Jehova Seerew ka tile saba lajɛnba, saan 2008 kɔnɔ
1 Heburu minw kɛra kerecɛnw ye, ciden Pol y’u jija ko u ka ɲɔgɔnw lajɛn ani ka ɲɔgɔnw jaa gwɛlɛya “janko” u ɲɛɛ b’a la ko Jehova ka loon surunyana (Heb. 10:24, 25). Koo caaman b’a yira ko Pol ye “don” min kofɔ, a surunyana kosɔbɛ! O kama an kɔrɔtɔlen be ka sababuw sɔrɔ ka lajɛn n’an balimaw ye walisa ka kalan Ala fɛ: kalan min be se k’an ɲɛminɛ nin “laban donw” na minw be juguyara ka taga (2 Tim. 3:1). O sababu bena di an ma tile saba lajɛnbaw la saan 2008 kɔnɔ.
2 An ka kɛ lajɛnba la tile saba kelen-kelen bɛɛ kɔnɔ: An b’i jija i ka kɛ lajɛnba la tile saba kelen-kelen bɛɛ kɔnɔ. N’an tɛ “ɲɔgɔn lajɛli dabila”, an tɛna fɔn hakilimaya domuni na min nafa ka bon kosɔbɛ (Heb. 10:25). I k’a daminɛ k’i yɛrɛ labɛn joona. I ka kɔn ka lajɛnba kofɔ i ka patɔrɔn ye walisa a ka se ka yɛlɛmani dɔw kɛ baara koo la o wagati la. N’i deenw bena kɛ lakɔli la lajɛnba wagati la, i ka kuma u ka karamɔgɔw fɛ o koo la. I k’a ɲɛfɔ u ye ko lajɛnba ye aw ka batoli koɲɛ dɔ ye, a be kɛ saan o saan. I ka la a la ko n’i b’i jija ka Masayakow kɛ i ɲɛnako fɔlɔ ye, Jehova bena i ka jijali kɛli duga.—Mat. 6:33.
3 I ka mɔgɔ wɛrɛw dɛmɛ u fana ka na lajɛnba la: Pol y’a balimaw jija fana ko u ka u “janto ɲɔgɔn na” (Heb. 10:24). I ka kitabukalan jɛnkulu kɔnɔ, yala balima dɔw mako be dɛmɛ la ka taga lajɛnba la wa? Yala i be se k’i ka Bibulu kalandenw dɛmɛ u ka kɛ lajɛnba la n’i ye, hali n’u be se ka na tile kelen dɔrɔn kɔnɔ wa? I kɛtɔ ka lajɛnba kofɔ i somɔgɔ dannabaliw ye, i k’u weele ka na fana n’i ye. N’i be i jija k’o kɛ ni kanuya ye, i bena dugaw sɔrɔ i jigi tun tɛ minw na.
4 Kunnafoniw sɔrɔcogo: Saan o saan mɔgɔ caaman be telefɔni ci Betɛli la ka ɲiningali kɛ ko lajɛnbaw bena kɛ min ani tuma juman. O weeleli fanba be bɔ balimaw lo fɛ, u minw y’o kunnafoni sɔrɔ ka ban. Sanni aw ka Betɛli weele, an b’a ɲini aw fɛ aw ka filɛri kɛ fɔlɔ La Tour de Garde kɔnɔ, saan 2008 marisikalo tile fɔlɔ ta. Ka fara o kan, Betɛli be lɛtɛrɛw ci kafow bɛɛ ma k’u ka lajɛnba kɛyɔrɔ n’a loonw fɔ u ye. Kafo mana o lɛtɛrɛ sɔrɔ, a ka kan k’a kalan waajuliko lajɛn nata la ani k’a nɔrɔ ka bila kunnafoniw tablo kan.
5 N’i bena taga lajɛnba wɛrɛ la, min tɛ aw ka kafo ta ye, i be se ka kunnafoniw sɔrɔ sibon koo la: I ka lɛtɛrɛ ci o lajɛnba ka koow ɲɛnabɔbagaw jɛnkulu ma. Kafo ka sekeretɛri be se ka ɲɛsin o jɛnkuluden dɔ ma k’u ka ladɛrɛsi sɔrɔ. Walisa u ka se k’i jaabi, i k’i janto k’i tɔgɔ n’i ka kafo ladɛrɛsi sɛbɛ lɛtɛrɛ foroko dɔ kan ani k’o fana ci u ma. Ni lajɛnba wɛrɛw fana bena kɛ o dugu kɔnɔ, i k’a yira ile bena kɛ lajɛnba min na, ani i k’o loonw yira (i n’a fɔ: Bobo-Dioulasso, Français 2-4 janvier 2009).
6 Minw be ni mako kɛrɛnkɛrɛnnin ye: Ni weleweledala dɔ be dɛmɛ fɛ ka sibon sɔrɔ, waajuliko ɲɛnabɔbagaw jɛnkulu ka kan k’a latigɛ n’a be sarati dafa ani sibon ɲinisɛbɛ (Demande de chambre pour cas particuliers) dɔ be se ka di a ma. Sanni k’o sɛbɛ ci sibon koo ɲɛnabɔlaw ma, u ka kan k’a sɛgɛsɛgɛ ka filɛ n’a bɛnna cikanw ma minw be sɔrɔ o sɛbɛ yɛrɛ kɔɔ kan ani lɛtɛrɛ kɔnɔ min cira diinan mɔgɔkɔrɔw ma.
7 Ka sibon mara ka bila lotɛli la: Ni lotɛli dɔw sugandira k’u tɔgɔw sɛbɛ lisi dɔ kan, ani o lisi labilanen be aw ka mara kɔnɔ, u bena kɔn k’a bila kunnafoni tablo kan kafo kɔnɔ. N’i b’a fɛ ka sibon mara ka bila lotɛli la, i ka koorilen nin lajɛ fɔlɔ: “Cikanw” ani “Sibon be mara ka bila lotɛli la cogo min na.” Sanni i ka sɔn sɔngɔ dɔ la min ka ca ka tɛmɛ lisi ta kan, wala sanni i ka lotɛli dɔ weele min tɛ lisi kan, i ka sabari ka kɔnɔni kɛ kafo ka lisi kura sɔrɔ.
8 Kɛwale ɲumanw: N’an be Jehova ka cikanw bato ka ɲɔgɔnw lajɛn batoli kama, o bena ‘an yɛrɛ nafa.’ Ka tɛmɛ o bɛɛ kan, o be sababu di an ma ka nɔɔrɔ la Jehova tɔgɔ kan (Es. 48:17). Tile saba lajɛnbaw la, mɔgɔ caaman ɲɛɛ be an ka “kɛwale ɲumanw” na. O ye u dɔw lasun k’u ka fɛtaw fɔ an ye (1 Tim. 5:25). Dugu dɔ kɔnɔ, an ka tile saba lajɛnbaw delila ka kɛ kabini saan caaman. Lotɛlitigi dɔ y’a fɔ ko: “Mɔgɔ caaman be kumana Jehova Seerew koo la dugu kɔnɔ ani aw ka lajɛnbaw bena min ɲɛ an ye. An y’a lɔn ko aw ka mɔgɔw ye lamɛri ka ɲɛnagwɛ kɛyɔrɔ saniya ka ɲɛ. An fana y’a ye ko aw ye bolifɛnw bilayɔrɔ saniya. An dusu ka di ka aw ka mɔgɔw sɔrɔ an fɛ tilemana wagati la. An jigi b’a la ko an bena to ɲɔgɔn fɛ saan nataw la.” Lotɛlitigi wɛrɛ y’a lakali ko u ye gwɛlɛya sɔrɔ ni jɛnkulu wɛrɛw ni ɲɛnagwɛkɛla dɔw ye. O kɔ, a ye balimaw tando ko u muɲuna ka lotɛli ka cikanw sira tagama. Ani a y’a fɔ ko: “An b’a fɛ an ka lonanw bɛɛ ka kɛ komi Jehova Seerew!” An balimaw ka tagamacogo lo nana n’o tandoliw n’a ɲɔgɔnna sifa caaman ye. Siga t’a la, u be an ka Ala Jehova dusu diya dɛ!
9 Yesu y’a fɔ ko “kuma minw bɛɛ bɛ bɔ Ala da la”, a kɔrɔtalen lo kosɔbɛ an k’u lamɛn (Mat. 4:4). Saan o saan, Jehova be tɛmɛ “Jɔnkɛ dannamɔgɔ hakiliman” fɛ ka hakilimaya domuni di an ma lajɛnbaw la “waati latigɛlen na” (Mat. 24:45). Baara caaman kɛra walisa k’o domuniba labɛn ani k’a di an ma. Jehova b’a janto an na ni kanuya ye dɛ! An k’a waleɲuman lɔn an kɛtɔ ka kɛ lajɛnba la ani ka kalan kelen-kelen bɛɛ lamɛn koɲuman.
[Study Questions]
1. (a) Pol ye ladili min di Heburu kerecɛnw ma, mun na kɔrɔtɔba b’a la an k’o sira tagama bi tile la? (Heburuw 10:24, 25 kalan.) (b) An bena sababu juman sɔrɔ ka Pol ka ladili sira tagama?
2. (a) Mun na a kɔrɔtalen lo kosɔbɛ an ka kɛ lajɛnba la tile saba kelen-kelen bɛɛ kɔnɔ? (b) An ka kan k’a daminɛ k’an yɛrɛ labɛn cogo di?
3. Cogo juman na an be se k’a yira ko an b’an janto mɔgɔ wɛrɛw la?
4. An be se ka kunnafoniw sɔrɔ cogo di lajɛnbaw kɛyɔrɔ n’u loonw koo la?
5. N’an mako be kunnafoniw la sibon kama lajɛnba dɔ la min be dan na n’an ka kafo ta ye, an ka kan ka mun lo kɛ?
6. U b’an hakili jigi koo jumanw lo la ka ɲɛsin sibon ɲinisɛbɛ koo la?
7. Labɛn minw kɛra sibon kama, an be se k’u sira tagama cogo di? (A filɛ koorilen nin kɔnɔ: “Cikanw.”)
8. (a) An be se ka nɔɔrɔ la Jehova kan cogo di lajɛnba sen fɛ? (b) Lotɛlitigiw ye lakalita jumanw kɛ an balimaw ka tagamacogo ɲuman kosɔn?
9. Matiyu 4:4 b’a yira ka gwɛ cogo di ko a kɔrɔtalen lo an ka kalan kelen-kelen bɛɛ lamɛn koɲuman?
[Box on page 4]
Porogramu lɛriw
Jumalon ni samedi
9h20 - 16h55
Dimansi
9h20 - 16h00
[Box on page 5]
Cikanw:
◼ Aw kana tɛmɛ ɛntɛrɛnɛti fɛ ka sibon mara ka bila sabu an tɛ baara kɛ n’o fɛɛrɛ ye.
◼ Lotɛli minw tɔgɔ be sɔrɔ lisi kan, a’ ye olu dɔrɔn ɲini.
◼ Aw kana sɔn sɔngɔ dɔ la min ka ca ka tɛmɛ lisi ta kan.
◼ Mɔgɔ tigitigi min bena la lotɛli boon kɔnɔ, a’ ye sibon mara ka bila ale lo tɔgɔ la.
◼ A’ ye lotɛli ka saratiw bato latangali ta fan fɛ. Baliku daa min dagalen be bonden kelen kɔnɔ ani a sɛbɛnen be lisi kan, aw kana o tɛmɛ.
◼ Aw ye sibon fɔlɔ min mara ka bila, a’ ye to o kan.—Mat. 5:37.
◼ Lotɛli minw tɔgɔ tɛ sɔrɔ lisi kan, aw kana u weele k’u ɲininga n’u ye u ka sibonw sɔngɔ nɔgɔya an ka lajɛnba kosɔn.
◼ Lotɛli minw tɔgɔ be lisi kan, ni aw ye olu BƐƐ weele ka filɛ ani sibon si ma sɔrɔ yen, wala ni aw ye kunko sɔrɔ ni lotɛli dɔ ye, a’ y’a fɔ aw ka kafo sekeretɛri ye. Ale bena ɲɛsin balimaw ma minw be sibon koow ɲɛnabɔ a kɛtɔ ka tɛmɛ lisi sanfɛla kunnafoniw fɛ.
◼ Ni a’ ye aw daa di ani aw b’a fɛ ka aw nali lasa, a’ ye kɔn k’o fɔ joona-joona. A’ ye nimɔrɔ dɔ deli min be seereya kɛ ko aw nali lasara.
Sibon be mara ka bila lotɛli la cogo min na:
1. Walisa ka sibon sɔngɔ nɔgɔmanw lɔn, a’ ye tɛmɛ telefɔni nimɔrɔw fɛ lisi kan ka lotɛliw weele baara kɛwagatiw la.
2. A’ y’a fɔ lotɛli ye ko aw be nana Jehova Seerew ka lajɛnba lo la.
3. A’ y’a fɔ loon min na aw bena na ani loon min na aw bena taga.
4. Ni sibon labilanen tɛ yen, a’ ye lotɛli wɛrɛ weele min kofɔra lisi kan.
5. A’ ye sibon dɔ mara ka bila ani a’ ye nimɔrɔ dɔ deli min be seereya kɛ aw ye.
6. A’ ye tɛmɛ banki karti, sɛki, wala manda fɛ (tile tan kɔnɔ) ka akɔnti dɔ sara. Aw kana wari yɛrɛ-yɛrɛ ci abada. Ni aw ye sɛki wala manda lo ci, a’ y’a nimɔrɔ sɛbɛ akɔnti sɛbɛ ɲɛɛ kan walisa k’o kɛ seereyasɛbɛ ye.