Hakilijigi seli wagati: baaraba kɛwagati lo
1 Galen, Israɛldenw tun be lajɛn Jehova ka seli dɔw kama wagati tigitigi dɔw la saan kɔnɔ (Lev. 23:2). U tun mana wagati ta ka miiri u ka Ala ka ɲumanya kan, u tun be ɲagali kosɔbɛ, ani o tun b’u lasun u be kisɛya batoli saniman kɛli la.—2 Tilew Kib. 30:21–31:2.
2 O cogo kelen bi, Hakilijigi seli wagati ye ɲagali wagati ye. Saan o saan, kafo ka baara be gwan o wagati la. O wagati la, an be miiri kosɔbɛ Jehova ka nili nafamanba kan, a ye min kɛ an ye: a Dencɛ kelenpe bangelen ( Yuh. 3:16; 1 Piɛre 1:18, 19). Jehova n’a Dencɛ ye kanuya min kɛ an ye, n’an be miiri o kan, o b’an lasun an ka Jehova tando ani an k’an jija a sago kɛli la.—2 Kɔr. 5:14, 15.
3 Ɲinan, Matigi ka surafana seli bena kɛ lamisalon, marisikalo tile 24nan na, tileben kɔ. Cogo juman na an be se ka dɔ fara an ka waajuli baara kan marisi ni awirili ni mɛkalo la?
4 An k’a ɲini ka seereya di mɔgɔ caamanba ma: Waajuli kɛtɔ, an ka sababuw ɲini ka seereya di mɔgɔ caamanba ma. Yala i be se ka labɛn kɛ walisa ka taga waajuli kɛ daa ni daa la, tuma min na mɔgɔ caaman be yen u ka soo wa? O be se ka kɛ tileben tuma na, wala suu fɛ. Ni aw ka jɛnkuluden dɔw b’a fɛ ka waajuli kɛ ka kɔn kitabukalan lɛri ɲɛ, o la, kitabukalan kɔrɔsibaga be se ka labɛn kɛ walisa lajɛn fitinin dɔ ka kɛ waajulibaara kama kiin kɔnɔ.
5 Mɔgɔ caaman be se ka sɔrɔ cogoya wɛrɛ la: n’an be waajuli kɛ foroba yɔrɔw la. Zapɔn jamana na, balimamuso dɔ tun b’a fɛ ka kɛ piyɔniye kɔrɔsigi ye k’a sɔrɔ a tun be baloɲini baara la tile kuru bɛɛ kɔnɔ. Diinan mɔgɔkɔrɔ dɔ ye ladili di a ma ko loon o loon, sanni a ka taga baara la, a be se ka seereya di mɔgɔw ma sirada la tɛrɛn gari gɛrɛfɛ. Fɔlɔ, a y’a daminɛ ka see sɔrɔ a ka sigasigali miiriya kan ani tɛrɛn tabagaw ka yɛlɛ kan. O kɔ, a ye zurunali disira 40 sigi sen kan. U dɔw yɛrɛ tun ye tɛrɛn tabaga dɔw ye, ani tɛrɛn baarakɛlaw, ni bitiki tigi dɔw, minw be tɛrɛn gari gɛrɛfɛ. Kalo kelen kɔnɔ, a tun be zurunali 235 ɲɔgɔn to mɔgɔw ye. A kɛtɔ ka baro kɛ ni mɔgɔw ye Bibulu kɔnɔnako dɔw kan wagati dɔɔni kɔnɔ loon o loon, a sera ka bibulukalan wɔɔrɔ daminɛ.
6 An be se ka tɛmɛ sababu minw fɛ ka seereya di mɔgɔw ma: Weleweledala minw ye lakɔlidenw ye, kɔnze ni vakansi b’u caaman fɛ saan kɔnɔ. O be se ka kɛ sababu ɲumanw ye u fɛ u be piyɔniye kɔrɔsigi baara kɛ. U fana be se ka dɔ fara u ka waajuli baara kan n’u be seereya di lakɔliso la. Kerecɛn kamalenw ni sunguruw, a be se ka bari aw la k’a ye ko aw filankuruw b’a fɛ ka aw ka lannakow lɔn. Aw be baro wala baara minw kɛ kalanso kɔnɔ, mun na aw tɛ tɛmɛ o sababuw fɛ ka seereya di u ma? Dɔw sera k’o kɛ n’u ye Sosiyete ka videwow yira lakɔliso. Dɔw ye bibulukalanw daminɛ n’u lakɔli filankuruw ye, ani u y’u dɛmɛ ka ɲɛtaga sɔrɔ fɔɔ ka taga se batise ma. O ye cogoya ɲumanw ye, minw b’an dɛmɛ ka Jehova tɔgɔ tando.—Zab. 148:12, 13.
7 An be mɔgɔ minw kunbɛn tile kɔnɔ, an ka cogoyaw ɲini ka kuma u fɛ an ka Ala cɛɲumanba koo la ani a ka layidu kabakomanw koo la. Balima dɔ be tɛrɛn kelen ta loon o loon ni mɔgɔ wɛrɛw ye. A be seereya di u ma ni koow cogoya bɛnnen be. Ɲɛyirali fɛ, tuma min na a tun be tɛrɛn nata kɔnɔna gari dɔ la, a tun be seereya di kamalen dɔ ma miniti looru ɲɔgɔn kɔnɔ loon o loon. A laban, o kamalen n’a baarakɛɲɔgɔn dɔ sɔnna ka bibulukalan daminɛ. O kalan tun be kɛ tɛrɛn kɔnɔ. Musokɔrɔba dɔ tun be to k’u ka baro lamɛn. A ma mɛn, a magwɛrɛla balimacɛ la k’a fɔ a ye ko ale be bibulukalan fɛ. Kalan be kɛra n’ale fana ye loon minw na a be tɛrɛn ta. O cogo la, balimacɛ ye kalan kɛ ni mɔgɔ tan ye tɛrɛn kɔnɔ.
8 Nka ni kɔrɔya wala kɛnɛyako ye dɛsɛ bila i kan do? O bɛɛ n’a ta, i be se ka cogoya sɔrɔ ka dɔ fara i ka baara kan ka Jehova tando. Yala i ye waajuli kɛ k’a filɛ telefɔni fɛ wa? N’i t’o kɛcogo lɔn, i k’a fɔ i ka kitabukalan kɔrɔsibaga ye. A be se ka labɛn kɛ walisa i ka baara kɛ ni weleweledalaw ye, minw be waajuli kɛcogo lɔn telefɔni fɛ. N’i be jɛn ni dɔw ye ka baara kɛ, aw bena se ka hakili di ɲɔgɔnw ma, ani aw bena ɲɔgɔnw dɛmɛ ka seereya di mɔgɔw ma bɛrɛbɛrɛ. Waajuli be kɛ telefɔni fɛ cogoya min na, ladili ɲumanw dira o koo la An ka Masaya Cidenyabaara ɲɛɛw 5-6nan kɔnɔ, saan 2001, feburukalo ta.
9 Ni mɔgɔ kuraw sɔnna ka na Hakilijigi seli la, o be se k’u jagwɛlɛya u ka dɔ fara u ka Jehova tandoli kan. N’a sɔrɔ u be se ka siran k’u seen don waajuli baara la bɛɛ ɲɛ na. I be se k’u dɛmɛ u ka see sɔrɔ o siranya kan i kɛtɔ ka waajuli wale dɔw lakali u ye walisa k’u jagwɛlɛya. I fana be se k’u dege dɔɔni dɔɔni olu yɛrɛ ka Bibulu kalansiraw ɲɛfɔ ani u k’u ka lanaya lafasa mɔgɔw ɲɛ na (1 Piɛre 3:15). Ni kalanden dɔ y’a yira ko a nege b’ale la k’a daminɛ ka kibaro duman weleweleda, i k’a fɔ diinan mɔgɔkɔrɔw ɲɛbila ye. Ale bena labɛn kɛ, diinan mɔgɔkɔrɔ dɔw bena ɲɔgɔnye kɛ n’o kalanden ye walisa k’a filɛ n’a be se ka jɛn ni kafo ye k’a seen don waajuli baara la bɛɛ ɲɛ na. Siga t’a la, Jehova dusukun bena diya k’a ye ko mɔgɔ kuraw be tugu ale kɔ k’a kɔrɔta i ko duniɲa kuru bɛɛ Masaba.—Ntal. 27:11.
10 Yala i be se ka kɛ piyɔniye kɔrɔsigi ye wa? Piyɔniye kɔrɔsigi baara sarati ye ka lɛri 50 sɔrɔ. O sarati ka kan ka jati sɔbɛ la (Mat. 5:37). O kɔrɔ ko i ka ɲi k’i labɛn ka lɛri 12 ɲɔgɔn kɛ waajuli la lɔgɔkun o lɔgɔkun. Piyɔniye kɔrɔsigi baara labɛnsira dɔw be sɔrɔ sɛbɛ nin ɲɛɛ 5nan na. Yala u la kelen be bɛn i ka koow cogoya ma wa? N’o si ma bɛn i ma, yala i be se k’i tɔgɔla labɛnsira kɛ walisa i ka se ka kɛ piyɔniye kɔrɔsigi ye marisi, awirili, wala mɛkalo la wa? I ka Jehova deli a k’i ka jijali kɛli duga walisa i ka se ka dɔ fara i ka waajuli baara kan.—Ntal. 16:3.
11 Diinan mɔgɔkɔrɔw ni kɔrɔsigi cidenw bena i dɛmɛ a ɲɛ ma i k’i jija ka tandoli kabakoman lase Jehova ma ɲinan ka Hakilijigi seli wagati la. N’a sɔrɔ u caaman bena kɛ piyɔniye kɔrɔsigiw ye. Diinan mɔgɔkɔrɔw bena lajɛn wɛrɛw labɛn waajuli baara kama ka kɛɲɛ ni kafodenw makoya ye. O lajɛnw be se ka kɛ tileben tuma na, suu fɛ lɔgɔkun kɔnɔ, ani samedi ni dimansi. N’u b’a fɛ k’o lajɛnw kɛyɔrɔ n’u kɛwagati latigɛ, ani jɔn labilanen bena kɛ k’u ɲɛminɛ, diinan mɔgɔkɔrɔw ka kan ka baro kɛ o kan ni balimaw ye, minw ye labɛn kɛ piyɔniye baara kama, wala minw be miirila o baara koo la. O kɔ, u ka kan k’u jija ka koow labɛn walisa weleweledalaw labilanen ka sɔrɔ ka waajuli kɛ ni aw ye loon minw na ani wagati minw na aw y’a latigɛ ka taga waajuli kɛ. O cogo la, labɛnsira bɛrɛbɛrɛw be se ka kɛ, ani baara ɲuman be se ka kɛ waajuli la.—Ntal. 20:18.
12 I k’i seko bɛɛ kɛ: N’i ka koow cogoya kosɔn i tɛ se ka kɛ piyɔniye kɔrɔsigi ye, i k’i hakili to a la ko Jehova be sɔn an ka jijaliw kɛli n’an ka sarakaw la ‘ka kɛɲɛ ni an bolo ta ye, nka fɛɛn min t’an bolo, o sen t’a la.’ (2 Kɔr. 8:12). Jehova fo sababuw ka ca an bolo. Joo tun be Dawuda fɛ k’a sɛbɛ ko: “Ne be barika da Matigi [ Jehova, NW ] ye tuma bɛɛ. Ne da na a tanuli dɔnkili da tuma bɛɛ.” (Zab. 34:2). An fana k’an cɛsiri k’o ɲɔgɔn kɛ ɲinan ka Hakilijigi seli wagati la.
[Kalan ka ɲiningaliw]
1. Ala ɲɛsiran tun be Israɛlden minw na, Jehova ka seliw tun be nɔɔ juman to u la?
2, 3. Mun na a bɛnnen be an ka dɔ fara an ka waajuli baara kan Hakilijigi seli wagati la? O seli bena kɛ tuma juman na ɲinan?
4, 5. (a) Mun lo ye mɔgɔ dɔw dɛmɛ u sera ka kibaro duman lase mɔgɔ caaman ma? (b) Aw ka sigida la, aw be se ka sanga sɔrɔ waajuli la cogo juman na?
6. Cogo juman na kamalenw ni sunguruw be se ka dɔ fara u ka baara kan Alako ta fan fɛ?
7. (a) Cogo juman na balimacɛ dɔ tɛmɛna sababu dɔw fɛ ka seereya di mɔgɔw ma? (b) Yala aw fana ye o wale ɲɔgɔn kɛ ka ye wa?
8. Kɔrɔya wala kɛnɛyakow ye dɛsɛ bila mɔgɔ minw kan, waajuli kɛcogo juman be se k’u dɛmɛ ka dɔ fara u ka waajulibaara kan?
9. Cogo juman na an be se ka mɔgɔ kuraw dɛmɛ u k’u ka koow dafa walisa ka jɛn ni kafo ye waajuli baara la?
10. (a) Cogo juman na labɛnsira ɲuman be se k’an dɛmɛ ka piyɔniye kɔrɔsigi baara kɛ? (b) Yala i tun sera k’i labɛn ka piyɔniye kɔrɔsigi baara kɛ Hakilijigi seli wagati la salon wa? I y’a kɛ cogo juman na?
11. Cogo juman na diinan mɔgɔkɔrɔw ni kɔrɔsigi cidenw bena se ka piyɔniye kɔrɔsigiw dɛmɛ?
12. Mun lo b’an lasun ka Jehova tando tuma bɛɛ?
[Koorilen ɲɛɛ 3 kan]
Cogo juman na i bena dɔ fara i ka waajuli baara kan?
◼ I ka waajuli kɛ tuma min na mɔgɔw be yen u ka soo
◼ I ka waajuli kɛ foroba yɔrɔw la
◼ N’a dagalen be, i ka waajuli kɛ baarakɛyɔrɔ la wala lakɔliso la
◼ I ka waajuli kɛ telefɔni fɛ
◼ I ka kɛ piyɔniye kɔrɔsigi ye
[Jaa ɲɛɛ 5 kan]
Piyɔniye kɔrɔsigi baara labɛncogo dɔw: Lɛri 12 be se ka sɔrɔ waajuli la cogo min na lɔgɔkun o lɔgɔkun
Sɔgɔma: Ntɛnɛlon ka taga se samedi ma
Dimansi be se ka bila loon wɛrɛ nɔɔ na
Loon Wagati Lɛriw