Fanga be Ala ka Kuma na
1. Tile kelen lajɛnba nata barokun ye mun ye?
1 Bibulu tɛ i n’a fɔ adamaden dafabaliw ka fɛɛn dilanninw. See b’a ye k’an sɔɔn yɛlɛma walisa an ka miiriyaw n’an ka kɛwalew ka bɛn ni Jehova sago ye. Ala ka Kuma fanga be se hakɛ juman ma? An ka ɲɛnamaya kɔnɔ, cogo di an be se ka baara kɛ n’o fanga nin ye bɛrɛbɛrɛ? An be se ka baara kɛ n’a ye cogo di ka mɔgɔw dɛmɛ koɲuman? Tile kelen lajɛnba min bena kɛ waajuli baara saan 2014 kɔnɔ, a bena o ɲiningaliw jaabi. An lanin b’a la k’o jaabiliw bena barika don bɛɛ la Alako ta fan fɛ. A barokun ko: “Fanga be Ala ka Kuma na.” O basiginin be Eburuw 4:12 kan.
2. An ka kan k’an janto ɲiningali jumanw ka jaabiliw la?
2 A ɲini ka ɲiningali nunu ka jaabili sɔrɔ: Lajɛnba ka kalanw lamɛntɔ, a ɲini ka ɲiningali nunu ka jaabiliw sɔrɔ.
• Mun na an ka ɲi k’an jigi la Jehova ka Kuma kan? (Zab. 29:4)
• An be se ka mun lo kɛ walisa k’a lɔn fanga min be Ala ka Kuma na? (Zab. 34:9)
• Waajuli kɛtɔ, cogo juman na i be se k’a to Ala ka Kuma ka nɔɔ to mɔgɔw kan? (2 Tim. 3:16, 17)
• An be se ka mun lo kɛ walisa Sutana ka duniɲa kana an lafili? (1 Zan 5:19)
• E min ye kanbele wala sunguru ye, i be se ka mun lo kɛ walisa i ka Alakow ka ɲɛ i bolo? (Zer. 17:7)
• An be se ka fanga sɔrɔ cogo di hali k’a sɔrɔ an barika dɛsɛnin lo? (2 Kor. 12:10)
• Mun lo bena an dɛmɛ an ka to ka yɛlɛmani kɛ an ka ɲɛnamaya la hali ni sɔɔn kɔrɔ dɔw b’an na? (Efɛz. 4:23)
3. Ka fara kalanw lamɛnni kan, tile kelen lajɛnba be se k’an nafa cogoya wɛrɛ juman na?
3 N’an b’an tulo malɔ k’o kalan ɲumanw lamɛn, u bena an nafa kosɔbɛ! Ka fara o kan, i ko tile fila ani tile saba lajɛnbaw la, tile kelen lajɛnba fana bena sababu di an ma k’an ka kanuya bonya. An bena se fana k’an ka balimaya diya bɔ ni balimaw ye minw bɔra kafo wɛrɛw la (Zab. 133:1-3; 2 Kor. 6:11-13). O kama, wagati kɛ n’i teri kɔrɔw ye ani a ɲini ka teri kuraw sɔrɔ. Ni distriki kɔrɔsibaga wala Betɛli mɔgɔ dɔ lo ye aw ka kalankɛla lonan ye, i k’a ɲini ka baro kɛ dɔɔni ale n’a muso fana ye. Tiɲɛn na, dalilu caaman b’an fɛ ka kɔrɔtɔ an ka tile kelen lajɛnba ka se!