An ka duniɲa ka yeelen kofɔ mɔgɔw ye
1 Jehova y’a fɔ cira Esayi daa fɛ ko: “Siya minnu tun bɛ taama dibi la, olu ye kɛnɛba ye. Minnu sigilen tun bɛ jamana dibiman kɔnɔ, kɛnɛ bɔra olu ye.” (Esayi 9:1). O “kɛnɛba” yera Ala Dencɛ Yesu Kirista ka kɛwalew fɛ. Yesu tun be dugukolo kan tuma min na, a ka waajuli baara n’a ka saraka nafa ye dibilamɔgɔw ka cogoya fisaya Alako ta fan fɛ. Mɔgɔw mako be o yeelen ɲɔgɔn na bi wagati dibiman na. Matigi ka surafana be cogoya ɲuman di an ma ka “diɲɛ ka kɛnɛ” kofɔ mɔgɔw ye (Yuh. 8:12). Yesu tun ye cii di ko: “A’ ye nin kɛ walisa ka aw hakili to ne la.” Salon, mɔgɔ miliyɔn caaman wɛrɛw farala an kan k’o cikan bato. O cogo la, u y’a yira ko lanaya dɔ b’u la (Luka 22:19). Komi ɲinan ka Hakilijigi lajɛn wagati be surunyana, an bena mun lo kɛ walisa ka Jehova ka yeelenba kofɔ mɔgɔw ye?—Fil. 2:15.
2 An ka waleɲumanlɔnya degi: Hakilijigi wagati be sababu ɲuman di an ma an ka miiri Jehova ni Yesu ka kanuyaba kan: olu ye kunmabɔ saraka di hadamadenya kosɔn (Yuh. 3:16; 2 Kɔr. 5:14, 15). O miirili bena dɔ fara an ka waleɲumanlɔn kan o koo senuman ta fan fɛ. Gafenin Examinons les Écritures chaque jour be Bibulu yɔrɔ dɔw yira minw ɲɛsinna Hakilijigi koo ma. Ala sagokɛlaw bɛɛ ka kan ka wagati latigɛ walisa k’u kalan ani ka miiri u kan. Jehova ka jogow ɲɔgɔn tɛ yen. A y’u yira cogo cɛɲumanba la, a kɛtɔ ka kunmabɔ saraka di. N’an be miiri o kan, an be kunkɔrɔta sɔrɔ, sabu ale lo ye an ka Ala ye. Kunmabɔ saraka kɔrɔ ye min ye an fɛ, n’an be miiri o kan, an bena Ala n’a Dencɛ kanu ka dunya ni kɔnɔgwɛ ye. O fana bena an lasun an k’an seko bɛɛ kɛ Ala sago kɛli la.—Gal. 2:20.
3 Jehova ye labɛn min kɛ an ka kisili kosɔn, n’an b’o waleɲuman lɔn kosɔbɛ, Hakilijigi dusudiya bena an lasun ka o kofɔ Bibulu kalandenw ye, an somɔgɔw ye, an sigiɲɔgɔnw ye, lakɔli filankuruw ye, minw be to ka na bɔ an ye, ani an bena mɔgɔ wɛrɛ minw weele o lajɛn kɛrɛnkɛrɛnnin kama (Luka 6:45). O kama, an ka jijaliba kɛ ka sɛbɛ di u bɛɛ ma walisa u kana ɲinɛ an ka welekan kɔ. Balima caaman delila ka mɔgɔ dɔw weele o lajɛn na. Walisa u kana ɲinɛ mɔgɔ si kɔ, u y’a ye ko nafa b’a la k’u bɛɛ tɔgɔ sɛbɛ ani ka mɔgɔ kura wɛrɛw tɔgɔ fara a kan saan o saan. N’an b’an yɛrɛ labɛn o cogo la, ani n’an b’an seko bɛɛ kɛ ka makodon mɔgɔw weele ka na Hakilijigi lajɛn na, an bena a yira o cogo la ko an be Jehova Ala waleɲuman lɔn kosɔbɛ “a ka nili fɛnba kosɔn min ɲɔgɔn tɛ!”—2 Kɔr. 9:15.
4 An ka dɔ fara an ka waajuli baara kan: Marisi ni awirili kalow la, yala aw be se ka dɔ fara aw ka waajuli baara kan wa? N’an b’an jija ka Kirista ka “nɔɔrɔ Kibaru Duman” kofɔ mɔgɔw ye, siga si t’a la, Ala bena an baraji. Hakilimaya yeelen bɛɛ be bɔ Jehova lo yɔrɔ. Ale lo ye cii di ko: “kɛnɛ ka bɔ dibi la.” (2 Kɔr. 4:4-6). Diinan mɔgɔkɔrɔw bena lajɛn wɛrɛw labɛn waajuli kama. U ka ɲi ka lɛriw ni yɔrɔw sugandi ka bɛn ni weleweledalaw mako ye. U fana ka ɲi ka ɲɛyirali di kafodenw ma, u kɛtɔ ka balimaw bila sira n’u b’a fɛ ka dɔ fara u ka waajuli baara kan. U bena labɛn kɛ waajuli kama sirada la sɔgɔmada joona fɛ, wala jagokɛyɔrɔw la, ani telefɔni na wula fɛ, wala fitirida fɛ. N’an b’a fɛ ka dɔ fara an ka waajuli baara kan, an ka lɛri daa kɛɲɛnen dɔ latigɛ, ani an k’an seko bɛɛ kɛ k’o sɔrɔ. Balima caaman b’u seko fisaman di Jehova ma, u kɛtɔ ka piyɔniye kɔrɔsigi baara kɛ.—Kɔl. 3:23, 24.
5 Yala i be se ka kɛ piyɔniye kɔrɔsigi ye wa? A saan wolonfila ye nin ye, dɔ bɔra piyɔniye kɔrɔsigiw ka lɛri daa la. O yɛlɛmani kɛra sababu ye weleweledala caaman wɛrɛw sera ka baraji sɔrɔ fana piyɔniye kɔrɔsigi baara la. Yala i y’o kɛ ka ye wa? Dɔw y’o kɛ u delinanko ye saan o saan. Yɔrɔ caaman na, weleweledala caaman be jɛn k’o baara kɛ ɲɔgɔnw fɛ. O sen fɛ, kafo ka baara be cayaliba sɔrɔ saan kɔnɔ. Hakilijigi wagati la, yala i be se ka kalo dɔ labila piyɔniye kɔrɔsigi baara kama wa? O bena kɛ ɲagali sababu ye i fɛ dɛ! Awirilikalo kɔni bena bɛn an dɔw ma, sabu samedi ni dimansi looru b’o kalo kɔnɔ.
6 Yala kafokulu kɔrɔsibaga bena bɔ aw fɛ marisi wala awirili kalow la wa? N’o lo, sababu ɲuman dɔ bena di aw ma. A tun fɔra ko waajuli baara saan 2006 kɔnɔ, kafokulu kɔrɔsibaga mana minw sɔrɔ piyɔniye kɔrɔsigi baara la, olu bena se ka taga kudayi piyɔniyew ka lajɛn yɔrɔ fɔlɔ la, danna lɔgɔkun kɔnɔ. O lajɛn na, jagwɛlɛya kuma dɔw bena di piyɔniyew ma Alako ta fan fɛ. Siga t’a la, u bena piyɔniye kɔrɔsigi caaman lasun k’a ɲini ka kɛ kudayi piyɔniyew ye. Ka fara o kan, marisikalo la, an bena ɲagali ka gafe kura Qu’enseigne réellement la Bible ? kofɔ mɔgɔw ye. O bena u dɛmɛ u ka na Ala ka yeelen na. An k’a ɲini ka bibulukalan daminɛ n’o gafe kura ye.
7 Piyɔniye kɔrɔsigiw ka sarati ye lɛri 50 ye. I kɛtɔ ka miiri o kan, i k’a filɛ porogramu juman bena i dɛmɛ ka tiɲɛn yeelen bɔ lɛri 12 ɲɔgɔn kɔnɔ lɔgɔkun na. Mɔgɔ minw sera k’o kɛ, i ka baro kɛ n’olu ye ani mɔgɔ wɛrɛw fana ye. O be se k’u jagwɛlɛya ka na fara i kan. Denmisɛnw fara mɔgɔkɔrɔw kan, weleweledala dɔw ye labɛn ɲuman kɛ, ani u y’a ye ko a man gwɛlɛ kojugu k’o kɛ. O laɲinita ka kan ni tandoli ye. A’ ye delili kɛ o kama. O kɔ, n’a be se ka kɛ, a y’a daminɛ kelen. Ani, ninsɔndiya min be piyɔniye baara la, a’ y’o diya bɔ ka filɛ!—Mal. 3:10.
8 Denbaya caaman y’a ye ko ɲɔgɔndɛmɛ sababu fɛ, gwa kɔnɔ, mɔgɔ kelen kɔni be se k’o laɲinita dafa. Denbaya dɔ kɔnɔ, weleweledala batiselen looru y’a latigɛ ka kɛ piyɔniye kɔrɔsigiw ye. Deen fila minw tun ma batise fɔlɔ, olu y’u jija ka dɔ fara u ka baara kan. O denbaya ye nafa juman sɔrɔ o jijaliba kɛli la? U y’a sɛbɛ ko: “A kɛra ninsɔndiyaba kalo ye. Tiɲɛn na, an y’a ye ko an ka jɛnɲɔgɔnya ye barika kura sɔrɔ gwa kɔnɔ. An be barika la Jehova ye o baraji cɛɲumanba kosɔn.”
9 An bena baaraba min kɛ marisi ni awirili kalow la, yala o bena barika kura don an na, ani k’an magwɛrɛ an sankolola Faa la wa? A fanba bena bɔ an yɛrɛ ka jijali kɛli la: n’an y’an ka kanuya bonya Ala n’a Dencɛ ta fan fɛ, ani n’an ye dɔ fara an ka waajuli baara kan. An k’an cɛsiri o kama i ko zaburu sɛbɛbaga ye dɔnkili la cogo min na. A y’a fɔ ko: “Ne da na Matigi tanuli dɔnkili da, k’a tanu jamaba cɛma.” (Zab. 109:30). Jehova bena an ka kisɛya kɛli duga ɲinan ka Hakilijigi wagati la. O kama, an k’a to yeelenba ka manamana walisa mɔgɔ caaman wɛrɛw ka bɔ dibi la ani ka “ɲɛnamaya kɛnɛ sɔrɔ.”—Yuh. 8:12.
[Study Questions]
1. Ala ka Kuma be yeelenba juman kofɔ? Ani, sababu juman dira an ma k’o yeelenba kofɔ mɔgɔw ye cogo kɛrɛnkɛrɛnnin na?
2. Cogo juman na an be se ka dɔ fara an ka waleɲumanlɔn kan kunmabɔ saraka ta fan fɛ? Ani, an bena nafa juman sɔrɔ o la?
3. An bena an ka waleɲumanlɔn yira cogo di Hakilijigi lajɛn koo la?
4. Mun lo be se k’an dɛmɛ ka dɔ fara an ka waajuli baara kan marisi ni awirili kalow la?
5. Dɔ bɔra piyɔniye kɔrɔsigi baara lɛri daa la. Cogo juman na o ye mɔgɔ caaman nafa?
6. Dusudiyako juman labɛnna ɲinan?
7, 8. (a) Mun lo be se k’an dɛmɛ ka kɛ piyɔniye kɔrɔsigi ye? (b) Nafa juman be ɲɔgɔndɛmɛ la gwa kɔnɔ, ani denbaya kuru bɛɛ be tɔnɔ juman sɔrɔ a la?
9. Hakilijigi wagati la, cogo juman na an be se k’a to an ka yeelen be manamana?