Tile fila lajɛnba ka kalan kura

Mɔgɔ minw be tiɲɛn batoli kɛlɛ ni fariya ye, cogo di an be se ka to kelen kan olu ɲɛ? Sitanɛ n’a ka jinɛw jijalen lo tuma bɛɛ walisa k’an sama ka don Ala ɲɛsiranbali duniɲa nin kɔnɔ. An be se ka see sɔrɔ u kan cogo di? Saan 2009 kɔnɔ, tile fila lajɛnba ka kalan bena o ɲiningali kɔrɔtalenbaw jaabi. A barokun ko: “I ka to ka see sɔrɔ juguya kan koo ɲuman fɛ.” (Rom. 12:21, NW ). An k’a filɛ mun lo bena kɛ porogramu kɔnɔ.

Kobe kɔrɔsibaga bena kalan ninw di: “Barika min b’an dɛmɛ ka see sɔrɔ juguya kan koo ɲuman fɛ”, “I janto, kana la i yɛrɛ la kojugu!”, “Yanni dɔɔni juguya bɛɛ bena ban!” ani “An ka barika don an ka limaniya la walisa ka see sɔrɔ duniɲa kan.” Kafokulu kɔrɔsibaga bena kalan ninw di an ma: “Sisan lo an ka ɲi ka to ɲɛɛ na!”, o basiginen lo Romɛkaw 13:11-13 kan. Ani fana “Kana i fari faga degun loon na”, o basiginen be Ntalenw 24:10 kan. An kɔrɔtɔlen lo fana ka kafokulu kɔrɔsibaga lamɛn barokun nin kan: “An k’an janto kafokulu ka makow la.” Jijali kuma bɛrɛbɛrɛw bena sɔrɔ kalan wɛrɛ nin na: “Yala i be se k’i timinandiya cidenya baara la, ka kɛ piyɔniye ye wa?” Kalankulu fila bena sɔrɔ porogramu kɔnɔ. Fɔlɔ barokun ko: “An ka lɔ kelen kan ka Sitanɛ ka nanbarakow kunbɛn.” O kalan bena an dɛmɛ ka Sitanɛ ka nanbarakow lɔn ani k’an yɛrɛ tanga u ma nin koow la: fɛɛrɛ kuraw, ɲɛnagwɛkow ani lakɔli kalan koo ta fan fɛ. Ala ka ladilikan min be sɔrɔ Efesekaw 6:10-18 kɔnɔ, kalankulu filanan bena a yira an na cogo min na an be se k’o ladili sira tagama bɛrɛbɛrɛ. A kuun ko: “An ka fanga sɔrɔ walisa ka se ka lɔ kelen kan nin loon jugu la.”

Ka juguya kɛlɛ a lili yɛrɛ la ani ka Ala ka Masaya kibaro waaju, o fila tɛ ɲɛ ɲɔgɔn kɔ (Jir. 12:17). A tɛ bali an na ni Sitanɛ be Jehova Seerew kɛlɛ tuma o tuma (Es. 43:10, 12). Nka Sitanɛ tɛna see sɔrɔ fewu sabu an cɛsirilen lo “ka to ka see sɔrɔ juguya kan koo ɲuman fɛ.” An ka labɛn tigitigi kɛ walisa ka nafa sɔrɔ bɛrɛbɛrɛ tile fila lajɛnba ka kalanw bɛɛ la.