An ka Ala ka Kuma faranfasi cogo tilennen na
1 Filipe kɛtɔ ka kuntigi dɔ waaju, a “ye kuma ta ka Kibaru Duman fɔ Yesu ko la ka bɔ kitabu o yɔrɔ la.” (Kɛwalew 8:35). Filipe tun be “tiɲɛn kuma faranfasi cogo sɔbɛ la.” (2 Tim. 2:15). Nka bi, kɔrɔsibaga minw be tagama tagama, u y’a kɔrɔsi ko weleweledala caaman ma deli ka baara kɛ ni Bibulu ye waajuli kɛtɔ. Yala i be baara kɛ ni Bibulu ye waajuli kɛtɔ wa?
2 An ka lannakow n’an ka kalan bɛɛ juu bɔra Ala ka Kuma lo la (2 Tim. 3:16, 17). Ale lo be mɔgɔ sama ka na Jehova yɔrɔ, ani a b’u kalan ɲɛnamaya kama. O lo kama, a kɔrɔtalen be an ka baara kɛ ni Bibulu ye waajuli kɛtɔ. An kana baro kɛ an diyanye koow dɔrɔn kan (Heb. 4:12). Mɔgɔ caaman be dɔɔni dɔrɔn lɔn Bibulu koo la. O kama, an k’a kɔnɔnakow kalan k’a yira u la ko Bibulu be dɛmɛ nɔgɔman lase mɔgɔw ma, ani a be siniɲasigi min kofɔ hadamadenw ye.
3 Sin k’a kalan Bibulu kɔnɔ: A ɲini ka taga soo ni soo, ni sakɔsi tɛ i bolo. I be se ka gafe yirataw don fɛɛn fitinin dɔ kɔnɔ, ani ka Bibulu minɛ i bolo wala k’a don i jufa la. O kɔ, i mana baro daminɛ ni mɔgɔ dɔ ye, i be se ka Bibulu bɔ. Nka, kana a to a tigi b’a miiri ko i b’a ɲinina ka waajuli kuma fɔ. Lɔ i lamɛnbaga gɛrɛ fɛ janko a ka se ka kalan kɛ n’i ye i ka Bibulu kɔnɔ. N’a bɛnnen be, a ɲini a fɛ a ka Bibulusen kalan k’a kaan bɔ. Ale yɛrɛ mana Bibulu ka fɔta kalan, o be nɔɔ to a kan, min ka boon ka tɛmɛ n’a tun ye kalan mɛn dɔrɔn i daa la. Tiɲɛn na, walisa k’a dɛmɛ a ka kalan faamuya, i ka sinsin kumaden jɔnjɔnw kan.
4 Bibulusen kelen ladon cogo: I mana i yɛrɛ yira a tigi la, i be se k’a fɔ ko: “Mɔgɔw be ɲɛsin yɔrɔ caaman ma walisa ka sira sɔrɔ u ka ɲɛnamaya kɔnɔ. Ile ka miiri la, dɛmɛ fisaman wala sira nɔgɔman be bɔ min? [A ka jaabili lamɛn.] I be mun miiri kuma nin koo la? [Ntalenw 2:6, 7 kalan, ani a ka jaabili lamɛn.] Hadamaden ka hakilitigiya dɛsɛra yɛrɛ yɛrɛ, ani a ye mɔgɔ caaman jigi tigɛ. Nka Ala ka hakilitigiya y’a ka tiɲɛntigiya yira tuma bɛɛ, ani nafa b’a la.” O kɔ, gafe yirata yira a la. Ɲɛyirali kelen ta o gafe kɔnɔ k’a yira ko Ala ka hakilitigiya ka nɔgɔ.
5 Yesu tɛmɛna Sɛbɛninw fɛ ka mɔgɔ kɔnɔgwɛw dɛmɛ (Luka 24:32). Pol ye daliluw ta Sɛbɛninw kɔnɔ k’a ka kalan kɛ (Kew. 17:2, 3). Dɔ bena fara an ka jigisigi n’an ka ɲagali kan cidenyabaara la n’an delila a la ka Ala ka Kuma faranfasi cogo tilennen na.