Yala i ye bibulukalan kɛcogo ɲɛyira ɲɔgɔnyeko fɔlɔ la wa?

N’an be bibulukalan kofɔra mɔgɔw ye, dɔw b’a fɔ k’u mako t’a la wala k’u b’o ɲɔgɔn kɛ u ka legilizi kɔnɔ. Komi u t’a lɔn ko an ka bibulukalan kɛcogo be daan na ni diinan tɔɔw ta ye, u t’a lɔn k’o kalan be se ka diya u ye ani k’u dɛmɛ ka faamuyali sɔrɔ. O kama, sanni ka bibulukalan kofɔ dɔrɔn u ye, mun na an tɛ miniti fila ɲɔgɔn ta k’a kɛcogo ɲɛyira u la ɲɔgɔnyeko fɔlɔ la? An ka ɲɛyirali dɔ ta: Kana a fɔ u ye dɔrɔn ko i be se gwa la ani ko i bena segi ka na ni domunifɛn dɔ ye kɔfɛ. Nka, i ka sin ka dɔ di u ma u k’a nɛnɛ k’a filɛ! A filɛ i be se k’o kɛ cogo min na miniti damanin kɔnɔ ni An ka Masaya Cidenyabaara ka ladili dɔ ye (saan 2006 feburukalo ta, ɲɛɛ 9nan):

“E ka miiri la, yala kuma nunu bena na dafa loon dɔ la wa? [Esayi 33:24 kalan, ani i ka mɛnni kɛ a tigi fɛ.] A to ne ka koo diiman dɔ yira i la o koo la.” I ka gafe Bibulu ka kalan di a ma ani k’a fɔ ko a k’a yɛlɛ a ɲɛɛ 36 dakun 22nan na. O dakun ka ɲiningali kalan jukɔrɔla la ani o kɔ, a ɲini lamɛnnikɛla fɛ a ka jaabili ɲini tuma min na i be dakun kalanna. Kalan kɔ, segin tugun ɲiningali kan ani a tigi ka jaabili lamɛn. A’ ye vɛrise dɔ wɛrɛ kalan ɲɔgɔn fɛ. Ɲiningali dɔ lawuli i bena min jaabi siɲɛ wɛrɛ ani aw ye bɛn loon ani lɛri tigitigi dɔ la walisa i ka segi ka na. I ye bibulukalan lo daminɛ ten!