Baara kɛ bɛrɛbɛrɛ n’i ka wagati ye cidenya baara la
1 Siga t’a la, baara caaman be yen ka kɛ cidenya baara la. Nka wagati tɔɔ man ca (Yuh. 4:35; 1 Kɔr. 7:29). N’an be kɔn k’an yɛrɛ labɛn koɲuman, an bena se ka baara kɛ bɛrɛbɛrɛ n’an ka wagati ye, an ye min latigɛ cidenya baara kama.
2 I k’i yɛrɛ labɛn: Sanni i ka taga waajulibaara lajɛn na, i k’a filɛ ni gafew b’i kun i mako bena kɛ minw na. I k’i hakili to gafew yiracogo la fana. Waajulibaara lajɛn mana ban ni delili ye, a’ ye sin ka taga waajuli kɛyɔrɔ. O bena kɛ sababu ye i n’i baarakɛɲɔgɔnw ka baara kɛ bɛrɛbɛrɛ ni aw ka wagati ye waajuli la.
3 Ni cii dira i ma ka waajuli-baara lajɛn ɲɛminɛ, i k’a daminɛ lɛri la. I k’a kɛ ka surunya: miniti 10 ani 15 cɛ. Sanni i ka mɔgɔw labila u ka taga waajuli kɛyɔrɔ la, i janto ko bɛɛ b’a lɔn a bena baara kɛ ni mɔgɔ min ye ani yɔrɔ min na.
4 Waajuli kɛtɔ: Waajulibaara lajɛn mana ban dɔrɔn, aw kana to o yɔrɔ la ka mɛɛn gwansan. Nka a’ ye sira ta ka taga kiin kɔnɔ. N’a be se ka kɛ, a’ y’a daminɛ ka waajuli kɛ soo ni soo sanni ka vizitiw ni bibulukalanw kɛ. N’a b’i kɔnɔ ko i bena kɔn ka taga ka tɔɔw to yen kiin kɔnɔ, i k’o fɔ waajulibaara lajɛn ɲɛminɛbaga ye. N’a sɔrɔ ale be se ka labɛn kɛ walisa i ka waajuli kɛ ni weleweledala dɔ ye min fana b’a fɛ ka kɔn ka taga. N’i be baro kɛra ni mɔgɔ dɔ ye, i janto i baarakɛɲɔgɔnw la minw lɔnen be k’i kɔnɔ fɔɔ i ka baro ka ban. O kɔrɔ ko i ka wuli ka bɔ yen sɔsɔlikɛla dɔ kɔrɔ nɛmɛnɛmɛ, wala i ka labɛn kɛ ka segi ka na wagati wɛrɛ la n’a tigi b’a mako don baro la.—Mat. 10:11.
5 Viziti minw bɛɛ be kiin kelen kɔnɔ, i k’u bɛɛ kɛ ka ban k’a sɔrɔ ka taga kiin wɛrɛ kɔnɔ. O la, i tɛna tagama gwansan kɛ. I fana be se ka mɔgɔ dɔw weele telefɔni na k’a filɛ n’u bena sɔrɔ u ka soo (Ntal. 21:5). N’i y’a latigɛ ka mɛɛn viziti dɔ la, labɛn be se ka kɛ walisa tɔɔw ka waajuli kɛ o yɔrɔ gɛrɛfɛ, wala u ka taga viziti wɛrɛ kɛ.
6 An be sumantigɛ baaraba wagati lo kɔnɔ Alako ta fan fɛ (Mat. 9:37, 38). Yanni dɔɔni cɛ, o baara bena ban. O kama, an b’a fɛ ka baara kɛ bɛrɛbɛrɛ n’an ka wagati ye waajuli la.