A ɲini k’i ka waajuli kɛcogo fisaya: Viziti kura juu sigicogo

Mun na a kɔrɔtanin lo: Ni mɔgɔ dɔ y’a mako don, an ka segi ka taga bɔ a ye tuma min na a be sɔrɔ soo walisa k’a dɛmɛ tugun (1 Kor. 3:6). O kama, sanni an ka bɔ a tigi kɔrɔ, an ka viziti kura juu sigi. Cogo di do? An k’a filɛ wagati min na an be se ka segi ka na. Ka fara o kan, an ka ɲiningali dɔ kɛ an bena min jaabi siɲɛ wɛrɛ. O bena a to a tigi be kɔrɔtɔ an ka kɔsegi ka na. An ye gafe min to a ye, n’an ka ɲiningali ka jaabili be sɔrɔ o kɔnɔ, a tigi bena a ɲini k’a kalan. N’an ye viziti kura juu sigi, o fana b’a to viziti kura kɛli tɛ gwɛlɛya sabu baro bena kɛ koo min kan, o lɔnnin lo ka ban ani o tɛna bari an lamɛnbaga la. N’an y’a tigi ye tugun, an be se k’a fɔ ko an nana o loon na ka ɲiningali lo jaabi. O kɔ, an ka taga ɲɛ ni baro ye.

A kɛcogo:

I bena min fɔ mɔgɔw ye soo ni soo, n’i b’o labɛnna, i ka ɲiningali dɔ labɛn fana i bena min jaabi viziti kura tuma na. I be gafe min yirala mɔgɔw la o loon na, i be se k’i ka ɲiningali basigi o kɔnɔko kan. I be se fana k’i ka ɲiningali basigi an ka kalankɛ gafe dɔ kɔnɔko kan i bena min yira a tigi la siɲɛ wɛrɛ.
Ni mɔgɔ dɔ y’a mako don ani i be baro kuncɛra, i k’a fɔ a tigi ye ko i b’a fɛ ka segi ka na baro kɛ n’a ye. I tun ye ɲiningali min labɛn, i k’o kɛ a tigi ye fana. Kiin dɔw kɔnɔ, mɔgɔw bolo degunnin lo kosɔbɛ. U man teli ka sɔn ka loon di an ma walisa an ka segi ka na bɔ u ye. N’o lo, i be se k’a fɔ ko: “I ka teli ka sɔrɔ soo nin lɛri nin na wa? [Mɛnni kɛ a tigi fɛ.] Lɔgɔkun wɛrɛ, a bena diya ne ye ka lɔ dɔɔni walisa ka ɲiningali nin jaabi . . . Ni n’ segira ka n’a sɔrɔ i bolo degunnin lo kojugu, basi t’a la.”
N’i ye i daa di ko i bena segi ka na wagati tigitigi dɔ la, i ka kɛ kantigi ye (Mat. 5:37). N’i segira ka na o viziti kɛ, a laban na, i ka viziti kura wɛrɛ juu sigi.

Nin kɛ ka filɛ kalo nin na:

I bena min fɔ mɔgɔw ye, n’i b’o labɛnna, i ka ɲiningali dɔ labɛn fana i bena min jaabi siɲɛ wɛrɛ. I be waajuli kɛra ni balima minw ye, a to olu fana k’o ɲiningali lɔn.