¹ Musa tun ye cii di Israɛldenw ni siginfɛw bɛɛ ma ko u ka ɲɔgɔnw lajɛn saan wolonfila o saan wolonfila walisa Sariya kitabu ka kalan u ye. Mun na do? “Walisa u ka lamɛnni kɛ ani u ka kalan.” (Dut. 31:10-12, NW). Jehova tun y’a ye ko a kɔrɔtalen lo ka lajɛnbaw labɛn a sagokɛlaw kama. Yanni dɔɔni cɛ, a sagokɛlaw bena lajɛn tugun tile saba lajɛnbaw kama. U kuun ko: “A’ ye tugu Krista kɔ!”

² Yala i y’a daminɛ k’i labɛn wa? Kɔni i mako t’a la ka kɔnze ɲini i ka patɔrɔn fɛ? I be bibulukalan kɛ ni mɔgɔ minw ye, ani i somɔgɔ minw tɛ Seerew ye, i k’u dɛmɛ u ka kɛ lajɛnba la n’i ye. Yala kafoden dɔw mako b’a la u k’u dɛmɛ ka taga lajɛnba la wa? Yala i b’i labɛnna ka taga lajɛnba wɛrɛ la i ka kafo ma weele min na wa? Yala i mako bena kɛ siyɔrɔ la, n’a sɔrɔ lotɛli la, wala yɔrɔ wɛrɛ la wa? Kunnafoni ninw bena i dɛmɛ k’i yɛrɛ labɛn.

³ An ka kɛ lajɛnba la tile saba kelen-kelen bɛɛ kɔnɔ: Jehova be hakilimaya domuniba di a ka mɔgɔw ma (Es. 25:6). An b’o hakilimaya domuniba dɔ sɔrɔ an ka tile saba lajɛnbaw la saan o saan. Nka u y’a kɔrɔsi ko jumalon na, jama hakɛ ka dɔgɔ kosɔbɛ ka tɛmɛ samedi ni dimansi taw kan. I k’a laɲini ka kɛ loon kelen-kelen bɛɛ la walisa ka nafa sɔrɔ kalan na Jehova ka ɔriganisasiyɔn ye min labɛn walisa k’an dusu lafiya. N’i mako be kɔnze la, i ka delili kɛ o kama. O kɔ, lajɛnba loon mana fɔ dɔrɔn, i k’i jaa gwɛlɛya ka kuma i ka patɔrɔn fɛ (1 Tes. 2:2; Neh. 2:4, 5). I be se ka nafa sɔrɔ a la i kɛtɔ k’a ɲɛfɔ a ye ko lajɛnba ye i ka batoli faan dɔ ye, a be kɛ saan o saan. N’i be kɔn a ma, n’a sɔrɔ a tɛna gwɛlɛya patɔrɔn fɛ ka yɛlɛmani dɔw kɛ ani ka sira di i ma.

⁴ I k’i denbaya n’i ka Bibulu kalandenw labɛn: N’i ka Bibulu kalandenw tun be se ka kɛ lajɛnba la i gɛrɛ fɛ ani ka balimaw ka dusudiya ye u ɲɛɛ na “jamaba cɛma”, o tun bena kɛ ɲagaliko ye dɛ! (Zab. 22:26). I ka kɔn k’o baro kɛ n’u ye walisa u ka se ka wagati latigɛ ka taga lajɛnba la. I k’a ɲɛfɔ u ye fɛɛn min kama a ka di ile ye ka taga lajɛnbaw la. I be se ka lajɛnba nege don u la i kɛtɔ ka videwo dɔw yira u la: videwo minw ɲɛsinna lajɛnba tɛmɛnen dɔw ma, i n’a fɔ Unis grâce à l’enseignement divin. I ka lajɛnba kofɔ i somɔgɔw fana ye minw tɛ Jehova Seerew ye. N’a sɔrɔ u be se ka labɛn kɛ ka na dramu filɛ wala ka na tile kelen kɔni kɛ n’i ye lajɛnba la.

⁵ I k’i balimaw dɛmɛ: See tun be minw ye k’u balimaw dɛmɛ, ciden Pol y’u ladi ko: “U ka ko ɲuman kɛ, u ka nafolotigiya ka kɛ kɛwale ɲumanw kɛli ye. U ka nili kɛ teliya ka u tɛgɛw labila.” (1 Tim. 6:18). An be se k’o ladili sira tagama an kɛtɔ k’an janto dɔw cogoya la kafo kɔnɔ: mɔgɔkɔrɔbaw, namaraw, minw be kudayi cidenya baara la, denbaya minw be ni bangebaga kelen dɔrɔn ye ani dɔ wɛrɛw fana. N’a sɔrɔ u mako be dɛmɛ la walisa ka taga lajɛnba la. U somɔgɔ minw be tiɲɛn sira kan, olu lo ka kan ka lɔ n’o koo ye fɔlɔ. Nka diinan mɔgɔkɔrɔw ni mɔgɔ wɛrɛw fana be se ka hakili sɔrɔ k’u dɛmɛ ni kanuya ye n’u mako b’a la.—Gal. 6:10; 1 Tim. 5:4.

⁶ See be kafoden caaman ye k’u tɔgɔla labɛn kɛ siyɔrɔ kama lajɛnba wagati la. Nka dɔw mako bena kɛ dɛmɛ la walisa ka siyɔrɔ sɔrɔ. U ka kan ka ɲɛsin kafo ka waajuliko ɲɛnabɔbagaw jɛnkulu ma min bena sɛbɛ nin dafa: Demande de chambre. Kafow weelela lajɛnba min na, o siyɔrɔ koo ɲɛnabɔlaw lo bena o sɛbɛ ci u ma. Balima minw be siyɔrɔ koo ɲɛnabɔ lajɛnba kelen-kelen la, u bena siyɔrɔ ɲinisɛbɛw ni u yɛrɛw ka ladɛrɛsi ci kafow ma minw mako b’a la. U ka kan ka kɔn k’o kɛ joona walisa o sɛbɛw ka segi ka ci u ma wagati la. O sɛbɛw man kan ka ci Betɛli ma. U ka kan ka ci siyɔrɔ koo ɲɛnabɔlaw lo ma.

⁷ Yɔrɔ minw na o be se ka kɛ ani o ka nɔgɔ, siyɔrɔ koo ɲɛnabɔlaw bena lotɛli ni sibon dɔw sugandi k’u tɔgɔw n’u ladɛrɛsiw ci kafow ma walisa u k’u bila kunnafoni tablo kan. O kunnafoni kɔnɔ u bena sibon cogoya lakali k’a sɔngɔ fɔ, ani k’a yira mɔgɔ daa minw ka kan ka la bonden kelen kɔnɔ. O la, o labɛn be se ka mɔgɔw dɛmɛ minw b’a fɛ ka jigi lotɛli la, wala sibon dɔ la hali n’olu yɛrɛ lo bena a musakaw sara. Koow b’a yira ko tuma caaman na, siyɔrɔ koo ɲɛnabɔlaw be se ka sibon ɲumanw sɔrɔ sɔngɔ nɔgɔman na, minw yɔrɔ man jan lajɛnba kɛyɔrɔ la.

⁸ N’i b’a fɛ ka taga lajɛnba wɛrɛ la: Walisa bɛɛ ka se ka sigiyɔrɔ ni gafew ni sibon ni fɛɛn wɛrɛw sɔrɔ lajɛnba la, a ka ɲi i ka taga lajɛnba kɛ yɔrɔ min na i ka kafo weelela yen. Nka sababu dɔw be se k’i waajibiya ka taga lajɛnba wɛrɛ la, i n’a fɔ vakansi wala laɲinita wɛrɛw.

⁹ Lajɛnba minw bɛɛ bena kɛ faransɛkan na, u bɛɛ kofɔra La Tour de Garde kɔnɔ (saan 2007, marisi tile fɔlɔ ta). N’i b’a fɛ u k’i dɛmɛ ka sibon sɔrɔ, wala n’i be kunnafoni wɛrɛ fɛ ka ɲɛsin lajɛnba dɔ ma min tɛ aw ka kafo ta ye, i be se ka lɛtɛrɛ ci o lajɛnba ka koow ɲɛnabɔbagaw jɛnkulu ma. Kafo ka sekeretɛri be se k’u ka ladɛrɛsi sɔrɔ aw ka lajɛnba ka koow ɲɛnabɔbagaw jɛnkulu fɛ. Walisa u ka se k’i jaabi, i k’i janto k’i tɔgɔ n’i ka kafo ladɛrɛsi sɛbɛ lɛtɛrɛ foroko dɔ kan ani k’o fana ci u ma. Ni lajɛnba dɔ wɛrɛw fana bena kɛ o dugu kɔnɔ, i k’a yira ile bena kɛ lajɛnba min na, ani i k’o loonw yira (i n’a fɔ: Bobo-Dioulasso, Français 28-30 décembre 2007).

¹⁰ Ka sibon mara ka bila lotɛli la: Ni lotɛli dɔw sugandira k’u tɔgɔw sɛbɛ lisi (liste) dɔ kan, ani o lisi labilanen be aw ka mara kɔnɔ, u bena kɔn k’a bila kunnafoni tablo kan kafo kɔnɔ. I ka cikan ninw sira tagama minw be sɔrɔ koorilen nin kɔnɔ: “sibon be mara ka bila lotɛli la cogo min na.” Lotɛli minw tɔgɔw be lisi kan, n’i ye u bɛɛ weele ka filɛ ani sibon si ma sɔrɔ yen, wala n’i ye kunko sɔrɔ ni lotɛli dɔ ye, i k’a fɔ i ka kafo sekeretɛri ye. Ale bena ɲɛsin balimaw ma minw be sibon koow ɲɛnabɔ a kɛtɔ ka tɛmɛ lisi sanfɛla kunnafoniw fɛ. I kana telefɔni ci Betɛli ma.

¹¹ Labɛn wɛrɛ kɛra sibon sifa wɛrɛw kama i n’a fɔ dɔw ka soow kɔnɔ, bonbaw kɔnɔ, ani luwanse boonw. Cikan minw dira ka taga o faan fɛ, bɛɛ ka kan k’u sira tagama.

¹² I ka labɛnw sira tagama: An setɔ lajɛnba kɛyɔrɔ la, an b’a ye ko u kɔnna ka baara caaman kɛ an nali kosɔn. Balimacɛw b’an kunbɛn ni kanuya ye. U be porogramu di an ma ani u b’an dɛmɛ ka sigiyɔrɔ sɔrɔ. Balimacɛw ni balimamusow ye yɔrɔ saniya ka tintin labɛn koɲuman. Hali ni jama ɲɛɛ tun t’a la, baara nafamanba kɛra walisa ka kalanw labɛn, ka fɔ-ka-bɛn kɛ ni lotɛliw ye ani ka koo misɛn caaman ɲɛnabɔ.

¹³ Lajɛnba kelen-kelen bɛɛ kosɔn, balimaw be baara kɛ kalo caaman kɔnɔ walisa ka koow labɛn. U ka denbayaw fana be dɛmɛ kɛ sabu u be wagati di u ma walisa u ka o koobaw ɲɛnabɔ. O saraka bɛɛ kɛra an kosɔn. Yala an t’u waleɲuman lɔn wa? An be se k’o yira an kɛtɔ ka barokun nin ka cikanw sira tagama, ani an bena minw sɔrɔ sanni lajɛnba ka se (Heb. 13:17). Bɛɛ kɛtɔ k’u sira tagama, o lo bena a to “fɛn bɛɛ ka kɛ cogo bɛnnen na, a ko ɲɛnabɔlen koɲuman.”—1 Kɔr. 14:40.

¹⁴ Makoya be diyanye baarakɛlaw la: Yesu ye ɲɛyirali dafalen di an ma: a tun b’a yɛrɛ majigi k’a janto mɔgɔw ka makoyaw la (Luka 9:12-17; Yuh. 13:5, 14-16). Minw b’u yɛrɛ di ka baara kɛ lajɛnbaw la u b’a yira k’o miiriya ɲɔgɔn b’u la. Yanni dɔɔni cɛ, lajɛnba ka koow ɲɛnabɔbagaw jɛnkuluw bena a ɲini mɔgɔw fɛ u k’u dɛmɛ ka lajɛnba koow ɲɛnabɔ. U mako bena kɛ a la diinan mɔgɔkɔrɔw kɔni ka sɔn k’u yɛrɛw di walisa ka cii dɔw dafa. U kɛtɔ k’u yɛrɛw labila baara kama, u be ɲɛyirali ɲuman di bɛɛ ma kafo kɔnɔ.—1 Piɛrɛ 5:2, 3.

¹⁵ Mɔgɔ ɲɛɛ be min na: Lotɛli dɔ kuntigi y’a fɔ ko: “Aw lo koo ka di an ye ka tɛmɛ jɛnkulu tɔɔw kan. Aw tagamacogo ka ɲi ka tɛmɛ u bɛɛ kelen-kelen ta kan. Muso minw be sibonw saniya, u bɛɛ y’a fɔ ko aw ye u minɛ ka ɲɛ kosɔbɛ ani aw ye nilifɛn di u ma. Tiɲɛn na, bɛɛ b’a fɛ ka baara kɛ lɔgɔkun laban na, tuma min na aw be yan!” Lotɛli wɛrɛ ka patɔrɔn y’a fɔ ko: “Sigiɲɔgɔnya ka di ni Jehova Seerew ye ka tɛmɛ jɛnkulu tɔɔw bɛɛ kan.” N’a sɔrɔ ile fana ka tagamacogo ɲuman lo kɛra o tandoli sababu ye. I ka miiri k’a filɛ Jehova dusu be diya cogo min na n’a ɲɛɛ b’a la k’o tandoli ɲɔgɔn be kɛra an ka tagamacogo kosɔn!—1 Piɛrɛ 2:12.

¹⁶ Lajɛnw kɔrɔtalen be kosɔbɛ Ala sagokɛlaw fɛ sabu an “b’a ye ko Matigi ka don surunyara.” (Heb. 10:25). An ka lajɛnbaw la, jɔncɛ kantigiman hakiliman jɛnkulu be kunnafoniw di an ma walisa k’an dɛmɛ ka Jehova ka “sariya kumaw bɛɛ mara ka u kɛ” (Dut. 31:12). I k’a daminɛ k’i labɛn kabini sisan tile saba lajɛnba kama, min barokun ko “A’ ye tugu Krista kɔ!” I ka kɛ yen loon kelen-kelen kuru bɛɛ la. O la, i bena nafa sɔrɔ hakilimaya kalan bɛɛ la ani jɛnɲɔgɔnya diiman na!

[Study Questions]

1, 2. (a) Cogo juman na Musa ye Israɛldenw jija u ka ɲɔgɔnw lajɛn? (b) An ka kan k’a daminɛ ka labɛn jumanw kɛ kabini sisan?

3. (a) Esayi 25:6 be dafara cogo di bi? (b) U y’a kɔrɔsi ko jama hakɛ be cogo di lajɛnba loon fɔlɔ la? An yɛrɛ ka ɲi ka mun lo kɛ o faan fɛ?

4. An be se k’an ka Bibulu kalandenw n’an somɔgɔ dannabaliw labɛn cogo di lajɛnba kama?

5, 6. (a) 1 Timote 6:18 b’an jija an k’an tɛgɛ labila ka nili kɛ. An be se k’o kɛ cogo di? (b) Labɛn juman kɛra walisa ka mɔgɔw dɛmɛ minw mako b’a la u k’u dɛmɛ ka jatigiso sɔrɔ?

7. (a) Siyɔrɔ koo ɲɛnabɔlaw bena kunnafoni juman lase kafow ma ka ɲɛsin u ka lajɛnba ma? (b) Minw bena jigi lotɛli la wala sibon dɔ la, labɛn juman kɛra walisa k’u dɛmɛ?

8. Koow sira fɛ, mun na a bɛnnen tɛ an ka taga lajɛnba wɛrɛ la min be dan na n’an ka kafo ta ye?

9. N’i ka kan ka taga lajɛnba dɔ la min be dan na n’i ka kafo ta ye, i ka kan ka mun lo kɛ?

10, 11. (a) Sibon be mara ka bila lotɛli la cogo di? (A filɛ koorilen nin kɔnɔ: “sibon be mara ka bila lotɛli la cogo min na.”) (b) Sibon sifa wɛrɛw juman fana be se ka sɔrɔ?

12, 13. (a) Labɛn jumanw kɛra an kosɔn sanni an ka na lajɛnba la? (b) Baara min bɛɛ kɛra an kosɔn, an be se k’a yira cogo di ko an b’o waleɲuman lɔn? (I ka Heburuw 13:17 kalan.)

14. (a) Yesu ye ɲɛyirali ɲuman juman di an ma mɔgɔw dɛmɛcogo ta faan fɛ? (b) Jɔn lo be se k’a ladegi, ani o be kɛ cogo di?

15. Cogo juman na Seere dɔw ka tagamacogo ɲuman ye tandoli lase Jehova ma lotɛliw la?

16. (a) Mun na a kɔrɔtalen be kosɔbɛ Jehova sagokɛlaw ka ɲɔgɔnw lajɛn? (b) An kelen-kelen be se ka mun lo kɛ kabini sisan?

[Box on page 3]

Porogramu lɛriw

Jumalon ni samedi

9h20 - 17h05

Dimansi

9h20 - 16h10

[Box on page 4]

Sibon be mara ka bila lotɛli la cogo min na:

Cikanw:

◼ A’ ye weeleli kɛ ni telefɔni nimɔrɔw ye minw be sɔrɔ lisi kan.

◼ Aw ye sibon fɔlɔ min mara ka bila, a’ ye to o kan.—Mat. 5:37.