I be waajulibaara jɛnkulu min na, o be se k’i nafa cogo di?
1. Nafa jumanw tun be sɔrɔ kafo ka kitabukalan jɛnkulu la minw bele be sɔrɔ waajulibaara jɛnkulu kɔnɔ?
1 Yala kafo ka kitabukalan ka koo dɔw lɔgɔ be i la wa? Jɛnkuluw tun ka dɔgɔ-dɔgɔ ani mɔgɔw tun lafiyanin lo u kɔnɔ ka tɛmɛ Masaya Boon kɔnɔ. O tun b’a to a ka nɔgɔ ka teriw sɔrɔ minw be barika don an na Alako ta fan fɛ (Ntal. 18:24). Kitabukalan jɛnkulu kɔrɔsibaga tun be se ka bɛɛ kelen kelen ka koow cogoya lɔn ani k’u jaa gwɛlɛya dan na dan na (Ntal. 27:23; 1 Piɛrɛ 5:2, 3). O nafa ɲɔgɔn bele be sɔrɔ an ka waajulibaara jɛnkulu kɔnɔ.
2. An be se k’a ɲini ka teriya sigi n’an ka jɛnkulu mɔgɔw ye cogo di walisa ka ɲɔgɔn jija Alako ta fan fɛ?
2 An k’a bɔ an yɛrɛ la ka teriya sigi ni mɔgɔw ye: Waajulibaara jɛnkuluw fanba bonya be i n’a fɔ kitabukalan jɛnkuluw ta. N’an be jɛn n’an balimaw ye ka waajuli kɛ “ni dusu kelen ye,” teriya sɔbɛ be se ka sigi an ni ɲɔgɔn cɛ (Fil. 1:27). E delila ka waajuli kɛ ni mɔgɔ joli ye i ka jɛnkulu kɔnɔ? I be se k’i “ka kanuya bonya” o koo la wa? (2 Kɔr. 6:13) Tuma dɔw la, an be se fana k’an ka jɛnkulu mɔgɔ dɔ weele a ka na an ka gwa kɔnɔ batoli la wala ka dumuni kɛ n’an ye. Kafo dɔw kɔnɔ, lonan dɔ mana na kalan kɛ, waajulibaara jɛnkulu dɔ b’a weele dumuni na. Jɛnkuluw b’o kɛ ka di ɲɔgɔn ma. N’a sera jɛnkulu dɔ ma, o jɛnkuludenw be ɲɔgɔn lajɛn ka dumuni kɛ ani ka ɲɔgɔn jija hali ni kalankɛla tɛ se ka na.
3. Sababu jumanw dira an ma ka dɛmɛ sɔrɔ diinan mɔgɔw fɛ an ka jɛnkulu kɔnɔ?
3 Hali ni kafo be ɲɔgɔn lajɛn siɲɛ fila dɔrɔn lɔgɔkun kɔnɔ sisan, o kɔrɔ tɛ ko weleweledalaw tɛna dɛmɛ bɛrɛ sɔrɔ tugun diinan mɔgɔkɔrɔw fɛ. Jɛnkulu kelen kelen bɛɛ kɔnɔ, cii dira kɔrɔsibaga dɔ ma ka bɛɛ kelen kelen jija ani k’u degi waajuli la. N’i ka jɛnkulu kɔrɔsibaga m’a latigɛ ka waajuli kɛ n’i ye fɔlɔ, e k’a ɲini ka waajuli kɛ n’a ye. Ka fara o kan, waajulibaara kɔrɔsibaga be waajuli kɛ ni jɛnkulu dɔ ye wikɛni dɔ la kalo o kalo. Ni jɛnkuluw man ca kafo kɔnɔ, a be se ka bɔ u kelen kelen ye siɲɛ fila saan kɔnɔ. Yala i be labɛn kɛ k’i seen don waajuli la n’a nana bɔ aw ka jɛnkulu ye wa?
4. a) Waajulibaara lajɛnw be labɛn cogo di? b) Mun na an ka kan k’a filɛ n’an be se k’an ka soo labila waajulibaara lajɛnw kama?
4 Tuma caaman na, a ka fisa jɛnkulu kelen kelen bɛɛ k’a ka waajulibaara lajɛn kɛ dan na wikɛniw na. N’o lajɛnw be kɛ yɔrɔ caaman na wagati kelen ɲɔgɔn na, a be se ka nɔgɔya weleweledalaw fɛ ka taga o lajɛnw na ani waajuli kɛyɔrɔ yɛrɛ la. Labɛn be se ka kɛ teliya la ani bɛɛ be sin ka don kiin kɔnɔ. A ka nɔgɔ fana jɛnkulu kɔrɔsibaga fɛ k’a janto koɲuman a ka jɛnkulu mɔgɔw la. Nka, koo dɔw be se k’a to a ka fisa ko jɛnkulu damanin be fara ɲɔgɔn kan ka baara kɛ. A be se ka kɛ ko kafo kuru bɛɛ be lajɛn waajuli kama La Tour de Garde kalan banni kɔ wala kalo ka samedi fɔlɔ la. Tuma caaman na, a ka fisa jɛnkulu kelen kelen bɛɛ ka mɔgɔw ka sigi ɲɔgɔn fɛ. A ka ɲi miniti damanin ka di jɛnkulu kɔrɔsibagaw ma u k’u ka mɔgɔw tilan-tilan sanni delili ka kɛ ka lajɛn kuncɛ.—Koorilen nin lajɛ: “I be se k’i ka soo labila wa?”
5. Hali ni kafo ka kitabukalan tɛ sen kan tugun, an lanin be mun lo la?
5 Tiɲɛn lo ko kafo ka kitabukalan tɛ sen kan tugun. Nka an mako be fɛɛn o fɛɛn na ka Jehova sago kɛ, a bele b’o dira an ma (Heb. 13:20, 21). Jehova b’a janto an na minkɛ, an tɛ dɛsɛ foyi la (Zab. 23:1). An be se ka nafa caaman sɔrɔ an ka waajulibaara jɛnkulu kɔnɔ. N’an b’a bɔ an yɛrɛ la ka “suman caman dan” an bena “suman caman tigɛ fana” (2 Kɔr. 9:6).
[Koorilen ɲɛɛ 6 kan]
I be se k’i ka soo labila wa?
Kafo dɔw be jɛnkulu damanin fara ɲɔgɔn kan ka waajuli kɛ wikɛni na sabu waajulibaara lajɛn kɛyɔrɔw man ca u fɛ. Waajulibaara lajɛnw ye kafo ka labɛn dɔw lo ye. O la, k’a to o lajɛnw ka kɛ an ka soo, o ye nɛɛmaba ye. I be se k’i ka soo labila wa? Kana sigasiga k’o kɛ sabu i b’a miiri ko i ka soo tɛ bɛrɛ ye. I ka soo be yɔrɔ min na kiin kɔnɔ, diinan mɔgɔkɔrɔw bena u janto o la ani koo wɛrɛw la fana i n’a fɔ u tun b’a kɛ fɔlɔ la cogo min na ka sɔrɔ ka kitabukalan kɛyɔrɔw sugandi. N’i b’a fɛ k’i ka soo labila, o fɔ aw ka jɛnkulu kɔrɔsibaga ye.