Jehova Seerew ka tile saba lajɛnba, saan 2009 kɔnɔ
1. (a) An bena duga jumanw lo sɔrɔ an kɛtɔ ka na lajɛnba la tile saba bɛɛ kɔnɔ? (b) An ka kan ka labɛn jumanw lo kɛ kabini sisan?
1 An bɛɛ be saan 2009 ka tile saba lajɛnba makɔnɔna ni kɔrɔtɔ ye walisa ka sababu kura sɔrɔ ka ɲɔgɔn lajɛn ni Jehova tandobagaw ye, u minw b’a lɔn k’u ye “faantanw ye Ala ta fan fɛ.” (Mat. 5:3). Komi Jehova ka loon ka surun kosɔbɛ, an be aw kelen-kelen bɛɛ jija aw ka na lajɛnba la tile saba bɛɛ kɔnɔ. O la, aw bena jɛnɲɔgɔnya ɲuman kɛ ni balimaw ye ani ka jijali fana sɔrɔ Alako ta fɛ walisa aw ka sabati limaniya la (Sof. 1:14). A’ y’a to aw ka kalanfaw ani aw ka baarada ɲɛmɔgɔw k’a lɔn ko lajɛnba ye aw ka batoli fanba dɔ ye. A’ ye aw jaa gwɛlɛya ka kɔn ka labɛn kɛ ani ka Jehova ka duga ɲini. Aw be se ka la a la ko a bena aw dɛmɛ.—Es. 50:10.
2. Hali n’u m’an weele lajɛnba dɔw la minw latigɛra jamana caaman kama, an be se k’u diya ɲɔgɔn sɔrɔ cogo di?
2 Lajɛnba minw latigɛra jamana caaman kama: Komi o lajɛnbaw bena kɛ jamanaw ni dugu damanin lo kɔnɔ, minw weelela, olu dɔrɔn lo ka kan ka taga yen. N’an b’o cikan bato, o bena a to mɔgɔw tɛna caya kojugu o yɔrɔw la (1 Kɔr. 14:40; Heb. 13:17). Nka, diya min bena sɔrɔ o lajɛnbaw la o ɲɔgɔnna bena sɔrɔ tile saba lajɛnba caaman wɛrɛw la, sabu misɔndenw ani Betɛlidenw ni minw be baara kɛ jamana wɛrɛ la, olu caaman bena taga lajɛnbaw kɛ u ka jamanaw kɔnɔ.
3. An be se ka kerecɛnya kanuya yira an ka kafoden dɔw la cogo di?
3 Mɔgɔ wɛrɛw dɛmɛ u fana ka taga lajɛnba la: I ka kafo kɔnɔ, yala balima dɔw mako be dɛmɛ na ka taga lajɛnba la wa? N’i b’u dɛmɛ ten o b’a yira ko i tɛ ‘miiri i yɛrɛ ka koow la dɔrɔn, nka i be miiri i mɔgɔɲɔgɔnw koo fana la.’—Fil. 2:4.
4, 5. Ni koo dɔ y’a to i ka kan ka taga lajɛnba dɔ la min be dan na n’i ka kafo ta ye, i ka kan ka mun lo kɛ?
4 Kunnafoniw sɔrɔcogo: Walisa telefɔni kana ci caaman-caaman Betɛli la lajɛnba kɛyɔrɔw n’a loonw koo la, i k’a filɛ fɔlɔ La Tour de Garde kɔnɔ, saan 2009 marisikalo tile fɔlɔ ta. Ka fara o kan, Betɛli ye lɛtɛrɛw ci kafow bɛɛ ma k’u ka lajɛnba kɛyɔrɔ n’a loonw fɔ u ye.
5 N’i bena taga lajɛnba wɛrɛ la, min tɛ aw ka kafo ta ye, i be se ka kunnafoniw sɔrɔ sibon koo la: I ka lɛtɛrɛ ci o lajɛnba ka koow ɲɛnabɔbagaw jɛnkulu ma. Kafo ka sekeretɛri be se ka ɲɛsin o jɛnkulu ma k’u ka ladɛrɛsi sɔrɔ. Walisa u ka se k’i jaabi, i k’i janto k’i tɔgɔ n’i ka kafo ladɛrɛsi sɛbɛ lɛtɛrɛ foroko dɔ kan ani k’o fana ci u ma.
6. N’an jigira an somɔgɔw wala an teriw fɛ, an be se ka koow kɛ ni ɲumanya ani bonya ye cogo di lajɛnba wagati la?
6 Labɛn ɲu-manw kɛ sibon kama: Yɔrɔ caaman na, wariko gwɛlɛya kosɔn a man nɔgɔ denbayaw fɛ ka siyɔrɔ mara ka bila lotɛli la. O kama, an balima caaman be labɛn kɛ walisa ka siyɔrɔ sɔrɔ u teriw wala u somɔgɔw fɛ lajɛnba kɛyɔrɔ gɛrɛ fɛ. N’i b’a fɛ k’o lo kɛ, a ka ɲi i ka kɔn k’i ka jatigiw lasɔmi joona walisa ka la a la ko siyɔrɔ labilanen b’u fɛ. O la, ni lajɛnba be i ko sini, mɔgɔ caaman tɛna jigi jatigi kelen fɛ bonden kelen kɔnɔ. Mɔgɔ minw ka kan ka si bonden kelen kɔnɔ u man kan ka caya kojugu.
7, 8. (a) Koow ka kan ka kɛ cogo di ni weleweledala dɔ be ni mako kɛrɛnkɛrɛnnin ye ani a ye dɛmɛ ɲini siyɔrɔ koo la? (b) An be se ka bɛn ni sibonko ɲɛnabɔbagaw ye cogo di walisa k’o weleweledalaw dɛmɛ?
7 Minw be ni mako kɛrɛnkɛ-rɛnnin ye: Ni weleweledala dɔ be dɛmɛ fɛ ka sibon sɔrɔ, waajuliko ɲɛnabɔbagaw jɛnkulu ka kan k’a latigɛ n’a be sarati dafa ani sibon ɲinisɛbɛ (Demande de chambre pour cas particuliers) dɔ be se ka di a ma. Cikanw minw be sɔrɔ o sɛbɛ yɛrɛ kan ani lɛtɛrɛ kɔnɔ min cira u ma, u ka kan k’u sɛgɛsɛgɛ ka filɛ sanni kafo ka sekeretɛri k’o sɛbɛ ci sibon koo ɲɛnabɔbagaw ma.
8 Mɔgɔ minw sɔnna ka sibonko ɲɛnabɔbagaw jɛnkulu dɛmɛ salon u kɛtɔ ka siyɔrɔ di balimaw ma minw tun ye sibon ɲinisɛbɛ dafa, an b’a fɛ ka olu fo. An mako bena kɛ tugun o yɛrɛ saraka hakili ɲɔgɔn na ɲina (Gal. 6:10). N’i b’a fɛ ko balima dɔw ka jigi i fɛ lajɛnba nata la, i ka kan k’i kaan bɔ sibonko ɲɛnabɔbagaw jɛnkulu ma. N’i nana a ye kɔfɛ ko i tɛna se ka siyɔrɔ di tugun, a ka ɲi i ka kɔn k’a fɔ u ye joona.
9. (a) N’an b’a fɛ ka sibon mara ka bila lotɛli la, o be kɛ cogo di? (b) Hakilijigiko jumanw lo bena an dɛmɛ ka kɛ ni tɔgɔ ɲuman ye lotɛli baarakɛlaw fɛ? (Koorilen nin lajɛ: “Cikanw ka ɲɛsin sibon koo ma.”)
9 Ka sibon mara ka bila lotɛli la: Ni lotɛli dɔw sugandira k’u tɔgɔw sɛbɛ lisi dɔ kan, ani o lisi labilanen be aw ka mara kɔnɔ, u bena kɔn k’a bila kunnafoni tablo kan kafo kɔnɔ. N’i b’a fɛ ka sibon mara ka bila lotɛli la, i ka koorilen nin lajɛ fɔlɔ: “Cikanw ka ɲɛsin sibon koo ma.”
10. An be se ka bɛɛ dɛmɛ cogo di u ka siyɔrɔ sɔrɔ lotɛli la sɔngɔ nɔgɔman na?
10 An b’a lɔn ko dɔw ka diyanye be dan na lotɛli koo la. Nka, n’an ye lotɛli dɔ sugandi min tɛ lisi kan wala an sɔnna sɔngɔ dɔ la min ka ca ni lisi ta ye, an bena koow gwɛlɛya sibonko ɲɛnabɔbagaw fɛ. I mako tɛna kɛ boon min na i kana o mara ka bila. N’i tun ye boon dɔ mara ka bila i kana ban a la tuma min na i ka kan ka na don a kɔnɔ ani k’a ɲini ka taga lotɛli wɛrɛ la. N’i b’o cikan labato i bena bɛɛ kelen-kelen dɛmɛ u ka siyɔrɔ sɔrɔ lotɛli la sɔngɔ nɔgɔman na.—1 Kɔr. 10:24.
11. Mun lo ka kan ka kɛ an ɲɛnako fɔlɔ ye n’an b’an yɛrɛ labɛnna saan 2009 ka tile saba lajɛnba kama ani n’an be taga a la?
11 Kɛwale minw be nɔɔrɔ la Ala kan: An ka Hakili Senu deen yira an ka koow bɛɛ la, k’an janto kosɔbɛ an ka kumacogo n’an ka koo kɛcogow la ni lotɛli baarakɛlaw ani mɔgɔ wɛrɛw ye lajɛnba dugu kɔnɔ. N’an b’o kɛ an bena dɔ fara Jehova sagokɛlaw tɔgɔ ɲuman kan ani an tɛna mɔgɔ wɛrɛw kunnatiɲɛ (1 Kɔr. 10:31; 2 Kɔr. 6:3, 4). I k’a to i nali saan 2009 ka tile saba lajɛnba la ani i tagamacogo ka nɔɔrɔ la Ala kan o cogo la!—1 Piɛrɛ 2:12.
[Picture on page 5]
Porogramu lɛriw:
Lamisalon (O ɲɛsinna lajɛnbaw ma minw latigɛra jamana caaman kama)
13h20 - 16h55
Jumalon ni samedi
9h20 - 16h55
Dimansi
9h20 - 16h00
[Picture on page 6]
Cikanw ka ɲɛsin sibon koo ma:
Lotɛli
◼ Lotɛli minw tɔgɔ be sɔrɔ lisi kan, i ka olu dɔrɔn ɲini.
◼ I kana sɔn sɔngɔ dɔ la min ka ca ka tɛmɛ lisi ta kan.
◼ Mɔgɔ tigitigi min bena la lotɛli boon kɔnɔ, sibon ka mara ka bila ale lo tɔgɔ la.
◼ I ka lotɛli ka saratiw bato latangali ta fan fɛ. Baliku daa min dagalen be bonden kelen kɔnɔ ani a sɛbɛnen be lisi kan, i kana o tɛmɛ.
◼ I ye sibon fɔlɔ min mara ka bila, i ka to o kan.—Mat. 5:37.
◼ Lotɛli minw tɔgɔ tɛ sɔrɔ lisi kan, i kana u weele k’u ɲininga n’u ye u ka sibonw sɔngɔ nɔgɔya an ka lajɛnbaw kosɔn.
◼ Lotɛli minw tɔgɔ be lisi kan, n’i ye olu BƐƐ weele ka filɛ ani sibon si ma sɔrɔ yen, wala n’i ye kunko sɔrɔ ni lotɛli dɔ ye, i k’a fɔ aw ka kafo sekeretɛri ye. Ale bena ɲɛsin balimaw ma minw be sibonkow ɲɛnabɔ a kɛtɔ ka tɛmɛ lisi ka kunnafoniw fɛ.
◼ N’i ye i daa di ani i b’a fɛ ka i nali lasa, i ka kɔn k’o fɔ joona-joona.
◼ Lɔgɔkun fila ka kɔn lajɛnba ɲɛ i ka lotɛli baarakɛlaw weele walisa ka la a la ko sibon marala i ye.
I yɛrɛ be labɛn minw kɛ
◼ I ka bonya la i ka jatigi kan i kɛtɔ ka kɔn k’i nali koo fɔ a ye.
◼ I k’a ɲininga ka filɛ n’a be se ka siyɔrɔko ɲɛnabɔ i ye. I kana a miiri k’o ye waajibiko ye a fɛ.
◼ N’a ye labɛn wɛrɛ kɛ ka ban wala ni a ka bonden tɛ bɛn i ma, i ka fɛɛrɛ wɛrɛ ɲini.
◼ N’a y’a fɔ ko i be se ka jigi ale fɛ, i k’i na loon ni a lɛri fɔ a ye.
◼ A ɲini ka na wagati dɔ la min tɛna i jatigi degun.
◼ N’i ka kan k’i nali lasa, i k’o fɔ i jatigi ye joona-joona.