Mun na an mako be kafo ka kitabukalan na?
1 Saan 1895 na, Jehova Seerew tun be weele ko Bibulu kalandenw. U y’u ka jɛnkuluw weele ko Cercles de l’aurore pour l’étude de la Bible (Bibulu kalan kɛnɛbɔda jɛnkuluw). U ka kalan basiginen tun be gafew L’Aurore du Millénium kan (sanbakulu kɛnɛbɔda). Kɔfɛ, o jɛnkuluw nana weele ko Berekaw ka Bibulukalan jɛnkuluw (Kew. 17:11). Tuma caaman na, jɛnkulu fitinin dɔ tun be lajɛn balima dɔ ka soo kɔnɔ suu fɛ, wagati min tun bɛnna jɛnkuludenw ma. Kafo ka kitabukalanw juu bɔra o lajɛnw lo la.
2 Jagwɛlɛya ni dɛmɛ: Komi u y’a dabɔ a kama ka kitabukalan jɛnkuluw kɛ fitinin fitinin, cogoya caaman dira jɛnkuludenw ma u k’u ka lanaya kofɔ. O nafa ye ka “ɲɔgɔn jija dannaya la.”—Rom. 1:12.
3 N’an be kitabukalan kɔrɔsibaga ka kalan kɛcogo kɔrɔsi, o be se k’an dɛmɛ ka “tiɲɛ kuma faranfasi cogo sɛbɛ la.” (2 Tim. 2:15). A kɔrɔsi k’a filɛ cogo min na a be barokun ka vɛrisew nafa bɔ kɛnɛ kan. N’a bɛnnen be gafe cogoya ma, kalan kuncɛtɔ, a be se ka segi ka hakilinata kunbabaw bɔ kɛnɛ kan n’a be tɛmɛ Bibulu dɔrɔn fɛ. A ka ɲɛyirali ɲuman be se k’an dɛmɛ an k’an ka kalan kɛcogo fisaya waajuli baara la.—1 Kɔr. 11:1.
4 Kitabukalan kɔrɔsibaga be lɔgɔkun kɔnɔ ka kalanko ɲɛminɛ. Ka fara o kan, a be bila ɲɛ waajuli baara la. A be jɛn ni waajulibaara kɔrɔsibaga ye ka labɛn nafamanw kɛ waajulibaara kama. A b’a ɲini ka jɛnkuludenw bɛɛ dɛmɛ u k’u ka kerecɛnya kunkanbaaraw dafa ka kibaro duman waaju, ani ka mɔgɔw kɛ kalandenw ye.—Mat. 28:19, 20; 1 Kɔr. 9:16.
5 Kitabukalan kɔrɔsibaga b’a janto jɛnkuluden kelen kelen bɛɛ ka ɲɛ la Alako ta fan fɛ. A b’o yira kafo ka lajɛnw na, ani n’a be waajuli kɛra ni mɔgɔ wɛrɛw ye. A mana taga bɔ balimaw fɛ, a fana be tɛmɛ cogoyaw fɛ k’u jagwɛlɛya Alako ta fan fɛ. A ka kan ka diya bɛɛ ye ka gwɛrɛ kitabukalan kɔrɔsibaga la tuma o tuma n’u makoya be dɛmɛ la Alako ta fan fɛ.—Esayi 32:1, 2.
6 An ka barika don ɲɔgɔn na: Jamana minw na bali be Ala ka mɔgɔw ka baara kan, tuma caaman na, balimaw b’u lajɛn jɛnkulu fitininmanw na. Balimacɛ dɔ hakili b’a la ko: “Hali ni bali tun sigira an ka kerecɛn baara kan, n’an tun be se tuma o tuma, an tun be tilantilan mɔgɔ 10 ni 15 cɛ, k’an ka lɔgɔkun lajɛnw kɛ. An tun be hakilimaya fanga sɔrɔ ka bɔ lajɛnw na Bibulukalan sababu fɛ, ani an ka jɛnɲɔgɔnya sababu fɛ kalan banni kɔ. An tun b’an ka walew suma ɲɔgɔnw na. O tun b’an dɛmɛ k’a faamu ko an kelen kelen bɛɛ tun be bondori kelen lo kɛra.” (1 Piɛre 5:9). O cogo kelen na, an ka barika don ɲɔgɔnw na, an kɛtɔ k’an seen don a ɲɛ ma kitabukalan labɛn na.—Efes. 4:.16.
[Study Questions]
1. Cogo juman na kafo ka kitabukalan labɛn daminɛna?
2. An be se ka mun kɛ walisa kitabukalan ka kɛ ‘ɲɔgɔn jijali’ ye?
3, 4. Cogo juman na kitabukalan labɛn be se k’an dɛmɛ k’an ka waajulibaara dafa?
5. Bɛɛ be se k’a tɔgɔla dɛmɛ juman sɔrɔ kitabukalan sababu fɛ?
6. a) Jamana dɔw la, cogo juman na an balimaw ye barika sɔrɔ u kɛtɔ ka lajɛn jɛnkulu fitininmanw kɔnɔ? b) Cogo juman na kitabu-kalan labɛn ye ile yɛrɛ nafa?