Tɔnɔ ɲuman b’a la n’an be baara kɛ ni sɛbɛninw ye

¹ Kabini a daminɛ na an tile la, Jehova ka ɔriganisasiyɔn ye baara kɛ ni sɛbɛninw ye, ani a ye sanga sɔrɔ o la. A ye tɔn min sigi sen kan sariya ɲɛɛ kɔrɔ, o tɔgɔ ko: Watch Tower Bible and Tract Society. O tɔgɔ yɛrɛ b’a yira ko sɛbɛninw be baara kunbaba kɛ kibaro duman jɛnsɛnni na. Saanw 1881 ani 1918 cɛ, Jehova ka jama ye sɛbɛnin miliyɔn 300 ni kɔ tilan ka di mɔgɔw ma. Mɔgɔ caaman minw nana kɛ Kirista ka balimacɛw tɔɔ ye o wagati la, u ye tiɲɛn lɔn o sɛbɛnin fɔlɔw sababu lo fɛ.

² Saan 1987 la, sɛbɛnin naani bɔra kulɛri la. O la, u sinsin a kan kokura ko an ka baara kɛ ni sɛbɛninw ye. Saan 1992 na, tile saba lajɛnba “Yeelen bɔbagaw” la, a fɔra ko sɛbɛnin kulɛrilaman naani wɛrɛw bena bɔ tugun ka fara a kan. Ani a fɔra k’u tun bena mɔgɔw lasun u ka miiri. U tɔgɔw ko: De l’aide pour les déprimés ; Le monde actuel survivra-t-il ?; Une vie de famille agréable; Qui domine vraiment le monde ? O kɔ, sɛbɛninw wɛrɛw nana fara a kan, i n’a fɔ: Jéhovah : qui est-il ? ; Jésus Christ : qui est-il ? ; Avez-vous un esprit immortel ?; Aimeriez-vous en savoir plus sur la Bible? Yala i be baara kɛ n’o sɛbɛninw bɛɛ ye walisa ka sanga sɔrɔ i ka waajuli baara la wa?

³ An bena tɔnɔ ɲuman sɔrɔ n’an be baara kɛ bɛrɛbɛrɛ ni sɛbɛninw ye. O la, fɔɔ an k’a ɲini k’u kɔnɔnakow lɔn koɲuman. Ɲɛyirali fɛ, yala an y’u kalan ni kɔrɔsili ye walisa u kelen kelen kɔnɔnako ka to an hakili la wa? Yala an miirila k’a filɛ, o sɛbɛnin kelen kelen bena diya mɔgɔ sifa minw ye wa? N’an y’a ɲini k’u kelen kelen kɔnɔnakow lɔn koɲuman, o bena an lasun an ka baara kɛ n’u ye soo ni soo, ani cogoya wɛrɛ caaman na n’an be sen fɛ seereya dira mɔgɔw ma.

⁴ An ka baara kɛ n’u ye waajuli kɛtɔ soo ni soo: Kafokulu kɔrɔsibaga dɔ y’a sɛbɛ ko: “Ne ka baro caamanba bɛɛ sera ka daminɛ ni sɛbɛninw ye.” Yala i y’a ɲini k’o ɲɔgɔn kɛ wa? Mun na i tɛ tɛmɛ sɛbɛninw fɛ k’i ka baro ladon? Sɛbɛninw sababu fɛ, an be se ka baro ladon cogoya diiman caaman na sisan. Sɛbɛnin kelen kelen be sira di an ma an ka bibulukalan daminɛ kelen siɲɛ fɔlɔ la, wala viziti kura kɛtɔ.

⁵ Baara be se ka kɛ ni sɛbɛninw ye cogoya wɛrɛ la. Baro kɛtɔ soda dɔ la, mɔgɔ dɔ be se k’a fɔ an ye ko a ka somɔgɔ dɔ banna a ma mɛɛn, wala ko a ka somɔgɔ dɔ man kɛnɛ. Ɲɛnasisiba be mɔgɔ dɔw la. Wala, u ka kunkow be mɛɛnna u kuun na. O mɔgɔw ka teli ka koow filɛ ni ɲɛɛ jugu ye, ani jigitigɛ b’u sɔrɔ. An be se ka kanuya yira u la, an kɛtɔ k’u dɛmɛ ka sɛbɛnin nin ka cira lɔn: De l’aide pour les déprimés. A be mɔgɔ jagwɛlɛya. Mɔgɔ dɔ be se k’a fɔ an ye ko ale ka furu sara, wala a ka baara tiɲɛna a bolo. Tuma caaman na, o koow be mɔgɔ niin tɔɔrɔ, ani a bɔnɛ ka bon denbaya kun na. Ɲiningali ninw bila a ye: “Mun na kunko juguw be denbayaw sɔrɔ ten bi? Cogo juman na an be se ka ɲɛnamaya duman sɔrɔ denbaya kɔnɔ?” O ɲiningaliw be sɔrɔ sɛbɛnin Une vie de famille agréable ɲɛɛ 2nan na. N’a sɔrɔ o ɲiningali tigitigiw lo be o tigi kuun na. Hali n’a ma mako don an ka baro la yɔrɔnin kelen, n’a sɔrɔ a bena sɛbɛnin kalan kɔ fɛ.—Waaj. 11:6.

⁶ Kafo dɔw ye waajuli kɛ u ka kiinw kɔnɔ siɲɛ caaman na. Ani, mɔgɔ caaman ye an ka gafew sɔrɔ ka ban. Sɛbɛninw sababu fɛ, an be se ka baro kɛ ni mɔgɔw ye u diyanyekow kan. An be se k’u lasun u ka kuma, ani u ka miiri Masaya jigiya kan. An ka ɲiningali dɔ to u hakili la, an bena segi ka baro kɛ min kan. An ka segi ka na bɔ u fɛ, ani an k’u makodon ladon. Kɔfɛ, n’a sɔrɔ an bena se ka bibulukalan daminɛ n’u ye kitabunin wala gafe dɔ kɔnɔ, min b’o fɛ ka ban.

⁷ An ka baara kɛ ni sɛbɛninw ye sen fɛ seereya ditɔ: Ni sɛbɛninw b’an bolo kɔrɔ tuma o tuma (dereke jufa dɔ kɔnɔ, bolola saki dɔ kɔnɔ wala waajuli sakɔsi kɔnɔ) an bena cogoya caaman sɔrɔ k’u di mɔgɔw ma yɔrɔ o yɔrɔ. An ka baara kɛ n’u ye: Sanniw kɛtɔ, n’an be tagama la, n’an be baro kɛra n’an somɔgɔw ye wala mɔgɔ minw bena bɔ an fɛ. Sɛbɛninw be cogoya di an ma an ka seereya surun di mɔgɔw ma. Sɛbɛnin tɛ mɔgɔ degun ni kalan caaman ye. Nka, a be tilen ka sin koow ma ni kɔrɔsili ye. Mɔgɔw be sɔn u la ka tɛmɛ gafew wala zurunaliw kan sabu u kalan man jan.

⁸ An ka kɔrɔsili kɛ walisa ka sababuw ɲini ka sɛbɛninw di mɔgɔw ma lakɔli la, baarakɛyɔrɔ la, ɛrɛsitoran na, esansi feereyɔrɔ la, ani yɔrɔ wɛrɛw la. Balimamuso dɔ tun ka kan ka taga n’a mamamuso ye dɔgɔtɔrɔcɛ fɛ. A y’a janto ka sɛbɛnin dɔw ta a bolo. Kɔnɔni kɛtɔ dɔgɔtɔrɔcɛ ka biro daa la, a ye baro daminɛ ni muso kɔnɔman dɔ ye. A ye sɛbɛnin Hɛɛrɛmasigi duniɲa kura kɔnɔ yira o muso la. Ani, a y’a ɲininga ko: “Yala i t’a fɛ k’i deen balo nin duniɲa nin ɲɔgɔn kɔnɔ wa?” Kɔ fɛ, a sera ka taga bɔ o muso fɛ a ka soo, ani u ye baro lataga ɲɛ. Viziti kura wɛrɛw kɛra o sen fɛ tuma o tuma.

⁹ An be se ka bibulukalanw daminɛ ni sɛbɛninw ye: Kafokulu kɔrɔsibaga dɔ y’a lakali ko dan na lɔgɔkun dɔ kɔnɔ, kafo dɔ ye bibulukalan 64 daminɛ sɛbɛninw sabu fɛ: balimaw tun be tɛmɛ u fɛ ka baro ladon.

¹⁰ Baro fɔlɔ daminɛtɔ, yala i y’a ɲini ka bibulukalan daminɛ kelen wa? Sɛbɛnin dɔ sababu fɛ, i be se ka bibulukalan kɛcogo yira ka surunya a tigi la. Balimamuso dɔ tɛmɛna sɛbɛnin Hɛɛrɛmasigi duniɲa kura kɔnɔ fɛ k’o lo kɛ. A ye jaa yira a lamɛnbaga la, ani a y’a ɲininga n’a b’a miiri ko loon dɔ dugukolo bena kɛ o cogo la. A y’a ka jaabili lamɛn. O kɔ, a y’a ɲini a fɛ a ka 2 Piɛre 3:13 ani Esayi 65:17 kalan, minw be sɔrɔ sɛbɛnin kɔnɔ. O kɔ, balimamuso y’a fɔ ko: “O lahiduw tɛ siko gwansan ye, sabu, tiɲɛn na, u sɛbɛnen be Ala ka Kuma, Bibulu kɔnɔ.” A ye labɛn kɛ walisa ka baro lataga ɲɛ lɔgɔkun nɔfɛta kɔnɔ. A segira ka na. A ye muso ka ɲiningali caaman jaabi, ani a ye gafe dɔ to a bolo. Bibulukalan dɔ daminɛna.

¹¹ N’a sɔrɔ i batisera a ma mɛɛn. Wala, i ye weleweledala ye, min ma batise fɔlɔ, ani i b’a ɲinina ka kɛ kolɔnbaga ye waajuli baara la. N’o lo, i be se ka ladiliw ɲini weleweledala kolɔnbagaw fɛ: u bena sɛbɛninw yiracogo yira i la kafo ka kiinw kɔnɔ. Ɲɛyirali caaman be yen Bibulu kɔnɔ: U b’a yira ko kerecɛn minw kɔgɔra hakilimaya ta fan fɛ, u ye dɔ wɛrɛw jagwɛlɛya ani u y’u ladi.—Kew. 18:24-27; 1 Kɔr. 4:17.

¹² Kitabukalan kɔrɔsibaga kɔni be se ka dɛmɛ kɛ o fan fɛ. A be se ka labɛn kɛ walisa mɔgɔ wɛrɛw k’i dɛmɛ ka baara kɛ bɛrɛbɛrɛ ni sɛbɛninw ye. Bangebagaw ka kunkanbaara ye k’u deenw dɛmɛ u ka ɲɛtaga sɔrɔ waajuli baara la. Bangebaga dɔw y’u denmuso dege a ka sɛbɛnin Hɛɛrɛmasigi duniɲa kura kɔnɔ yira mɔgɔw la. Loon dɔ, a n’a bamuso tun be bibulukalan kɛra ni muso dɔ ye. A ye sɛbɛnin dɔ yira o muso cɛɛ la. Cɛɛ kabakoyara k’a ye ko barikaba be sungurunin ka lannakow la. Sɛbɛnin kalan diyara a ye kosɔbɛ. Sungurunin tun mana segi ka na n’a bamuso ye tuma o tuma, a tun be bibulusen dɔ wala Bibulu ka tariki dɔ yira cɛɛ la, a tun b’u labɛn ale tigitigi kama. Sisan, o cɛɛ be an ka zurunaliw kalan tuma o tuma, a sɔnna ka gafe Révélation: dénouement kalan, ani a tagara lajɛn na tuma dɔw la. O sababu bɛɛ bɔra bangebagaw la: u ye wagati ta k’u denmuso kalan a ka baara ɲuman kɛ ni sɛbɛninw ye.

¹³ An ka baara kɛ bɛrɛbɛrɛ n’an ka sɛbɛninw bɛɛ ye: N’i b’a fɛ ka sɛbɛnin Le monde actuel survivra-t-il ? di mɔgɔ dɔ ma, i be se ka i tɔgɔ fɔ a ye, ani ka baro daminɛ nin cogo la: “A ni sɔgɔma. An be baro kɛra ni mɔgɔw ye ɲɛnamaya cogoya kan bi tilew la. E ka miiri la, yala koow bena fisaya wala u bena juguya ka taga wa? [A ka jaabili lamɛn.] Dɔw b’a miiri ko koo minw be kɛra duniɲa kɔnɔ bi, u be Bibulu ka lahiduw dafara, ani ko duniɲa laban surunyana. E ko di?” A ka jaabili lamɛn. O kɔ, sɛbɛnin di a ma, ani a hakili sama ka taga dakun 2nan ka ɲiningali saba kan. Taga ɲɛ ni sɛbɛnin ka ɲɛfɔliw ye. A yira ko duniɲa dɔ banna ka ye, ani, bi ta fana bena ban. Baro laban na, labɛn kɛ walisa i ka segi ka na Bibulu ka daliluw yira a la ko duniɲa laban ka surun.

¹⁴ Tuma caaman na, wagati kunkurunin dɔrɔn lo b’an fɛ ka Masaya cira lase mɔgɔw ma baarakɛyɔrɔ la, wala lakɔliso la. I ka baarakɛyɔrɔ la, baro dɔ be se ka daminɛ politikiko kuraman dɔ kan. An be se k’a yira ko, faamanw ka jijaliw bɛɛ n’a ta, ni kɔnɔgwɛ ye tuma dɔw la, duniɲa ye tɔɔrɔ caaman kunbɛn ka tɛmɛ. O kɔ, an k’an ɲɛsin sɛbɛnin nin ma: Qui domine vraiment le monde ? An k’a ɲɛɛ 2nan jukɔrɔla ka ɲiningali saba bila. U be mɔgɔ lasun a ka miiri. Ni wagati t’an fɛ ka baro fitinin kɛ, an k’o sɛbɛnin di o mɔgɔ(w) ma. Ani, an ka labɛn kɛ walisa k’o ɲiningaliw jaabi wagati wɛrɛ la wala yɔrɔ wɛrɛ la.

¹⁵ An kelen na, wala denbaya kɔnɔ, an ka wagati ta k’o sɛbɛnin kelen kelen yiracogo filɛ. An k’an yɛrɛ dege u yiracogo la. Cogo juman na an be se ka baara kɛ ni sɛbɛninw ye n’an be gafe wɛrɛ yirala mɔgɔw la kalo la? Yala ɲɔgɔnye dɔ b’an fɛ, ani an be se ka sɛbɛnin dɔw ta an bolo ka taga wa? Sɛbɛninw ka cira bɛnnen be an ka wagati ma. Lɔgɔkun nin na, yala an bena mɔgɔ dɔ kunbɛn, min bena nafa sɔrɔ u la wa?

¹⁶ N’an be Jehova kanu ka dunya, n’an b’an janto mɔgɔw la, o bena an lasun an k’an seko bɛɛ kɛ ka kibaro duman lase mɔgɔw ma. N’an be baara kɛ ni sɛbɛninw ye tuma o tuma, o bena an dɛmɛ k’o kɛ. Saan wolonfila cɛden tun b’a fɛ k’a sigiɲɔgɔn muso dɔ dɛmɛ a ka don duniɲa kura kɔnɔ. A ye sɛbɛnin dɔ di a ma, ani bibulukalan dɔ daminɛna. A tun man gwɛlɛ ka tɛmɛ o kan! Nka, waajuli kɛtɔ, yala an b’a ɲini ka sɛbɛninw yira o cogo nɔgɔman na wa? Siɲɛ nata la, an mana sɛbɛnin dɔ di mɔgɔ dɔ ma, n’a sɔrɔ an bena se ka bibulukalan dɔ daminɛ fana. Masaya kibaro duman waajuli kɛtɔ, n’an be baara kɛ ni sɛbɛninw ye hakilitigiya la, siga t’a la, an bena sanga sɔrɔ a la.