Yala i be se k’i ka soo labila wa?

¹ Saan kɛmɛ fɔlɔ wagati la, kerecɛn caaman y’u ka soow labila kafo ka lajɛnw kama (1 Kɔr. 16:19; Kolos. 4:15; Filem. 1, 2). Bi, kafo dɔw kɔnɔ, soo labilanenw tɛ labɔri kɛ kitabukalanw kama, wala waajuli baara lajɛnw kama. O kosɔn, mɔgɔ 30 ni kɔ be lajɛn jɛkulu dɔw kɔnɔ. O ka ca ni mɔgɔ hakɛ kɛɲɛnen ye: o min ye 15 ɲɔgɔn ye.

² Bonyaba: Yala i miirila k’i ka soo labila kafo ka kitabukalan kama wa? Nin boon dɔ ka bon, n’a saniyalen be, ni yeelen ka bon, ani ni fɔɲɔ be mɔgɔ fiyɛ ka ɲɛ, o ye lajɛn kɛyɔrɔ ɲuman ye. Kitabukalan ye kafo ka lajɛn dɔ ye. Ani, Jehova ka labɛn dɔ lo: A be tɛmɛ min fɛ k’a ka jama kalan. O kama, ni kitabukalan be kɛ i ka soo kɔnɔ, o ye bonyaba ye i fɛ. Mɔgɔ caaman y’a fɔ k’olu kɛtɔ k’u ka soo labila lajɛn kama, u ye nafa sɔrɔ Alako ta fan fɛ.

³ N’i ka miiri la, i ka soo kɛɲɛnen be, ani a labilanen be, hakɛ to, a fɔ diinan mɔgɔkɔrɔw ye. N’a sɔrɔ u be boon wɛrɛw yaalala. Ni kitabukalan tɛ se ka kɛ i ka soo kɔnɔ, yala waajuli baara lajɛnw be se ka kɛ yen wa? Hali ni kafo makoya tɛ boon dɔ la sisan, a bena diya diinan mɔgɔkɔrɔw ye k’a lɔn k’i ka soo labilanen be. Wagati nataw la, i be se k’o bonya sɔrɔ.

⁴ An ka kɛcogo ɲumanw yira: Ni lajɛn be kɛra balima dɔ ka soo kɔnɔ, bɛɛ ka kan k’u janto jatigiw ka bololafɛnw na. Bangebagaw ka kan ka la a la ko, yɔrɔ min labilara kalan kama, u deenw t’o yɔrɔ daan tigɛ: K’u tɛ yaala sotigi ka boon yɔrɔ wɛrɛw la. An ka kan k’an janto sigiɲɔgɔnw fana la. An ka kɔrɔsili kɛ ko an t’u kɔnɔgwanna gwansan.—2 Kɔr. 6:3, 4; 1 Piɛre 2:12.

⁵ Heburuw 13:16 b’an jagwɛlɛya ko an kana ɲinɛ ka ‘ko ɲuman kɛ, ka dɔ bɔ an bolo fɛɛnw la ka o di, katuguni o bɔɲɔgɔnko sarakaw ka di Ala ye.’ I kɛtɔ k’i ka soo labila kafo ka lajɛnw kama, i be cogoya ɲuman sɔrɔ k’i ka fɛɛn ɲumanw tilan ni mɔgɔ wɛrɛw ye, ani ka “Matigi bonya ni i bolofɛnw ye.”—Ntal. 3:9.