Koo bɛɛ ka kɛ “cogo bɛnnen ni cogo tilennen na”

¹ Walisa tile saba ka lajɛnba ka ɲɛ, fɔɔ mɔgɔw ka bolo di ɲɔgɔn ma ka jijali caaman kɛ. Lajɛnba ka koow ɲɛnabɔbagaw jɛkulu be yɔrɔ bɛnnen ɲini ka bila. U fana be siyɔrɔw ɲini ka bila kafodenw ye. Bɛɛ kelen kelen ani denbayaw be labɛn kɛ u ka tagama n’u ka siyɔrɔ kama. Walisa lajɛnba ka ɲɛ, baara sifa caaman waajibiyalen be yen. Kɔngeregasiyɔnw be jijali kɛ ka mɔgɔw labɛn minw b’u yɛrɛ di k’o baara kɛ gwansan. An ka laɲinita ye ko Koo bɛɛ ka kɛ “cogo bɛnnen na ani cogo tilennen na.” —1 Kɔr. 14:40, NW.

² I kɛtɔ ka jɛn ni lajɛnba ka koow ɲɛnabɔbagaw ye ka koow labɛn ni jijali ye, a to i hakili la ko lajɛnba labɛnko be wagati caaman ta: Kalow, wala saanw yɛrɛ tuma dɔw la. Balimacɛ kɛmɛ caaman be wagati caaman ta ka koo dɔw labɛn i n’a fɔ: Ka lajɛn kɛyɔrɔ maminɛ ka bila, ka minanw lajɛn, ani ka fubaarakɛlaw ɲini. Ka kɔn ka koow kɛ o cogo la, o be bɛɛ nafa. An be se ka dɛmɛ don cogo juman na?

³ Labɛn minw kɛra siyɔrɔ kama, o sira tagama: Waajibi lo an bɛɛ ka lajɛnba ka labɛnw sira tagama. O ɲɛsinna siyɔrɔko yɛrɛ yɛrɛ ma. Lajɛnba o lajɛnba wagati la, an mako be siyɔrɔ kɛmɛ caaman na. Wari caaman tɛ balima caamanba fɛ minkɛ, u mako be siyɔrɔw la minw sɔngɔ ka nɔgɔ. Jijalibaw kɛra walisa ka boonw sɔrɔ minw sɔngɔ ka di kosɔbɛ. Kanuya fɛ, an ka kan ka miiri mɔgɔ wɛrɛw ka makow la, an ‘kana miiri an yɛrɛ ka koow la dɔrɔn.’ —Filip. 2:4.

⁴ An kɛtɔ ka siyɔrɔ ɲini lajɛnba kama, an ka Sosiyete ka cikan sira tagama ni kantigiya ye. O cogo la, bɛɛ bena tɔnɔ sɔrɔ. O cikan mafiɲɛli be na ni gwɛlɛya gwansan ye. Ɲɛyirali fɛ, ni boon dɔ maminɛna ka bila ani o maminɛli nana lasa wagati laban na, o be balima wɛrɛ tɔɲɔ sabu o y’a bali k’o boon maminɛ ka bila. O be se ka balimaw waajibiya ka tagama jan kɛ, wala ka sɔn siyɔrɔ dɔ ma min man fisa. Tiɲɛn na, a ka fisa an ka kɛ kantigi ye, an k’a to an ka “ɔnhɔn ka kɛ ɔnhɔn ye”! (Mat. 5:37, NW ). Minw bena jigi balima dɔw fɛ, olu fana ka kan k’o ladili kelen tagama.

⁵ Cogoya kunbaba dɔw walisa ka jɛn ka koow kɛ: Labɛn minw kɛra siyɔrɔ kama lajɛnba la, an be se k’u sira tagama cogo nɔgɔman dɔw la. (1) I ka siyɔrɔ ɲinisɛbɛ dafa koɲuman. (2) Mɔgɔ minw daa sɛbɛra siyɔrɔ ɲinisɛbɛ kan, kana o hakɛ tɛmɛ. (3) Musakaw minw sɔrɔla jii ni kuran koo la, i k’o tilan n’i jatigiw ye. (4) Ni gasi dɔ sɔrɔla i siyɔrɔ la, i ka lajɛnba koow ɲɛnabɔbagaw jɛkulu lalɔnniya joona. (5) N’i ka siyɔrɔ la danfara sigira balimacɛw ni balimamusow ka sibonw cɛ, i ka bonya la lajɛnba ka koow ɲɛnabɔbagaw jɛkulu kan i kɛtɔ k’o ci sira tagama. An ka jijaliba kɛ k’an janto mɔgɔ wɛrɛw ka kelenya na, ani ka koo kɛ cogo bɛnnen na tuma bɛɛ.

⁶ Komi an ye Jehova ka baarakɛlaw ye, cogoya dira an ma k’a ka jogow yira an ka kɛwalew bɛɛ la. An k’o kɛ tuma min na an b’an yɛrɛ labɛnna, wala n’an be tagara lajɛnbaw la, Ala tɔgɔ lara minw kan. I hakili to a la ko “Ala ma kɛ koferekenin tigi ye, nga hɛrɛtigi lo.” (1 Kɔr. 14:33, ABBF-ABU 1999). O jogo min be bɔ Jehova la, an k’an cɛsiri ka koow kɛ walisa an filɛbagaw k’o ye an tagamacogo fɛ, tuma min na an be labɛn kɛra tile saba lajɛnba kama, wala n’an be taga yen. O lajɛnba kuun ko “Ala ka Kuma karamɔgɔw” [“enseignants de la parole de Dieu” ]. An k’a to mɔgɔ kɔnɔgwɛw ka bɔ a kala ma ko jama minw lajɛnna Jehova tɔgɔ la, u be koow bɛɛ kɛ “cogo bɛnnen ni cogo tilen na.”—Zab. 68:27.