Nafa be Ala ka Kuma na ka mɔgɔw kalan n’a ye

1. Tile fila lajɛnba nata ka barokun ye mun ye? Kalanw bena ɲiningali juman jaabi?

¹ Jehova ye an “Karamɔgɔba” ye min ɲɔgɔn tɛ yen duniɲa kuru bɛɛ kɔnɔ (Ezayi 30:20, 21, NW ). Nka, Jehova b’an kalan cogo di do? A ye kitabu dɔ di an ma min ka fisa ni kitabu tɔɔw bɛɛ ye: o ye Bibulu, a ka Kuma senuman ye. Ala ka kalan be se k’an nafa cogo di farikolo, miiriya, dusukunnata ani Alako ta fan fɛ? An bena o ɲiningali ka jaabili sɔrɔ tile fila lajɛnba nata la, waajuli baara saan 2014 kɔnɔ. O lajɛnba barokun ko: “Nafa be Ala ka Kuma na ka mɔgɔw kalan n’a ye.” A basiginin be 2 Timote 3:16 kan.

2. Ɲiningali jumanw ka jaabiliw bena porogramu ka hakilinata jɔnjɔnw bɔ kɛnɛ kan?

² Hakilinata jɔnjɔn nunu kɔrɔsi: Ɲiningali nunu ka jaabiliw bena porogramu ka hakilinata jɔnjɔnw bɔ kɛnɛ kan:

• Ala ka kalan be nɔɔ juman to an kan? (Ezayi 48:17, 18)

• N’an y’a ɲini k’an ka koow cogoya yɛlɛma walisa ka kudayi cidenyabaara kɛ Jehova ye, an be se ka la mun lo la? (Mal. 3:10)

• N’an ye “kalan wɛrɛ” sɔrɔ min be dan na ni Jehova ta ye, an ka kan ka mun lo kɛ? (Eburuw 13:9)

• An be se ka Yezu ka “mɔgɔ kalancogo” ladegi cogo di? (Mat. 7:28, 29)

• Minw be kafo kalan, mun na olu yɛrɛ ka kan k’u yɛrɛ kalan? (Ɔrɔm. 2:21)

• Nafa be Ala ka Kuma na ka mun lo kɛ? (2 Tim. 3:16)

• Jehova bena siyaw “yuguyugu.” O bena nɔɔ to mɔgɔw kan cogo di? (Aze 2:6, 7, ABM )

• Jehova jigi lanin b’a la ko an bena mun lo kɛ? (Efɛz. 5:1)

• Mun na an ka kan k’an jija sɔbɛ la ka Jehova ka kalan sira tagama? (Luka 13:24)

3. Mun na a kɔrɔtanin lo an ka kɛ lajɛnba la ani k’an tulo malɔ ka kalan lamɛn?

³ An ko tile fila lajɛnba nin ka porogramu basiginin be 2 Timote 3:16 kan. Sanni Pol k’o vɛrise sɛbɛ, a kɔnna k’a yira laban loonw bena gwɛlɛya cogo min na. A ko: “Mɔgɔ minw ka jugu ani namaramɔgɔw, olu bena juguya ka taga ɲa. U bena mɔgɔ tɔw kɛ u be fili ani k’u yɛrɛ fili fana.” (2 Tim. 3:13). Walisa an kana lafili, a kɔrɔtanin lo an ka Ala ka kalan lamɛn ani k’a sira tagama! O kama, an ka banba ka kɛ o lajɛnba la. An k’an tulo malɔ ka kalan lamɛn, a ɲɛsinna bi koow ma.