An ka sarakalasebagaw Kuntigiba Yezu b’an faamu

1-2. a) Mun na Jehova y’a Dencɛ ci ka na dugukolo kan? b) An bena mun lo lajɛ barokun nin na? (Eburuw 5:7-9).

A SAAN 2000 ɲɔgɔn ye nin ye, Jehova Ala y’a Dencɛ ci ka na dugukolo kan. O Dencɛ koo ka gwɛlɛ a ma kosɔbɛ, nga mun na a y’a ci ka na dugukolo kan do? A y’o kɛ kuun minw kama, u la dɔ ye ka adamadenw kisi ka bɔ jurumu ni saya ka jɔnya la ani Sutana ye bɔnɛ minw u ma k’u lalaga (Zan 3:16; 1 Zan 3:8). Jehova tun b’a lɔn ko Yezu tun bena ɲɛnamaya min kɛ dugukolo kan, o tun bena a to a be makari ani k’an faamu kosɔbɛ ka tɛmɛ fɔlɔ kan. A tun b’a lɔn fana k’o tun bena a labɛn a ka sarakalasebagaya la. Yezu kɛra sarakalasebagaw Kuntigiba ye a batizenin kɔ, saan 29 Krista tile la.a

² Yezu ye ɲɛnamaya min kɛ dugukolo kan, barokun nin na, an bena a ye cogo min na o y’a dɛmɛ ka kɛ sarakalasebagaw Kuntigiba ye min b’an faamu koɲuman. An k’a ɲini k’a faamu bɛrɛbɛrɛ cogo min na Yezu ka “koo bɛɛ dafara” o baara kama. O bena a to a be nɔgɔya an ma k’an magwɛrɛ Jehova la, hali n’an fari fagara an ka jurumuw wala an ka barikantanya kosɔn.—Eburuw 5:7-9 kalan.

ALA DENCƐ KANULEN NANA DUGUKOLO KAN

3-4. Yɛlɛmaniba jumanw lo kɛra Yezu ka ɲɛnamaya la tuma min na a nana dugukolo kan?

³ Yɛlɛmaniw kɛra an caaman ka ɲɛnamaya la ka ye. N’a sɔrɔ yɔrɔ min tun ka di an ye, an bɔra yen ka taga sigi yɔrɔ wɛrɛ la, k’an teriw n’an somɔgɔw to yen. O yɛlɛmaniw ɲɔgɔn man nɔgɔ. Nga yɛlɛmanibaw ma kɛ mɔgɔ si ka ɲɛnamaya la ka se Yezu ta ma. A tun be ni lɔyɔrɔba ye sankolo la ka tɛmɛ mɛlɛkɛ tɔɔw bɛɛ kan. A koo tun ka di Jehova ye ani a ninsɔn tun ka di tuma bɛɛ ka jɛn ka baara kɛ n’a Faa ye (Zab. 16:11; Talenw 8:30). Nga, Filipikaw 2:7 b’a fɔ ko lɔyɔrɔba min tun b’a fɛ sankolo la, “a sɔnna k’o bɛɛ to yen” walisa ka na ɲɛnamaya kɛ dugukolo kan adamaden dafabaliw cɛma.

⁴ An k’a filɛ fana koow tun be cogo min na Yezu wolotuma na ani a ye saan fɔlɔ minw kɛ dugukolo kan adamaden cogo la. Yezu bangebagaw ye saraka min bɔ a wolonin kɔ, o b’a yira ko u tun ye fantanw ye (Lev. 12:8; Luka 2:24). Masacɛ jugu Erɔdi ye Yezu woloko mɛn tuma min na, a y’a ɲini k’a faga. Walisa ka Yezu niin kisi, a bangebagaw bolila ka taga to Ezipiti wagati dɔ la (Mat. 2:13, 15). Yezu tun be ɲɛnamaya min kɛra sankolo la, o yɛlɛmana pewu tuma min na a nana dugukolo kan!

5. Yezu ye mun lo ye dugukolo kan ani o y’a labɛn cogo di a ka sarakalasebaga baara kama? (jaa lajɛ fana).

⁵ Ka Yezu to dugukolo kan, a ye mɔgɔ caaman ye u be tɔɔrɔla. Siga t’a la, a ka mɔgɔ kanulen dɔw sara, i n’a fɔ a lamɔfa Yusufu. A ka cidenya baara la dugukolo kan, a ye kunatɔw, fiyentɔw ani nanbaraw ye. A ye bangebagaw ye fana minw deenw sara ani u hinɛ donna a la (Mat. 9:2, 6; 15:30; 20:34; Mariki 1:40, 41; Luka 7:13). Tiɲɛn lo ko k’a to sankolo la, a ɲɛɛ tun be tɔɔrɔw la dugukolo kan. Nga, tuma min na a nana dugukolo kan adamaden cogo la, mɔgɔ minw tun be tɔɔrɔla, a tun be se k’u dusukunnakow faamu koɲuman (Ezayi 53:4). Yezu ye ɲɛnamaya kɛ dugukolo kan minkɛ, o y’a dɛmɛ ka mɔgɔw dusukunnakow n’u ka jigitigɛkow faamu ani k’a faamu fana dimi min b’u kan. A tun be ni adamadenw dusukunnakow ɲɔgɔn ye i n’a fɔ hami, sɛgɛn ani dusukasi.

YEZU Y’A YIRA KO A BE MAKARI TƆƆW LA ANI KO A B’U FAAMU

6. Kira Ezayi ka talen kumaw b’an kalan mun lo la Yezu ka kanuya n’a ka hinɛ koo la? (Ezayi 42:3).

⁶ Yezu ka cidenya baara kuru bɛɛ la, a y’a yira ko a be barikantanw ni dɛsɛbagatɔw faamu ka ɲɛ. O cogo la, a ye kiraya kumaw dafa. Eburukan sɛbɛninw kɔnɔ, minw barika ka bon ani u ninsɔn diyanin lo, olu sumana tuma dɔw la ni nankɔ ɲuman dɔ wala yiribabaw ye (Zab. 92:13; Ezayi 61:3; Zer. 31:12). Nga fantanw ani minw tɔɲɔnin lo, olu sumana ni buruku fɔnsɔnnin ani fitinɛ ye min be sisi bɔra. Mɔgɔw b’a jati ko nafa bɛrɛ t’u la (Ezayi 42:3 kalan; Mat. 12:20). Hakili senu barika la, kira Ezayi tɛmɛna talen kumaw fɛ k’a yira ko u be mɔgɔ minw jati mɔgɔ fufafuw ye ani k’u mafiɲɛya, Yezu bena u kanu ani ka hinɛ u la.

7-8. Yezu ye Ezayi ka kiraya kuma dafa cogo di?

⁷ Matiyo y’a yira a ka Evanzili kɔnɔ ko Ezayi ka kuma nunu ɲɛsinna Yezu lo ma: “A tena buruku fɔnsɔnnin tigɛ, fitinɛ min be sisi bɔra, a tena o tɔɔ faga.” Mɔgɔ minw tun tɔɲɔnin lo ani a tun b’u ɲɛɛ na ko u be i ko buruku fɔnsɔnnin ani mɔgɔ jigitigɛnin minw tun be i ko fitinɛ min be sisi bɔra, Yezu ka kabako dɔw y’u nafa. Misali la, a ye cɛɛ dɔ kɛnɛya kuna tun be min fari yɔrɔ bɛɛ la. Miiri k’a filɛ: N’a sɔrɔ o cɛɛ jigi tun t’a la ko a bena kɛnɛya loon dɔ ani ka wagati diiman kɛ n’a somɔgɔw ani a teriw ye (Luka 5:12, 13). Yezu ye cɛɛ dɔ kɛnɛya fana min tun ye tulogweren ye ani a tun tɛ se ka kuma ka ɲɛ. O cɛɛ tun mana mɔgɔw ye u be baro kɛra ninsɔndiya la ani a tɛ se k’u ka kuma mɛn, miiri k’a filɛ o tun be min kɛ a la! (Mariki 7:32, 33). Nga o dɔrɔn tɛ.

⁸ Yezu ka wagati la, Yahutu caaman tun b’a miiri ko mɔgɔ minw tɔɔrɔnin lo, Ala lo tun b’u ɲangira u ka jurumuw wala u bangebagaw ka jurumuw kosɔn (Zan 9:2). O ngalon kalanw tun b’a to mɔgɔ minw tun tɔɔrɔnin lo, u b’a miiri ko nafa foyi t’u la. Nga, Yezu y’u kɛnɛya ani k’u dɛmɛ u k’a lɔn ko Ala b’a janto u la. O cogo la, a ye Ezayi ka kiraya kuma dafa. Yezu ye min kɛ, o b’a to an lanin be mun lo la bi?

9. Eburuw 4:15, 16 b’a yira cogo di ko an ka sarakalasebagaw Kuntigiba be adamaden dafabaliw dusukunnakow faamu ka ɲɛ?

⁹ Eburuw 4:15, 16 kalan. An be se ka la a la ko Yezu bena hinɛ an na tuma bɛɛ ani k’an faamu. Tɔɔrɔ minw b’an kan, a b’o faamu ani a b’an dusukunnakow fana faamu. Vɛrise 15nan kɔnɔ, gɛrɛkikan kumaden min bayɛlɛmana ko “faamu,” o kɔrɔ ko n’an be tɔɔrɔla ani n’an dusu kasinin lo, o be Yezu fana tɔɔrɔ. Yezu ye kabako minw kɛ, u b’a yira ko a tun mana mɔgɔw ye u be tɔɔrɔla, o tun b’a tɔɔrɔ kosɔbɛ yɛrɛ le. A ma mɔgɔw kɛnɛya sabu a tun ka kan k’o kɛ. Nga, a y’u kɛnɛya sabu a tun b’a janto u la sɔbɛ la ani a tun b’a fɛ k’u dɛmɛ. Misali la, tuma min na Yezu ye kunatɔcɛ kɛnɛya, a tun be se ka to yɔrɔjan k’o kɛ. Nga a magara a la sabu o cɛɛ hinɛ donna a la. N’a sɔrɔ a saan caaman ye nin ye mɔgɔ si tun ma maga a la! Ka fara o kan, an kumana tulogweren min koo la, tuma min na Yezu tun b’a fɛ k’a kɛnɛya, a tagara n’a ye a danna mankan tɛ yɔrɔ min na. Miiri k’a filɛ fana: Muso dɔ tun ye koo juguw kɛ, nga a nimisara. Tuma min na a ye Yezu seenw ko n’a ɲɛji ye ani k’u jɔsi n’a kunsigiw ye, Fariziɲɛ dɔ y’a mafiɲɛya. Nga Yezu y’o muso lafasa a kɛtɔ ka Fariziɲɛcɛ jalaki (Mat. 8:3; Mariki 7:33; Luka 7:44). Mɔgɔ minw tun man kɛnɛ wala minw tun ye jurumubaw kɛ, Yezu tun t’a yɛrɛ mabɔ u la. Nga, a tun b’u weele u ka na ale fɛ ani a tun b’a yira u la ko a b’u kanu. An ka la a la ko a b’an fana kanu o cogo la.

AN K’AN KA SARAKALASEBAGAW KUNTIGIBA LADEGI

10. An be se ka baara kɛ ni mun lo ye bi walisa ka tulogwerenw ni fiyentɔw dɛmɛ? (jaaw lajɛ fana).

¹⁰ An ye Yezu ka kalanden kantigiw ye minkɛ, an b’an seko bɛɛ kɛ k’a ladegi. O la, an b’a yira tɔɔw la ko an b’u kanu, an b’u faamu ani ko an be makari u la (1 Piyɛri 2:21; 3:8). Tiɲɛn lo ko an tɛ se ka tulogwerenw ni fiyentɔw kɛnɛya. Nga, an be se k’u dɛmɛ Alako ta fan fɛ. Misali la, sisan an ka gafew be sɔrɔ kaan 100 ni kɔ la bobow kumacogo la. An be gafew bɔ fana kaan 60 ni kɔ la fiyentɔw ni mɔgɔ wɛrɛw ye minw tɛ yeli kɛ ka ɲɛ. An ka videwow ɲɛfɔli be sɔrɔ kaan 100 ni kɔ la fana. U y’o bɛɛ kɛ walisa ka tulogwerenw ni fiyentɔw dɛmɛ u k’u magwɛrɛ Jehova n’a Dencɛ la.

11. I ko Yezu, Jehova ka ɔriganisasiyɔn b’a yira cogo di ko a b’a janto mɔgɔ sifa bɛɛ la? (Kɛwaliw 2:5-7, 33; jaaw lajɛ fana).

¹¹ Jehova ka ɔriganisasiyɔn be jijalibaw kɛra walisa ka mɔgɔ sifa bɛɛ dɛmɛ. A to i hakili la ko Yezu suu kununin kɔ, a ye hakili senu di a ka kalandenw ma. O la, minw bɛɛ tun lajɛnnin lo Pantekɔte loon na, kalandenw ye kibaro diiman fɔ olu ye ani u y’a mɛn “u yɛrɛ ka kaan na.” (Kɛwaliw 2:5-7, 33 kalan). Yezu ka dɛmɛ barika la, Jehova ka ɔriganisasiyɔn be gafew dilan kaan 1000 ni kɔ la. Mɔgɔ damanin dɔrɔn lo b’o kaan dɔw fɔ. Misali la, Ameriki saheli ni worodugu fan fɛ, mɔgɔ damanin lo be amerɛndiɲɛkan dɔw fɔ. O bɛɛ n’a ta, an ka gafew be sɔrɔ o kaan 160 ni kɔ la walisa mɔgɔ caamanba ka se ka kibaro diiman mɛn. An ka gafew be sɔrɔ fana romanikan 20 ni kɔ la. Minw b’o kaanw fɔ, u caaman sɔnna tiɲɛn diinan na.

12. Jehova ka ɔriganisasiyɔn be dɛmɛ nafaman wɛrɛ juman lo lase balimaw ma?

¹² Jehova ka ɔriganisasiyɔn be jijalibaw kɛra walisa ka kibaro diiman jɛnsɛn. Nga o dɔrɔn tɛ. Balawo cunna balima minw kan, a be dɛmɛ lase olu fana ma. O la, balima waa caaman b’u yɛrɛ di k’u kerecɛnɲɔgɔnw dɛmɛ balawo cunna minw kan. Ka fara o kan, Jehova ka ɔriganisasiyɔn be batolikɛyɔrɔw labɛn walisa mɔgɔw ka se ka ɲɔgɔn lajɛn ka dɔ lɔn tugun Jehova ka kanuya koo la.

AN KA SARAKALASEBAGAW KUNTIGIBA BE SE K’I DƐMƐ

13. Yezu b’an dɛmɛ cogo minw na, u dɔw kofɔ.

¹³ Yezu ye Sagadɛndɛla ɲuman ye minkɛ, a b’a janto walisa an kelen kelen bɛɛ k’an makoɲɛfɛnw sɔrɔ Alako ta fan fɛ (Zan 10:14; Efɛz. 4:7). Tuma dɔw la, an ka koow cogoya be se k’a to an be kɛ i ko buruku fɔnsɔnnin wala fitinɛ ye min be sisi bɔra. An fari be se ka faga kojugu sabu bana jugu dɔ b’an na, an ye fili dɔ kɛ wala bɛnbaliyako dɔ donna an ni balima dɔ cɛ. O la, a be se ka gwɛlɛya an ma an kana to ka miiri dɔrɔn an ka dimi na ani ka sinsin an ka jigiya kan siniɲasigi koo la. Nga, a to i hakili la ko Yezu ɲɛɛ b’a la min b’i kan ani a b’i dusukunnakow bɛɛ faamu. A be hinɛ i la minkɛ, a b’a fɛ k’i dɛmɛ. Misali la n’i fari faganin lo, a be se ka tɛmɛ hakili senu fɛ k’i barika bonya (Zan 16:7; Titi 3:6). Ka fara o kan, a be se ka tɛmɛ diinan mɔgɔkɔrɔw ni balima wɛrɛw fɛ k’i jija ani k’i dɛmɛ.—Efɛz. 4:8.

14. N’an fari faganin lo, an ka ɲi ka mun lo kɛ do?

¹⁴ N’i fari faganin lo wala i dusu kasinin lo, kana ɲinɛ ko Yezu lo ye an ka sarakalasebagaw Kuntigiba ye. A to i hakili la ko Jehova y’a ci ka na dugukolo kan walisa a k’a niin di an kosɔn. Nga o dɔrɔn tɛ. A y’a cii fana walisa a ka se ka adamaden dafabaliw ka gwɛlɛyaw faamu koɲuman. O la, n’an fari faganin lo an ka jurumuw wala an ka barikantanya kosɔn, Yezu labɛnnin lo tuma bɛɛ k’an dɛmɛ “an dɛsɛ tuma na.”—Eburuw 4:15, 16.

15. Mun lo ye balimacɛ dɔ dɛmɛ a kɛra kafoden dɔ ye kokura?

¹⁵ Minw y’u yɔrɔ janya Jehova la, Yezu be Ala sagokɛlaw ɲɛminɛ walisa u k’olu yɔrɔ ɲini ani k’u dɛmɛ u ka kɔsegi a ma (Mat. 18:12, 13). An ka Stephaneb ka koo lajɛ. Saan 12 a bɔnin kɔ kafo kɔnɔ, a y’a latigɛ ka taga kafo ka lajɛn dɔ la. A ko: “Maloya tun be n’ na. Nga, n’ tun b’a fɛ ka kɛ Jehova ka denbayamɔgɔ dɔ ye tugun sabu u be ɲɔgɔn kanu. Diinan mɔgɔkɔrɔ minw ye baro kɛ ni n’ ye, u ye n’ bisimila ka ɲɛ. Tuma dɔw la, n’ tun b’a jati ko nafa foyi tɛ n’ na ani n’ fari tun be ɲini ka faga. Nga, balimaw tun be n’ hakili jigi ko Jehova ni Yezu t’a fɛ n’ ka n’ fari faga. Tuma min na n’ kɛra kafoden dɔ ye tugun, kafomɔgɔw bɛɛ ye ne ni n’ ka denbayamɔgɔw bisimila ni dusudiya ye. Kɔfɛ, n’ muso sɔnna bibulukalan na ani sisan an be Jehova batora ɲɔgɔn fɛ.” Siga t’a la, an ka sarakalasebagaw Kuntigiba kanulen ninsɔn ka di kosɔbɛ k’a ye ko mɔgɔ minw nimisara, u ye dɛmɛ sɔrɔ ani u kɛra kafoden dɔw ye kokura!

16. Mun na i dusu ka di k’o sarakalasebagaw Kuntigiba ɲɔgɔn sɔrɔ?

¹⁶ Yezu tun be dugukolo kan tuma min na, a ye mɔgɔ caaman dɛmɛ wagati bɛnnin na. Bi, an be se ka la a la kosɔbɛ ko an mako be dɛmɛ min na, a bena o di an ma. Ani yanni dɔɔni duniɲa kura kɔnɔ, mɔgɔ minw be mɛnni kɛ a fɛ, a bena u hɔɔrɔnya pewu ka bɔ jurumu n’a nɔfɛkow bɛɛ la. An b’an ka Ala Jehova waleɲuman lɔn kosɔbɛ. A b’an kanu ani a be makari an na minkɛ, a y’a Dencɛ kɛ sarakalasebagaw Kuntigiba ye min b’an faamu ka ɲɛ!