Labɛn kura min kɛra walisa an ka segi lajɛnbaw ka kalan kan
Komi Sitanɛ ka duniɲa be juguyara ka taga, Jehova be barika don an na walisa an ka “ban Ala ɲɛsiranbaliya ni nin diɲɛ nege juguw ma, ka taama nin waati la ni hakili sigilen ni tilennenya ni Ala ɲɛsiran ye.” (Tite 2:12). A be labɛn minw kɛ “Jɔnkɛ dannamɔgɔ hakiliman” bolo fɛ, u dɔw ye tile fila ni tile kelen lajɛnbaw kalanw ye saan o saan (Mat. 24:45). O hakilimaya lajɛnw be barika don an na dɛ!
An be kalan min sɔrɔ o lajɛnbaw la, walisa k’an dɛmɛ an k’an hakili to a la ani k’a sira tagama, labɛn kura dɔ kɛra segikanni kama. An bena baara kɛ n’o labɛn kura ye waajulibaara saan 2005 kɔnɔ. Barokun dɔw be sɔrɔ sɛbɛ nin ɲɛɛ 5-6nan na. U be kɔn k’a yira kalan min bena di, ani ɲiningali minw bena bila segikanni kama. Ka kɔn u ka lajɛnbaw ɲɛ, ani lajɛnbaw tɛmɛnen kɔ, kafow bena o kunnafoni lajɛ waajuliko lajɛn na. O bena kɛ cogo juman na?
Lɔgɔkun kelen wala fila ka kɔn tile fila lajɛnba ɲɛ, waajuliko lajɛn na, kafo bena tɛmɛ barokun “Tile fila lajɛnba ka kalan kura” fɛ ka kalan dɔ di miniti tan kɔnɔ walisa ka lajɛnba diya don mɔgɔw la. Kalankɛla bena mɔgɔw hakili sama fana ka taga segikanni ɲiningaliw kan. Ani, a bena bɛɛ jagwɛlɛya u ka hakilinataw sɛbɛ lajɛnba la walisa k’u yɛrɛw labɛn segikanni kama. O segikanni bena kɛ lajɛnba tɛmɛnen kɔ lɔgɔkun damanin.
Lajɛnba tɛmɛnen kɔ lɔgɔkun damanin, waajuliko lajɛn na, segikanni dɔ bena kɛ lajɛnba ka tile fɔlɔ kalan kan miniti 15 kɔnɔ. Lɔgɔkun nɔfɛta kɔnɔ, kafo bena segi tile filanan ka kalan kan miniti 15 wɛrɛw kɔnɔ. Ɲiningali minw dira sɛbɛ nin kɔnɔ, kafo bena basigi olu kan k’o segikanni baro kɛ. Segikanni ka kan ka sinsin lajɛnba kalan nafa kan. Walisa ka wagati sɔrɔ o segikanniw kama, diinan mɔgɔkɔrɔw be se ka waajuliko lajɛn yɔrɔ dɔw surunya, k’u bɔ yen, wala k’u bila lɔgɔkun wɛrɛ kɔnɔ.
O labɛn kelen lo ka kan ka kɛ tile kelen lajɛnba kalan kama. Nka o la, segikanni bena kɛ lajɛnba kalan kuru bɛɛ kan miniti 15 kɔnɔ lɔgɔkun kelen dɔrɔn. An bɛɛ ka kan ka sɛbɛ nin lankana mara ani ka baara kɛ n’a ye walisa ka nafa bɛrɛbɛrɛ sɔrɔ Jehova ka kalan ɲuman na.—Esayi 48:17, 18.