An ka piyɔniyew kɔrɔta
1 Bɛɛ b’a lɔn ko Ala ka mɔgɔw ka kisɛ waajulibaara la. Tiɲɛn lo, see tɛ an bɛɛ ye ka kɛ piyɔniye ye. Nka an ka kan k’an jija ka piyɔniye hakili sɛnɛ, an kɛtɔ ka baara kɛ n’an niin bɛɛ ye. Minw be se k’u sen don piyɔniye baara la, an b’u jagwɛlɛya, ani an be ɲagali n’u ye.
2 A man nɔgɔ ka kɛ piyɔniye ye, ani ka to piyɔniye baara la. Waajuli ani mɔgɔ kalanni baara minw be kɛ, piyɔniyew lo b’a fanba kɛ. O baara tɛ ɲɛ ni jijali ani saraka caaman ma kɛ. Mɔgɔ wɛrɛw be se k’o baarakɛla kisɛmanw kɔrɔta cogo di?
3 An be se ka min kɛ: Piyɔniyew mako b’a la diinan mɔgɔkɔrɔw k’u kɔrɔta. Piyɔniyew be jagwɛlɛya bɛrɛbɛrɛ sɔrɔ ni diinan mɔgɔkɔrɔw be waajuli kɛ n’u ye. Diinan mɔgɔkɔrɔ caaman b’a ɲini ka waajuli kɛ ni kafo ka piyɔniye kelen kelen ye siɲɛ kelen kɔni saan kɔnɔ. O cogo la, diinan mɔgɔkɔrɔw be se k’u fo u ka baara la. Ani, u be se k’u dɛmɛ ka ɲɛtaga sɔrɔ tugun. Piyɔniye dɔw ka ɲi ka labɛn kɛ walisa ka se ka waajuli kɛ tuma min na diinan mɔgɔkɔrɔw labilanen be. Diinan mɔgɔkɔrɔw fana ka kan k’u janto ko waajulikɛyɔrɔ caaman labilanen be jɛkuluw ye. Ka kɛɲɛ ni piyɔniyew ka wagati ye, lajɛn wɛrɛw be se ka labɛn waajuli kama wulafɛ walima tileben tuma, sanko ni piyɔniyew kɔrɔsigiw ka ca kalo minw na.—Esayi 40:11.
4 Kɔrɔsigi cidenw ka lɔyɔrɔ ɲuman kosɔn, u be se ka piyɔniyew kɔrɔta: u kɛtɔ k’u dɛmɛ waajuli baara la, ani ka teliya ka kafo ka labɛnw kɔrɔta. A ka di balimamuso piyɔniyew ye ni balimacɛw be na jɛkuluw labɛn waajuli baara kama. Minw be gafew ni zurunaliw koo ɲɛnabɔ kafo kɔnɔ, u ka kan k’u janto ko gafew ni zurunaliw labilanen be yen, ani u bena labɔri kɛ. U kɛtɔ k’u janto o la, o be piyɔniyew dɛmɛ ka ɲɛsin u ka baara ma.
5 Bɛɛ be se ka dɛmɛ kɛ: Weleweledalaw be se ka piyɔniyew dɛmɛ n’u b’u yɛrɛw labila tuma caaman walisa ka waajuli kɛ ni piyɔniyew ye. Piyɔniyew be weleweledala wɛrɛw waleɲuman lɔn n’u b’u dɛmɛ, ani n’u be waajuli kɛ n’u ye. N’a sɔrɔ i be se ka labɛn kɛ walisa ka waajuli kɛ ni piyɔniyew ye siɲɛ kelen lɔgɔkun kɔnɔ, wala siɲɛ fila kalo kɔnɔ. An be se ka piyɔniyew dɛmɛ bololafɛnw ta fan fɛ. U bena an waleɲuman lɔn kosɔbɛ.—Filip. 4:14-19.
6 Ni dɔw be piyɔniye baara la, u ka denbaya mɔgɔw be se ka caaman kɛ walisa k’u dɛmɛ. Tuma caaman na, denbaya be se ka soo kɔnɔ baaraw kɛcogo yɛlɛma. O la, gwamɔgɔ kelen wala dɔw be se ka kɛ piyɔniyew ye. Balimamuso dɔ ye deen saba denba ye. A be baara kɛ tile fila lɔgɔkun kɔnɔ. A dencɛw b’a dɛmɛ, u kɛtɔ ka sanniw kɛ, ani ka kɛnɛma baaraw kɛ. A denmuso be boon ladon, ani a be tobili kɛ. Kabini a ka lakɔli kalan banna, ale fana y’a sen don piyɔniye baara la. A n’a bamuso be ɲɔgɔn falen ka taga baara la. Ni denbaya mɔgɔw be bolo di ɲɔgɔn ma gwa kɔnɔ o cogo la, mɔgɔ caaman be se ka kɛ piyɔniye ye. Ani, o be duga lase denbaya ma.
7 Piyɔniye kisɛmanw be duga lase kafo ma cogoya caaman na. U ka kisɛya n’u ka ɲɛyirali kosɔn mɔgɔ caaman be jagwɛlɛya sɔrɔ ka bɛrɛ kɛ waajuli la. Siga t’a la, an ka kan k’a ɲini k’an seko bɛɛ kɛ walisa k’u kɔrɔta. N’an be jɛn ka jijali kɛ o cogo la, bɛɛ be ɲagali sɔrɔ, ani o be Jehova tando.