Ka waajuli kɛ ni jɛkulu ye, o be na ni ɲagali ye
1 Tuma min na a ye kalanden 70 bila ka taga waajuli kɛ, u tun ka ɲi ka kuma min fɔ, Yesu y’u kalan o la. A ye jɛkuluw labɛn k’u kɛ mɔgɔ fila fila. Ani, a ye waajuli kɛyɔrɔ yira u la. O sababu la, u ye ɲagali sɔrɔ (Luka 10:1-17). O cogo kelen na bi, ka seereya kɛ ni jɛkulu ye, o be Ala ka jama dege baara la, o b’a labɛn, ani o b’a jagwɛlɛya waajuli baara kama.
2 Diinan mɔgɔkɔrɔw be bila ɲɛ fɛ: Diinan mɔgɔkɔrɔw be bɛɛ dɛmɛ k’u seen don waajuli baara la tuma o tuma. U lɔyɔrɔ ka boon o koo la. Waajulibaara kɔrɔsibaga be labɛn kɛ waajuli kama lɔgɔkun kɔnɔ. Lɔgɔkun laban kɔni na, kitabukalan kɔrɔsibaga kelen kelen bɛɛ ka kan ka baara labɛn a ka jɛkulu kama. Tuma kelen kelen, kafodenw bɛɛ be se ka ɲɔgɔnw kunbɛn waajuli kama, i n’a fɔ La Tour de Garde kalan banni kɔ. Kitabukalan kɔrɔsibaga kelen kelen bɛɛ ka kan ka labɛn kɛ a ka jɛkuludenw kama.
3 “Cogo bɛnnen na, a ko ɲɛnabɔlen koɲuman”: Cii dira mɔgɔ min ma ka waajulibaara lajɛn ɲɛminɛ, o tigi ka kan k’a daminɛ lɛri la. O lajɛn ka kan ka dan miniti 10 wala 15 ma. A ka kan ka jɛkuluw labɛn, ani ka waajuli kɛyɔrɔ yira (fɔɔ ni kitabukalan kɔrɔsibaga lo bena a janto o koo la, i n’a fɔ a kɔnna ka fɔ cogo min na) sanni ka lajɛn kuncɛ ni delili ye. O cogo la, weleweledalaw tɛna taga ɲɔgɔnw kunbɛn caaman yɔrɔ kelen na. O be se ka dɔ bɔ an ka baara danbe la. O fana bɛnnen be Pol ka ladili ma. A ko “Fɛn bɛɛ ka kɛ cogo bɛnnen na, a ko ɲɛnabɔlen koɲuman.” (1 Kɔr. 14:40). Walisa o labɛn ka ɲɛ, fɔɔ bɛɛ ka na lɛri la o lajɛnw na. Bɛɛ ka kan ka lajɛn ɲɛminɛbaga ka ladiliw sira tagama, ani bɛɛ ka kan ka jɛnsɛn ka taga joona waajuli kɛyɔrɔ la ni lajɛn banna.
4 An ka magwɛrɛ ɲɔgɔnw na kelenya la: Jɛkulu waajuli be sababu ɲuman di an ma walisa an ka ɲɔgɔnw lɔn kafo kɔnɔ. Basi t’a la n’an kɔnna ka labɛn kɛ ni mɔgɔ dɔ ye walisa ka waajuli kɛ ɲɔgɔn fɛ. An fana be se ka nafa sɔrɔ a la n’an nana lajɛn na k’a masɔrɔ an ma kɔn ka labɛn kɛ ni mɔgɔ dɔ ye. U be se k’a ɲini an fɛ an ka waajuli kɛ ni mɔgɔ dɔ ye, an tɛ min lɔn koɲuman. O sababu la, an bena an ka “kanuya bonya” an balimaw ta fan fɛ.—2 Kɔr. 6:11-13.
5 Jɛkulu seereya b’an jagwɛlɛya. A b’a to an be magwɛrɛ ɲɔgɔnw na i ko ‘jɛnɲɔgɔnw tiɲɛ baara la.’ (3 Yuh. 8). An k’an seen don a la a ɲɛ ma!