Tile fila lajɛnba ka kalan kura

Duniɲa b’a fɛ an ka miiri ko bi koow sigicogoya bena mɛɛn kudayi. Nka Ala ka Kuma b’o miiriya kɛlɛ (1 Yuh. 2:15-17). A b’an dɛmɛ an k’a faamu ko ka nafolo lajɛn dugukolo kan, o ye sɛgɛn gwansan lo ye. Walisa ka Ala sagokɛlaw sabati, saan 2007 ka tile fila lajɛnba bena kalan kɛ barokun nin kan: “A’ ye nafolo lajɛ . . . sankolo la.”—Mat. 6:19, 20.

Efesekaw 2:2 be min weele ko “fiɲɛ fanga . . . min bɛ baara kɛ kan bilali denw kɔnɔ sisan”, o ɲɛsinna nafolo kanuya ma fana. I ko fɔɲɔ be yɔrɔ bɛɛ la ani a sama man gwɛlɛ, o cogo kelen na, nin koow sigicogoya ye duniɲa ka miiricogo bɛɛ ta (1 Kɔr. 2:12). Komi a be nɔɔba to mɔgɔw kan, a fɔra ko a ye fangatigi ye. Tile fila lajɛnba nata ka kalan bena an dɛmɛ an ka ban duniɲa ka nafolo kanuya la, ani an k’an ɲɛɛ jɔ an ka laɲinita fɔlɔw kan (Mat. 6:33). A fana bena an dɛmɛ k’an jigi la Jehova kan walisa ka se k’an ka cidenya baara dafa hali ni gwɛlɛyaw ni kɔrɔbɔliw b’an kan.

An k’an seko bɛɛ kɛ ka sɔrɔ lajɛnba la tile fila kuru bɛɛ kɔnɔ. Ani, an k’an ‘janto kosɔbɛ’ kalan na (Heb. 2:1). An be se ka baara kɛ ni hakilinata minw ye an ka ɲɛnamaya kɔnɔ, ani cidenya baara la, an k’olu sɛbɛ ka surunya. Nin ye hakilimaya kalan nafamanba ye dɛ! N’an be sɔrɔ a daminɛ na fɔɔ ka taga se a laban na, an bena jijali ni fanga sɔrɔ walisa ka to ka “nafolo lajɛ . . . sankolo la.”