“ E koo diyara Ala ye”!

1-2. Mun lo be se k’an dɛmɛ ka la a la ko nafa b’an na Jehova ɲɛɛ kɔrɔ?

JEHOVA sagokɛla kanulen dɔw b’a miiri ko nafa t’u la. N’a sɔrɔ mɔgɔ dɔ y’u minɛ i n’a fɔ nafa foyi t’u la. O ɲɔgɔn ye ele fana sɔrɔ wa? N’o lo, mun lo be se k’i dɛmɛ ka la a la ko nafa b’i la Jehova ɲɛɛ kɔrɔ?

² Jehova b’a fɛ an ka mɔgɔw jati ani k’u minɛ cogo min na, i be se ka Bibulu ka maana dɔw kalan o koo la. N’i y’o kɛ, o bena i nafa. A Dencɛ Yezu ye mɔgɔw minɛ ni bonya ye ani a ye danbe la u kan. O cogo la, Yezu y’a yira ko mɔgɔ majiginin minw b’a miiri ko nafa t’u la, nafa b’u la kosɔbɛ ale ni Jehova ɲɛɛ kɔrɔ (Zan 5:19; Eburuw 1:3). Barokun nin na, an bena a ye: 1) Yezu ye mɔgɔw dɛmɛ cogo min na u k’a faamu ko nafa b’u la ani 2) Cogo min na an be se ka la a la ko nafa b’an na kosɔbɛ Jehova ɲɛɛ kɔrɔ.—Aze 2:7.

YEZU YE MƆGƆW DƐMƐ COGO MIN NA K’A FAAMU KO NAFA B’U LA

3. Galileka minw nana dɛmɛ ɲini Yezu fɛ, a y’u minɛ cogo di?

³ Yezu tun be waajuli kɛra Galile tuma min na, mɔgɔw bɔra yɔrɔ caaman na walisa ka n’a lamɛn ani a k’u kɛnɛya. Yezu y’a kɔrɔsi ko “u sigɛnnin tun lo, u dusu kasinin tun lo fana. U tun be i ko sagaw, dɛndɛbaga te minw na.” (Mat. 9:36; kunnafoni wɛrɛw lajɛ Traduction du monde nouveau kɔnɔ). U ka diinan ɲɛmɔgɔw tun b’u jati mɔgɔ kolɔnbaliw ye, u tun b’u weele yɛrɛ ko mɔgɔ “danganinw” (Zan 7:47-49; kunnafoni wɛrɛ lajɛ Traduction du monde nouveau kɔnɔ). Nga, Yezu ye danbe la u kan. Cogo di do? A y’a ka wagati ta k’u kalan ani k’u ka banabagatɔw kɛnɛya (Mat. 9:35). Ka fara o kan, a tun b’a fɛ ka mɔgɔ caaman dɛmɛ minkɛ, a ye waajuli kɛcogo degi a ka cidenw na ani a ye see d’u ma ka banabagatɔw kɛnɛya.—Mat. 10:5-8.

4. Yezu y’a lamɛnbaga majigininw minɛ cogo min na, an be kalan juman lo sɔrɔ o la?

⁴ Yezu y’a lamɛnbagaw minɛ ni bonya ye ani a ye danbe la u kan. O cogo la, a y’a yira ko mɔgɔw ka teli ka minw mafiɲɛya, nafa b’u la ale n’a Faa ɲɛɛ kɔrɔ. I be Jehova sago kɛra, nga yala i lanin tɛ a la ko nafa b’i la wa? N’o lo, Yezu y’o mɔgɔw minɛ cogo min na, miiri o la. N’i y’o kɛ, o bena i dɛmɛ k’a faamu ko nafa b’i la kosɔbɛ Jehova ɲɛɛ kɔrɔ.

5. Yezu ye Galileka muso min ye, an be mun lo lɔn a koo la?

⁵ Tiɲɛn lo ko Yezu tun be jamaw kalan, nga a tun b’a mako don mɔgɔ kelen kelen bɛɛ la. Misali la, k’a to waajuli la Galile, a ye muso dɔ ye jolibɔn bana tun be min tɔɔrɔla kabi saan 12 (Mariki 5:25). Ka kɛɲɛ ni sariya ye, a tun nɔgɔnin lo a ka bana kosɔn. O kama, mɔgɔ o mɔgɔ tun mana maga a la, o tigi fana tun be kɛ mɔgɔ nɔgɔnin ye. O la, n’a sɔrɔ a tun b’a ka wagati fanba kɛ a kelen na. Ka fara o kan, a tun tɛ se ka fara tɔɔw kan ka Jehova bato ani ka ɲɛnagwɛkow kɛ n’u ye (Lev. 15:19, 25). Siga t’a la, o bana dɔrɔn lo tun t’o muso tɔɔrɔla. N’a sɔrɔ a tun b’a miiri fana ko nafa t’ale la.—Mariki 5:26.

6. Jolibɔn bana tun be muso min na, a kɛnɛyara cogo di?

⁶ O muso tun b’a fɛ Yezu k’ale kɛnɛya sabu a tun tɔɔrɔnin lo kosɔbɛ. Nga, a ma sɔn ka gwɛrɛ a la k’o deli a fɛ. Mun na do? N’a sɔrɔ maloya tun b’a la a ka bana kosɔn. Wala a tun be siranna ko Yezu bena sɔngɔ ale kun na sabu a donna jama cɛma k’a sɔrɔ a tun nɔgɔnin lo. O la, a magara Yezu ka fani dakun dɔrɔn na, ani a tun lanin b’a la k’o dama bena a to ale be kɛnɛya (Mariki 5:27, 28). A ka limaniya kosɔn, a kɛnɛyara. O kɔ, Yezu ye jama ɲininga ko jɔn lo magara ale la, ani o muso y’a fɔ ko ale lo. Yezu y’a minɛ cogo di?

7. Muso min tun tɔɔrɔnin kosɔbɛ, Yezu y’a minɛ cogo di? (Mariki 5:34).

⁷ Yezu y’o muso minɛ ni ɲumanya ani bonya ye. Yezu y’a kɔrɔsi ko a tun “be yɛrɛyɛrɛla siranya bolo.” (Mariki 5:33). Komi Yezu tun b’a janto a dusukunnakow la, a kumana a fɛ walisa k’a hakili sigi. A yɛrɛ y’a weele ko a “denmuso.” O kumaden fɛ, Yezu y’a yira ko a b’o muso bonya, nga o dɔrɔn tɛ. A y’a yira fana ko a b’a minɛ ni ɲumanya ye ani ko a b’a kanu (Mariki 5:34 kalan).a Bibulu kɔnɔ, yan dɔrɔn le Yezu ye muso weele ko “ne denmuso.” N’a sɔrɔ a y’o kumaden fɔ sabu a y’a ye k’o muso tun sirannin lo kosɔbɛ. Miiri k’a filɛ o muso lafiyara cogo min na! Ni Yezu tun m’a hakili sigi n’o kumaw ye, n’a sɔrɔ a tun bena kɛnɛya, nga a tun bena to k’a yɛrɛ jalaki. O la Yezu tun t’a fɛ k’o muso kɛnɛya le dɔrɔn. A tun b’a fɛ a k’a lɔn ko a ye Faa kanutigi dɔ denmuso lo ye.

8. Balimamuso Maria ye gwɛlɛya jumanw lo sɔrɔ?

⁸ Bi bi nin na fana, Jehova sagokɛla dɔw tɔɔrɔnin lo bana dɔ bolo min b’a to u b’a miiri ko nafa t’u la. Mariab ye kudayi piyɔniye ye ani a be bɔ Berezil jamana na. Seenw ni numanbolo t’a fɛ kabi a wolotuma. A ko: “N’ ka klasidenw tun be to ka n’ lɔgɔbɔ n’ ka farikolodɛsɛ kosɔn. U tun be tɔgɔ dɔw la n’ na walisa ka n’ dɔgɔya. Hali n’ somɔgɔ dɔw tun be n’ mafiɲɛya.”

9. Mun lo ye Maria dɛmɛ a y’a faamu ko nafa b’ale la Jehova ɲɛɛ kɔrɔ?

⁹ Mun lo ye Maria dɛmɛ? A kɛra Jehova Seere ye tuma min na, a kerecɛnɲɔgɔnw y’a dɛmɛ a k’a yɛrɛ jati i ko Jehova b’a jati cogo min na. A ko: “Balima caaman lo ye n’ dɛmɛ fɔɔ n’ tɛ se k’u bɛɛ tɔgɔ sɛbɛ ka ban! N’ be Jehova fo ni n’ dusu bɛɛ ye sabu a ye denbaya ɲuman dɔ di n’ ma Alako ta fan fɛ.” Maria kerecɛnɲɔgɔnw y’a dɛmɛ a y’a faamu ko nafa b’a la Ala ɲɛɛ kɔrɔ.

10. Kunko jumanw lo tun be Magadala Mariyamu kan? (jaaw lajɛ fana).

¹⁰ An k’a filɛ cogo min na Yezu ye mɔgɔ wɛrɛ dɛmɛ k’a faamu ko nafa b’a la Jehova ɲɛɛ kɔrɔ. O ye Magadala Mariyamu lo ye. Jina wolonfila lo tun b’a kɔ! (Luka 8:2). Komi jinaw tun b’a kɔ, n’a sɔrɔ a tun be koo dɔw kɛ minw tun b’a to mɔgɔw tun tɛ sɔn ka gwɛrɛ a la. N’a sɔrɔ o wagati la, a tun b’a jati ko a b’a kelen na, dɛmɛbaga t’a la ani a tun sirannin lo. Yezu ye jinaw gwɛn ka bɔ o muso la ani a kɛra Yezu ka kalanden kantigi dɔ ye. Yezu ye Magadala Mariyamu dɛmɛ cogo wɛrɛ juman lo la walisa a k’a faamu ko a koo ka gwɛlɛ Jehova ma?

11. Yezu y’a yira Magadala Mariyamu na cogo di ko a koo ka gwɛlɛ Ala ma? (jaaw lajɛ fana).

¹¹ Yezu y’a ɲini Magadala Mariyamu fɛ a k’ale n’a ka kalandenw bila sira u ka waajuli baara la.c O la, ni Yezu tun be mɔgɔw kalanna a tun be to k’o kalanw lamɛn. Ka fara o kan, loon min na Yezu suu kununa, a y’a yɛrɛ yira Magadala Mariyamu na o loon bɛɛ la. Yezu kɔnna ka kuma n’a ka kalanden minw ye a suu kununin kɔ, o muso y’u dɔ ye. Yezu y’a ci yɛrɛ ko a taga a fɔ a ka cidenw ye ko ale suu kununa. Tiɲɛn na, o b’a yira ko Magadala Mariyamu koo ka gwɛlɛ Jehova ma kosɔbɛ!—Zan 20:11-18.

12. Mun na Lidia tun b’a miiri ko mɔgɔ si tɛ se k’ale kanu?

¹² I ko Magadala Mariyamu, bi bi nin na, mɔgɔ caaman b’a miiri ko u koo tɛ se ka diya mɔgɔ si ye. Balimamuso Lidia be bɔ Ɛsipaɲi jamana na. A ko tuma min na a bamuso tun kɔnɔman lo ale la, a tun b’a fɛ k’a kɔnɔ tiɲɛ. A denmisɛn tuma na a bamuso tun t’a janto a la ani a tun be to k’a nɛni. Lidia ko: “N’ ka laɲinita tun ye ka n’ koo diya tɔɔw ye. Nga komi n’ bamuso y’a kɛ n’ tun b’a miiri ko n’ ye mɔgɔ jugu ye, n’ tun sirannin lo ko mɔgɔ si tɛna n’ kanu.”

13. Mun lo ye Lidia dɛmɛ a lara a la ko nafa b’ale la Jehova ɲɛɛ kɔrɔ?

¹³ A laban, Lidia nana tiɲɛn sira lɔn. Delili, Bibulu kalan, ani a kerecɛnɲɔgɔnw ka kuma ɲumanw n’u ka kɛwale ɲumanw y’a dɛmɛ k’a faamu ko nafa b’ale la Jehova ɲɛɛ kɔrɔ. A ko: “N’ cɛɛ be to k’a fɔ n’ ye ko a be n’ kanu kosɔbɛ. A be to ka n’ hakili jigi n’ jogo ɲumanw na. N’ teri kanulenw fana be to k’o ɲɔgɔn lo kɛ.” I be mɔgɔ dɔ lɔn min mako be dɛmɛ na walisa k’a lɔn ko nafa b’a la kosɔbɛ Jehova ɲɛɛ kɔrɔ wa?

JEHOVA B’AN JATI COGO MIN NA AN K’AN YƐRƐ JATI TEN

14. Jehova b’an jati cogo min na, 1 Samuyɛli 16:7 b’an dɛmɛ cogo di k’o faamu? (koorilen nin fana lajɛ: “Mun na Jehova sagokɛlaw koo ka gwɛlɛ a ma?”)

¹⁴ Duniɲamɔgɔw b’i jati cogo min na, a to i hakili la ko Jehova t’i jati o cogo la (1 Samuyɛli 16:7 kalan). An ye lakɔlikalan min kɛ, an sawura ani an lɔyɔrɔ ye min ye, Jehova tɛ basigi o lo kan k’a jati ko nafa b’an na (Ezayi 55:8, 9). O la, sanni i k’i yɛrɛ jati i ko duniɲamɔgɔw b’i jati cogo min na, i yɛrɛ jati i ko Jehova b’i jati cogo min na. Bibulu be kuma mɔgɔ dɔw koo la i n’a fɔ Eli, Nawomi, ani Anɛ minw tun b’a miiri wagati dɔ la ko nafa t’u la. I be se k’u ka maana kalan ani k’a filɛ Jehova y’a yira u la cogo minw na ko a b’u kanu kosɔbɛ. Ka fara o kan, i be se ka kunnafoni dɔw sɔrɔ an ka gafew kɔnɔ minw bena i dɛmɛ ka la a la ko nafa b’i la.d

15. Mun na Daniyɛli “koo diyara Ala ye”? (Daniyɛli 9:23).

¹⁵ La a la ko i ka kantigiya kosɔn, i koo ka gwɛlɛ Jehova ma. N’a sɔrɔ tuma min na kira Daniyɛli sanda tun be gwɛrɛla saan kɛmɛ na, a tun sɛgɛnnin lo kosɔbɛ ani a fari tun fagara (Dan. 9:20, 21, NW). Jehova y’a jija cogo di? A ye mɛlɛkɛ Gabiriyɛli ci ko a ka taga Daniyɛli hakili jigi ko a “koo diyara Ala ye” ani ko a y’a ka delili lamɛn (Daniyɛli 9:23 kalan). Mun na Daniyɛli koo tun ko gwɛlɛ Ala ma? A tun be ni jogo ɲuman caaman ye. Misali la, tilenninya tun ka di a ye ani a tun ye mɔgɔ kantigi ye (Ezek. 14:14). Jehova y’a to u y’a ka koo sɛbɛ Bibulu kɔnɔ walisa k’an jija (Ɔrɔm. 15:4). Jehova b’ele fana ka deliliw lamɛn. I koo ka gwɛlɛ a ma sabu tilenninya ka di i ye ani i be baara kɛra a ye kantigiya la.—Mise 6:8; Eburuw 6:10.

16. Mun lo be se k’i dɛmɛ ka Jehova jati i Faa kanutigi ye?

¹⁶ Jehova jati i Faa kanutigi ye. Jehova b’a fɛ k’i dɛmɛ le. A t’a fɛ k’i jalaki (Zab. 130:3; Mat. 7:11; Luka 12:6, 7). Mɔgɔ minw b’a miiri ko nafa t’olu la, u caaman kɛtɔ ka miiri o kumaw na, o y’u dɛmɛ. Misali la, balimamuso Micheline be bɔ Ɛsipaɲi. Saan caaman kɔnɔ, a cɛɛ tun be to ka kuma jugu fɔ a ma ani k’a mafiɲɛya. O kama, a tun b’a miiri ko nafa t’ale la. A ko: “N’ mana a miiri ko nafa tɛ n’ na, n’ be miiri ka n’ yɛrɛ ye Jehova bolo, a b’a jantora n’ na ni kanuya ye ani ka n’ latanga.” (Zab. 28:9). Balimamuso Laurentine be bɔ Afirikidisidi, a b’a to a hakili la tuma bɛɛ ko: “Ni Jehova ye n’ sama ni ɲumanya ye ka na ale ma kanuya juruw barika la, ka n’ dɛmɛ n’ magwɛrɛnin tora a la o saanw bɛɛ la, ani ka tɛmɛ n’ fɛ yɛrɛ ka mɔgɔ wɛrɛw kalan, siga t’a la ko a b’a jati ko nafa be n’ na.”—Oze 11:4.

17. Mun lo be se k’i dɛmɛ i ka la a la ko Jehova b’i kanu? (Zaburuw 5:13; jaa lajɛ fana).

¹⁷ La a la ko i koo ka di Jehova ye (Zaburuw 5:13 kalan). Dawuda ye Jehova ka kanuya suma ni “nigɛkunbɛnnan” dɔ ye min be mɔgɔ tilenninw latanga. N’i lanin b’a la ko i koo ka di Jehova ye ani ko a b’i latangara, o bena i dɛmɛ i kana sigasiga tugun ko nafa b’i la. I be se k’a lɔn cogo di ko i koo ka di Jehova ye? I ko an y’a ye cogo min na, Jehova b’i hakili sigi ko i koo ka di a ye a ka Kuma sababu fɛ. Ka fara o kan, a be tɛmɛ diinan mɔgɔkɔrɔw, i teriw ani i kerecɛnɲɔgɔnw fɛ k’i hakili sigi ko i koo ka gwɛlɛ a ma. O jijali kumaw ka ɲi ka mun lo kɛ i la?

18. Mun na i ka ɲi ka la tɔɔw ka tandoli wala u ka jijali kumaw na?

¹⁸ I koo ka di minw ye ani u b’i lɔn ka ɲɛ, n’olu ye jijali kumaw fɔ i ye k’i tando, kana ban o la. A to i hakili la ko n’a sɔrɔ Jehova be tɛmɛ o mɔgɔw fɛ k’i dɛmɛ walisa i k’a faamu ko a b’i kanu. An kɔnna ka Micheline min kofɔ, ale ko: “Dɔɔni dɔɔni, n’ y’a daminɛ ka la tɔɔw ka tandoli kumaw na. O man nɔgɔ n’ ma, nga n’ b’a lɔn ko Jehova b’o lo ɲini n’ fɛ.” Diinan mɔgɔkɔrɔw ye Micheline dɛmɛ kosɔbɛ walisa a k’a faamu ko Jehova b’a kanu. Sisan, a ye piyɔniye ye ani a be dɛmɛ donna Betɛli baara la.

19. Mun na i be se ka la a la ko i koo ka gwɛlɛ Ala ma?

¹⁹ Yezu b’an hakili jigi ni ɲumanya ye ko an koo ka gwɛlɛ an sankolola Faa ma kosɔbɛ (Luka 12:24). O la, an be se ka la a la tiɲɛn na ko nafa b’an na Jehova ɲɛɛ kɔrɔ. An kana ɲinɛ o kɔ abada! An k’an seko bɛɛ kɛ k’a yira tɔɔw la ko nafa b’u la Jehova ɲɛɛ kɔrɔ!