An be deli ka zurunaliw di minw ma: Bibulukalan daminɛ n’u ye

1. Minw be deli k’an ka zurunaliw kalan, mun na u b’an jija kabi tumajan ko an ka to ka taga zurunali kuraw di u ma?

¹ Mɔgɔ caaman labɛnnin tɛ ka kalan kɛ n’an ye, nka an ka zurunaliw kalan ka di u ye. O lo kama, kabi tumajan Jehova ka ɔriganisasiyɔn be an jija ko an ka zurunaliw ka di minw ye, an ka to ka taga u di olu ma. Mɔgɔw kɛtɔ k’an ka zurunaliw kalan tuma o tuma, Ala ka Kuma nege ka teli k’u minɛ (1 Piyɛri 2:2). A laban, u be se ka fɛɛn dɔ kalan min bena diya u ye ani k’a to u be sɔn bibulukalan na.

2. An be deli ka zurunali kuraw di minw ma, an be se ka kalan nege don olu la cogo di?

² Tiɲɛn kisɛw “sɔn jii la”: Sanni i ka taga zurunaliw di mɔgɔ ma ani k’i kɔɔ don kelen, i k’a ɲini ka baro kɛ n’a tigi ye walisa k’a lɔn ka ɲɛ. O lo bena i dɛmɛ k’a tigi ka koow cogoya n’a ka lannakow ni a ɲɛnakow lɔn. O la, i bena hakili sɔrɔ n’i be kumana n’a ye (Talenw 16:23). I yɛrɛ labɛn viziti kura kelen kelen bɛɛ kama. Tiɲɛn kisɛ minw b’a dusukun na, i k’u sɔn jii la: n’a be se ka kɛ, i ka hakilinata dɔ yira a la zurunali kɔnɔ ani vɛrise min ɲɛsinna o ma fana (1 Kor. 3:6). I ye viziti kuraw kɛ loon minw na, i ye gafe minw to a tigi fɛ, aw ye baro minw kɛ ani ka vɛrise minw lajɛ, i ka to k’u bɛɛ sɛbɛ.

3. An be deli ka zurunaliw di minw ma, an ka ɲi ka kɔsegi ka taga bɔ u ye siɲɛ joli?

³ An ka ɲi ka taga bɔ u ye siɲɛ joli? I ka ɲi ka taga bɔ u ye siɲɛ kelen kalo la walisa ka zurunali kuraw di u ma. Nka, ni see b’i ye ani n’a tigi b’a mako don, waajibi tɛ i ka dan siɲɛ kelen dɔrɔn ma. Ɲɛyirali fɛ, lɔgɔkun kelen wala fila tɛmɛnin kɔ, i be se ka kɔsegi a tigi fɛ ani k’a fɔ a ye ko: “N’ tɛmɛtɔ lo. N’ ye zurunali minw to i fɛ o loon na, n’ tun b’a fɛ ka fɛɛn dɔ yira i la u kɔnɔ.” O bena o barokun kalan nege don a la. N’a tigi y’a kalan ka ban, i be se k’a ɲininga a be fɛɛn min miiri o koo la ani i be se ka baro kɛ n’a ye dɔɔni. N’an ka gafew kalan ka di a tigi ye, i be se ka dɔ di a ma: sɛbɛnin, kitabunin wala gafe dɔ, i be min yirala mɔgɔw la o kalo la.

4. An be deli ka zurunaliw di minw ma, an be se ka mun lo kɛ tuma kelen kelen walisa k’a lɔn n’u bena sɔn ka kalan kɛ n’an ye?

⁴ Kana kɔnɔni kɛ fɔɔ a tigi yɛrɛ lo be bibulukalan ɲini i fɛ. E yɛrɛ ka kɔn ka kalan kofɔ a ye. Hali n’a tun kɔnna ka ban bibulukalan na, tuma kelen kelen i be se ka La Tour de Garde ka barokun nin yira a la: “ Questions bibliques ”. Ani, i k’a filɛ n’a bena sɔn k’o lajɛ n’i ye. N’a sɔrɔ, i be se ka kalan daminɛ n’a ye a ka soda la. Hali n’i ma se k’o kɛ, i ka to ka taga zurunali kuraw di a ma walisa ka Alakow diya don a la.