An k’a to an ka yeelen ka manamana tuma bɛɛ

¹ Yeelen ye mun ye? Daɲɛw gafe dɔ b’a ɲɛfɔ ko fɛɛn lo, “min b’a to mɔgɔ be yeli kɛ.” Nka tiɲɛn na, hali ni lɔnni ye ɲɛtaga sɔrɔ, Jehova ye ɲiningali min lawili Job 38:24 la, hadamaden ma se k’a jaabili lɔn halibi. Yala an be se ka tagama sira kan ni yeelen tɛ yen wa? Ni yeelen tun tɛ yen, an tun tɛna se ka ɲɛnamaya kɛ. Yeli tɛ se ka kɛ ni yeelen tɛ yen. Alako ta fan fɛ, Bibulu b’a fɔ an ye ko “Ala ye yeelen ye” (1 Yuh. 1:5, LAYIDUKURA). Ale min ye “kɛnɛ bɔ an ye”, an ka koow bɛɛ b’ale lo bolo.—Zab. 118:27.

² O koo ye tiɲɛn ye farikolo ta fan fɛ, sanko hakilimaya ta fan fɛ. Ngalon diinan ye mɔgɔ caaman lafili. Alako ta fan fɛ, a y’u to yen dibi la, u be “mɔmɔli kɛ kogo janya nɔfɛ i ko fiyentɔ.” A ka kanuya n’a ka makari kosɔn, minw ɲɔgɔnw tɛ yen, Jehova b’a ka ‘kɛnɛyeelen n’a ka tiɲɛn ci’ (Zab. 43:3). Mɔgɔ miliyɔn caaman minw dusukun ka ɲi, olu y’a laminɛ, ani u bɔra “dibi la ka . . . don a ka kabako kɛnɛ la.”—1 Piɛre 2:9.

³ Yesu Kirista lɔyɔrɔ ka bon o koo la. Ale lo b’o yeelen lase duniɲa ma. A y’a fɔ ko: “Ne kɔni nana diɲɛ la i ko kɛnɛyeelen, walisa mɔgɔ o mɔgɔ dara ne la o kana to dibi la.” ( Yuh. 12:46). A y’a ka wagati n’a ka fanga n’a ka bololafɛnw bɛɛ ta ka mɔgɔw dɛmɛ u ka yeelen sɔrɔ tiɲɛn koo la. A sigilen tun be mara min na, ni yɔrɔ damanin tɛ, a ye dugubaw ni dugu denninw bɛɛ yaala ka waajuli kɛ ani ka mɔgɔw kalan. A ye kɔrɔbɔli fariman kunbɛn faan bɛɛ la. Nka a y’a ka cii dafa ni kantigiya ye ka yeelen bɔ tiɲɛn koo kan yɔrɔ bɛɛ la.

⁴ Yesu timinandiyara ka kalandenw sugandi, k’u dege baara la ani k’u labɛn koo tigitigi dɔ kama. A ye cifɔlen minw di u ma, an b’u sɔrɔ Matiyu 5:14-16 la: “Aw ye kɛnɛyeelen ye diɲɛ la. . . . Aw ka yeelen ka bɔ mɔgɔw ɲɛ na o cogo la, walisa u ka aw ka kɛwale ɲumanw ye ka aw sankolola Fa bonya.” I n’a fɔ Yesu, u kɛra ‘yeelen bɔbagaw ye diɲɛ la.’ (Filip. 2:15). U ɲagalila ka sɔn o kunkanbaara la, ani u y’a kɛ u ka ɲɛnamaya kuun fɔlɔ ye. Wagati dɔɔni o kɔ, Pol sera k’a sɛbɛ ko “Kibaru Duman fɔra sankolo jukɔrɔ dafɛn bɛɛ ye.” Kerecɛnya kafo kuru bɛɛ bɛnnen tun be k’o baaraba kɛ.

⁵ Bi, waleɲumanlɔn ka ɲi ka kɛ an na sabu an be mɔgɔw cɛ minw ye “dibi kɛwalew” dabila (Rom. 13:12, 13). An be se k’an ka waleɲumanlɔn yira an kɛtɔ ka Yesu ni kerecɛn fɔlɔw ladegi. A kɔrɔtalen be, ani kɔrɔtɔ b’a la bi ka tɛmɛ fɔlɔ kan mɔgɔw ka tiɲɛn koo mɛn. Baara wɛrɛ si tɛ yen, kɔrɔtɔ be min na, ani min be kodumanbaw lase mɔgɔw ma ten.

⁶ Cogo juman na an be se ka manamana i ko fitinɛw? Cogoya fɔlɔ ye k’an sen don waajuli baara la. Kafo kelen kelen bɛɛ be labɛn kɛ tuma o tuma walisa ka waajuli kɛ a ka kiinw kɔnɔ. Gafe sifa caamanba labilanen be kaan caaman na. Lajɛnw sababu fɛ kalanba be di mɔgɔw ma, ani kolɔnbagaw be mɔgɔ wɛrɛw dege baara kɛcogo la. Cɛɛw, musow, mɔgɔ kɔrɔw ani hali denmisɛnw be se k’u sen don a la. A ɲininen be kafoden kelen kelen bɛɛ fɛ a k’a sen don a la ka kɛɲɛ n’a seko n’a ka koow cogoya ye. Kafo ka koo bɛɛ labɛnnen be waajuli baara kama. Ani, labɛn kɛra walisa ka bɛɛ dɛmɛ a k’a sen don a la cogo dɔ la. Koo fisaman min be se k’an dɛmɛ an ka yeelen ka to ka manamana, o ye ka jɛn ni kafo ye tuma o tuma.

⁷ An ka yeelen be se ka manamana hali n’an m’an daa yɛlɛ ka kuma yɛrɛ. An ka tagamacogo dɔrɔn fɛ, an be se ka mɔgɔ wɛrɛ hakili sama ka na an kan. Piɛre tun be kumana o lo kan tuma min na a y’a sɛbɛ ko: “Aw ka taama cogo bɛnnen na kafiriw cɛma. O tuma la, . . . u na aw ka kɛwale ɲumanw ye ka Ala tanu olu kosɔn.” (1 Piɛre 2:12). Mɔgɔ caaman be basigi jɛnkuludenw ka tagamacogo kan k’u ka baara wala u ka jɛnkulu kiti tigɛ. Kɔrɔsikɛlaw mana a kɔrɔsi ko mɔgɔ dɔw saniyalen be tagamacogo ta fan fɛ, k’u ye mɔgɔ hɔɔrɔnw ye, hɛɛrɛkɛlaw, ani u be sariya bato, u b’a jati k’o mɔgɔw be dan na ni tɔɔw ye. U fana b’a fɔ k’o mɔgɔw be sariya minw sira tagama, o sariyaw kɔrɔtalen be ka tɛmɛ mɔgɔ caamanba taw kan. O cogo la, furucɛ b’a to a ka yeelen ka manamana n’a b’a muso bonya k’a kanu. Muso b’o kelen lo kɛ n’a b’a furucɛ ka kuntigiya jati. Denmisɛnw b’a yira k’u be dan na n’u be kolo u wolobagaw ye ani u b’u yɛrɛw tanga jatɔya ni dɔrɔgi ma. Baaraden min be sɔbɛ kɛ a ka baara la, n’a ye mɔgɔ hɔɔrɔn ye ani a b’a janto mɔgɔw la, o baaraden koo ka gwɛlɛ kosɔbɛ a tigi ye. An kɛtɔ k’o kerecɛnya jogow kɛ an yɛrɛ la, an b’a to an ka yeelen ka manamana. O cogo la fana, an be mɔgɔ wɛrɛw jagwɛlɛya u k’an ka tagamacogo ladegi.

⁸ Ka waajuli kɛ, o kɔrɔ ko an ye koo minw kalan Ala ka Kuma kɔnɔ, an b’o kofɔ mɔgɔ wɛrɛw ye. An b’o kɛ n’an be kuma tintin kan Masaya Boon na, wala n’an be kuma mɔgɔw fɛ u ka sodaw la. Nka a tɛ dan o cogoya fila dɔrɔn ma. An ka loon o loon baaraw b’a to an be mɔgɔ caaman kunbɛn. An be kuma an ka sigiɲɔgɔnw fɛ siɲɛ joli tile kɔnɔ? Yala mɔgɔw be to ka na an fɛ wa? An be magwɛrɛ mɔgɔ joli la n’an be sanni kɛra, n’an be takisi tara, wala n’an be baara la? N’an ye lakɔliden ye, an be kuma mɔgɔ minw fɛ lakɔliso loon o loon, yala an be se k’u daa jate wa? Sababu minw b’an bolo ka kuma mɔgɔw fɛ, a be komi daan t’u la. A daan ye an ka Bibulu ka miiriya dɔw mara an hakili la, an ka Bibulu ni sɛbɛnin dɔw to an bolo kɔrɔ, ani an k’a bɔ an yɛrɛ la ka baro daminɛ ni mɔgɔw ye ni sababu dɔ dira an ma.—1 Tes. 2:2.

⁹ An be baraji sɔrɔ n’an b’a to an ka yeelen ka manamana: Wale dɔw filɛ nin ye, minw be dusu don mɔgɔ la. U sɔrɔla sen fɛ waajuli sababu fɛ: Muso saan 55 dɔ tun b’a ɲinina ka sira tigɛ. O yɔrɔnin kelen, mobili dɔ tun bena a tanpɔnɛ. Balimamuso dɔ y’a bolo minɛ, ani a y’a sama kɔfɛ k’a fɔ ko: “I ka kɔrɔsili kɛ. Faratiw ka ca an ka wagati nin na!” O kɔ, a y’a ɲɛfɔ fɛɛn min kama faratiw ka ca an ka wagati nin na. Muso y’a ɲininga ko “Yala i ye Jehova Seere dɔ ye wa?” O muso ka badenmuso tun ye an ka gafe dɔ di a ma, ani a tun b’a fɛ ka Jehova Seere dɔ kunbɛn. Nin koo nin kɛra sababu ye a y’u kunbɛn.

¹⁰ Ɲumanya koo dɔ be se ka kɛ sababu fɔlɔ ye an fɛ an be mɔgɔ wɛrɛ dɛmɛ a ka tiɲɛn lɔn. Balimamuso fila dɔw bɔtɔ tun lo waajuli la, u ye musokɔrɔba dɔ kɔrɔsi a be jigira mobili kɔnɔ ani a tun be komi a man kɛnɛ. U lɔra k’a ɲininga n’a mako be dɛmɛ la. A kabakoyara kosɔbɛ k’a ye k’u be u jantora ale la k’a masɔrɔ u tun tɛ ɲɔgɔn lɔn hali dɔɔni yɛrɛ. O kosɔn a y’a gwɛlɛya balimamusow ma u k’a ɲɛfɔ fɛɛn min y’u lasun u k’u janto ale la. O kɛra sababu ye balimamusow ye seereya di a ma. Musokɔrɔba teliyara k’a ka ladɛrɛsi di u ma, ani a y’a ɲini u fɛ ni dusudiya ye u ka na bɔ ale fɛ a ka soo. Bibulukalan daminɛna n’a ye. A ma mɛɛn, a y’a daminɛ ka taga lajɛnw na. Sisan, a be waajuli kɛ ka tiɲɛn kofɔ mɔgɔw ye.

¹¹ An kana ɲinɛ abada ko an ye Jehova Seerew ye! Yesu kɛtɔ k’a fɔ a ka kalandenw ye k’u ye “kɛnɛyeelen ye diɲɛ la”, a tun b’a fɛ k’a fɔ k’u ka kan ka mɔgɔw dɛmɛ u ka nafa sɔrɔ Ala ka Kuma faamuyali la. N’an be Yesu ka ladili sira tagama, cogo juman na an bena an ka waajulibaara jati?

¹² Komi an y’a faamu ko an tɛ se ka kɛ tuma kelen kelen kerecɛnw ye, an ‘banna an yɛrɛw la’, an y’an yɛrɛkun di Ala ma, ani an sɔnna ka tugu Yesu kɔ “tuma bɛɛ” (Mat. 16:24, NW ). An b’a fɛ ka to ka baara kɛ n’an “dusukunw bɛɛ” ye. O kama, an be tɛmɛ sababu bɛɛ fɛ k’an ka yeelen bɔ walisa ka mɔgɔw sɔrɔ, u mana kɛ yɔrɔ o yɔrɔ (Kolos. 3:23, 24). An ka kan ka ban duniɲa ka kɛcogow la. Kisɛya min tun b’an na a daminɛ na, an k’o mara an yɛrɛ la, ani an k’an janto ko an ka yeelen be manamanana ka taga ni fanga ye. N’a sɔrɔ dɔw y’a to u ka kisɛya ka sumaya ani u ka yeelen barika ka dɔgɔya fɔɔ mɔgɔw t’a ye ka ɲɛ tugun yɛrɛ. O ɲɔgɔnna mɔgɔw mako be dɛmɛ la walisa u ka se k’u ka kisɛya sɔrɔ kokura.

¹³ Dɔ wɛrɛw be segi kɔ sabu cira min b’an bolo, a koo man di mɔgɔ caaman ye. Pol y’a fɔ ko an be cira min fɔra Kirista koo la, o ye “nalonmaya ye halakibaatɔw ɲɛ na.” (1 Kɔr. 1:18). Mɔgɔw tun be min o min fɔ a koo la, a mako tun t’o la. Nka a y’a fɔ ni barika ye ko: “Kibaru Duman maloya tɛ ne la fewu.” (Rom. 1:16). Maloya be mɔgɔ min na, a tigi b’a jate ko ale tɛ bɛrɛ ye, ko nafa t’ale la. An be se ka maloya ka kuma duniɲa kuru bɛɛ Masaba koo la cogo di? Ani, a ye labɛn minw kɛ an ka hɛɛrɛ banbali kama, cogo di an be se ka maloya ka kuma o koo la? An kɛtɔ k’o tiɲɛn koow fɔ mɔgɔw ye, an tɛ se ka sɔn k’a miiri ko an tɛ bɛrɛ ye wala ko nafa t’an na. Nka an ka kan ka dusu sɔrɔ k’an seko fisaman kɛ, n’an lanen b’a la ko ‘maloya sababu t’an na.’—2 Tim. 2:15.

¹⁴ Tiɲɛn yeelen be manamanana sisan dugukolo yɔrɔ bɛɛ la. A be ɲɛnamaya banbali jigiya di mɔgɔw ma k’u dusudiya. Ladili min dira an ma ko an k’a to an ka yeelen ka manamana tuma bɛɛ, an k’a yira ko an sɔnna o ladili la n’an dusu bɛɛ ye! N’an y’o kɛ, an bena ɲagali i n’a fɔ Kirista ka kalandenw, minw “ma mɔgɔw kalanni ni Krisita Yesu Kibaru Duman fɔli dabila.”—Kew. 5:42.