Tuma juman na an ka kan ka segi ka taga bɔ makodon mɔgɔw ye?
1. Ka mɔgɔw kɛ Krista ka kalandenw ye, o kɔrɔ ye mun ye?
1 Ka mɔgɔw kɛ Krista ka kalandenw ye, o kɔrɔ ko mɔgɔ o mɔgɔ y’a yira ko a ka di ale ye ka Jehova ka Masaya koow lɔn, an ka segi ka taga bɔ o tigi ye (Mat. 28:19, 20). Wagati min bɛnnen lo ka taga viziti kura kɛ makodon mɔgɔ fɛ, o be bɔ an ni o tigi ka porogramu lo la. Mun na an ka kan ka segi ka taga joona an ka ɲɔgɔnyeko fɔlɔ kɔ?
2, 3. Mun na an ka kan k’an jija ka segi ka taga joona?
2 Mun na an ka kan ka segi ka taga joona? Masaya “Kibaru Duman waajuli” baara janfara kosɔbɛ ani duniɲa nin ban wagati fana surunyana (Mat. 24:14; 1 Piɛrɛ 4:7). Komi “kisili don” bele labilanen be makodon mɔgɔw ye, o kama an ka kan ka tugu ladilikan nin kɔ min ko an ka ‘Ala ka kuma fɔ k’an jija a la.’ O kɔrɔ ko mɔgɔ mana a mako don, an k’an seko kɛ ka segi ka taga joona k’o tigi dɛmɛ.—2 Kɔr. 6:1, 2; 2 Tim. 4:2.
3 An mana Ala ka Masaya kisɛ fɛɛn o fɛɛn dan makodon mɔgɔ dɔ dusukun na, Sitanɛ kɔrɔtɔnen lo k’o wɔgɔbi ka bɔ yen (Marka 4:14, 15). Mɔgɔ minw b’u mako don, tuma caaman na, u somɔgɔw, u baarakɛɲɔgɔnw ani mɔgɔ wɛrɛw be to k’u lɔgɔbɔ. N’an be segi ka taga bɔ u ye joona, o b’an dɛmɛ an ka basigi baro tɛmɛnen kan k’u jija sanni mɔgɔ wɛrɛw ka se k’u fari faga.
4. An be se ka viziti kura jusigi cogo di ɲɔgɔnyeko fɔlɔ la?
4 An ka loon di ɲɔgɔn ma: Loon fɔlɔ la, sanni an ka ɲɔgɔn bila, a ka ɲi an ka labɛn tigitigi dɔw kɛ walisa ka segi ka na. An ka ɲiningali dɔ lawuli an bena min jaabi n’an segira ka na. An bena segi ka na loon min na ani an ye baro min kɛ, a kɔrɔtalen lo an k’o kunnafoniw sɛbɛ ka mara an kun. N’a bɛnnen lo an ka porogramu ma, an k’a ɲini ka segi ka na loon fɔlɔ dugusagwɛ wala dɔɔni o kɔ. N’o loon fɔlɔ bɛnna wikɛni ma, ani a tigi be baara kɛ lɔgɔkun bɛɛ kɔnɔ, n’a sɔrɔ a bena sɔn an ka segi ka na wikɛni nɔfɛta la. N’an ye loon di, an k’an jija ka kɛ kantigi ye.—Mat. 5:37.
5. N’an be teliya ka segi ka taga bɔ mɔgɔw ye, o b’an dɛmɛ cogo di ka Yesu ka cii dafa o min ye ka mɔgɔw kɛ kalandenw ye?
5 Kuun b’a la an ka segi ka taga bɔ makodon mɔgɔw ye joona. O kama, an ka loon di, ani an ka segi ka na joona sabu “wagati tɔɔ man ca tugun.” (1 Kɔr. 7:29, NW ). Mɔgɔ minw b’u mako don Masaya kibaro la, n’an be segi ka taga bɔ u ye joona, an bena nafa sɔrɔ an ka jijaliw la.