An be to ka zurunaliw di mɔgɔ minw ma, an ka bibulukalan nege don u la
1 Waajuli kɛtɔ, mɔgɔ caaman b’an bisimila ani u be sɔn an ka gafew la ni dusudiya ye. Nka, u caaman be sigasiga ka sɔn bibulukalan na. An be se ka kalan nege don u la n’an be to ka taga zurunaliw di u ma tuma o tuma. An mana zurunaliw to mɔgɔ dɔ ye, an k’a tigi tɔgɔ n’a ladɛrɛsi ani o loon sɛbɛ. An ye zurunali nimɔrɔ minw di a ma, ka baro kɛ vɛrise min kan, an k’o sɛbɛ. An ye koo o koo kɔrɔsi min b’a yira ko a tigi b’a mako don, an k’o fana sɛbɛ. An mana nimɔrɔ kura wɛrɛw sɔrɔ, an ka barokun dɔw ɲini u kɔnɔ, minw bena diya a tigi ye. Ani an k’u yira a la n’an tagara bɔ a ye (1 Kɔr. 9:19-23). Loon be loon na, a bena koo dɔ kalan an ka zurunaliw kɔnɔ min bena a lasun a k’a ɲini ka dɔ fara a ka lɔnniya kan.
2 Mɔgɔ caaman b’an ka zurunaliw kalan u yɛrɛ ma. Nka, an b’a lɔn k’o dɔrɔn tɛna a to u caamanba bena kɛ Jehova sagokɛlaw ye. Kɔrɔtɔ b’a la mɔgɔw ka Jehova ɲini sisan. O kama, an be se ka koo wɛrɛ juman kɛ k’u dɛmɛ? (Sofoni 2:2, 3; Jira. 14:6, 7) An be se ka kalan nege don u la n’an be taga zurunaliw di u ma tuma o tuma, ani n’an be vɛrise dɔ ɲɛnatɔmɔ koɲuman k’a kalan u ye.
3 An ka baro kelen-kelen basigi vɛrise kelen dɔrɔn kan: An delila ka zurunaliw di mɔgɔ minw ma, an ka miiri u koo la. Vɛrise min be bɛn u kelen-kelen bɛɛ ka cogoya ma, an k’o ta ka baro dɔ labɛn (Filip. 2:4). Ɲɛyirali fɛ, n’a sɔrɔ dɔ ka mɔgɔ sɔbɛ dɔ sara a ma mɛɛn. Bibulu be min fɔ mɔgɔ salenw koo la ani suu kununni koo la, an be se ka segi ka na o yira a tigi la siɲɛ damanin. Gafe Comment raisonner ka barokun dɔw be kuma saya ni suu kununni koo la. U be se k’an dɛmɛ ka baro dɔ labɛn, an be min basigi vɛrise kelen dɔrɔn kan. O sen fɛ, an bena kuma koo wɛrɛw fana kan i n’a fɔ: bana, kɔrɔya ni saya bena ban pewu cogo min na. An ka laɲinita ye ka barokun dɔ sɔrɔ min ka di a tigi ye, ani an k’a yira dɔɔni dɔɔni Bibulu be min fɔ o koo la.
4 An k’a tigi dɛmɛ ka faamuyali kɛ: Tuma caaman na, a ka fisa n’o barow ka nɔgɔ ani u ka surun. O bɛɛ n’a ta, an tun ye vɛrise min ɲɛnatɔmɔ, an man kan ka dan o kalan ma dɔrɔn. Sitanɛ ye mɔgɔw hakili fiyen walisa u kana kibaro duman faamu (2 Kɔr. 4:3, 4). Hali mɔgɔ minw be Bibulu lɔn, u mako be dɛmɛ la walisa k’a faamu (Kew. 8:30, 31). O kama, an ka wagati ta k’o vɛrise ɲɛfɔ ani k’a ɲɛyira i n’a fɔ n’an tun b’a kɛra Ala ka Mara cidenyabaara lakɔli la (Kew. 17:3). An k’a sɛgɛsɛgɛ k’a filɛ n’a tigi ɲɛɛ be Ala ka Kuma nafa la a ka ɲɛnamaya kɔnɔ.
5 A tigi be koo minw kalanna, n’u ka di a ye, an ka baro dunya an kɛtɔ ka vɛrise fila wala saba fara a kan viziti o viziti kɛtɔ. An ka cogoya dɔ ɲini ka baro yɛlɛma kitabunin Ɲini wala gafe Dɔnniya kɔnɔ. O cogo la, mɔgɔ minw delila ka zurunaliw ta, u be se ka laban ka sɔn bibulukalan na.
[Study Questions]
1. An be to ka taga zurunaliw di mɔgɔ minw ma, cogo juman na an be se ka bibulukalan nege don u la?
2. Mun na kɔrɔtɔ b’a la mɔgɔw ka Jehova ɲini sisan, ani an be se ka koo wɛrɛ juman kɛ k’u dɛmɛ?
3. (a) Cogo juman na an be se ka basigi vɛrise kelen kan ka baro dɔ labɛn? (b) I ka kiin na mɔgɔw ka haminanko fɔlɔw ye koo jumanw ye?
4. N’an be vɛrisew kalan mɔgɔw ye, mun na a kɔrɔtalen be an k’u dɛmɛ ka faamuyali kɛ? An be se k’o kɛ cogo di?
5. Mɔgɔ minw delila ka zurunaliw ta, cogo juman na u be se ka laban ka sɔn bibulukalan na?