë hnyawa ngöne la itre hni angatre la mejiune ka tru cili, wene ne la ua i Akötresie, “ka tha’teine thoi.”