“Dumuni . . . waati latigɛlen na”
1. Tile kelen lajɛnba tɛmɛnen ka kalan ye e ni mɔgɔ wɛrɛw dɛmɛ cogo di?
1 An mana tile kelen lajɛnba kalan lamɛn ka ban, an ka teli k’a fɔ ko: “An mako tun be min na, o ye nin yɛrɛ lo ye!” Kafokulu kɔrɔsibaga dɔ y’a fɔ ko tile kelen lajɛnba tɛmɛnen ka kalan lamɛnni kɔ, balima dɔw y’a yira ko u b’a fɛ ka dɔ fara u ka waajuli baara kan. Kɔrɔsibaga tagamakɛla dɔ y’a fɔ ko: “Tile kelen lajɛnba y’an dɛmɛ an k’a faamu ka ɲɛ an be wagati min na an kɛtɔ ka miiri an ka koo latigɛnenw na.” Dɔ wɛrɛ ko: “Weleweledala dɔw y’a fɔ ko a kɛra i ko lakunumɔntɔrɔ min y’u dɛmɛ u ka la a la ko u be cidenya baara kɛ u ɲɛnako fɔlɔ ye.” Tile kelen lajɛnba ye e dɛmɛ cogo di?
2. Kalan jumanw bena di tile kelen lajɛnba nata la?
2 An mako be min na tigitigi, tile kelen lajɛnba nata ka kalan fana bena o lo wasa. A barokun ye “I kalifa Jehova ma” ka kɛɲɛ ni Zaburuw 118:8, 9 (NW ) ye. Kalan minw bena di, u dɔw ye nin ye: “Cogo min na Jehova ye dogoyɔrɔ ye dusukasi wagati la,” “Mɔgɔ wɛrɛw dɛmɛ u ka dogoyɔrɔ sɔrɔ Jehova gamanw kɔrɔ,” “An ka Jehova ladegi an kɛtɔ ka dogoyɔrɔ yira mɔgɔw la,” “Denmisɛnw, a’ ye Jehova kɛ aw jigilayɔrɔ ye!” ani “An ka hakilimaya alijɛnɛ: O ye dogoyɔrɔ ye Jehova ye min labɛn an ye.”
3. N’an tagara lajɛnba la, cogo juman na an be se ka nafa sɔrɔ kalan na bɛrɛbɛrɛ?
3 I be se ka nafa sɔrɔ kalan na cogo min na: Lajɛnba loon mana fɔ i ye, i ka labɛn tigitigi dɔw kɛ walisa ka kɛ yen ani i k’i ka Bibulu kalandenw weele u fana ka na. Walisa an ka kisɛya Masaya baara la ni muɲuli ye, an ye min lamɛn lajɛnba la, fɔɔ an k’o mara (Luka 8:15). O kama, i ka kalan lamɛn koɲuman. Ani, i b’a fɛ ka baara kɛ ni hakilinata jɔnjɔn minw ye i ka ɲɛnamaya kɔnɔ ani i ka cidenya baara la, i k’olu sɛbɛ ka surunya. Lajɛnba tɛmɛnen kɔ, i ka wagati ta ka baro kɛ kalanw kan n’i ka somɔgɔw ye. I k’a filɛ cogo min na e n’i somɔgɔw be se ka kalan sira tagama.
4. Mun na an ka kan ka tile kelen lajɛnba makɔnɔ ni kɔrɔtɔ ye?
4 O tile kelen lajɛnba kalan be i ko dumuni diiman nafaman. Kalanw labɛnna ni kanuya ye ka kɛɲɛ n’an makoyaw ye. ‘Dumuni lo wagati latigɛnen na’ walisa ka kerecɛn cidenw balo Alako ta fan fɛ. I be jijali minw kɛra walisa ka taga o lajɛnba la ani ka nafa sɔrɔ a la, Jehova k’o duga i ye.—Mat. 24:45.