An ka kan ka segi ka taga bɔ makodon mɔgɔw ye

1. Jii ka kan ka kɛ mun lo la walisa a ka falen ka bonya?

¹ Mɔgɔ mana sumankisɛ dan, a ka kan ka jii kɛ a la walisa a ka falen. O kelen lo fana ni tiɲɛn kisɛw ye minw danna mɔgɔw dusu la an ka kiinw kɔnɔ (1 Kɔr. 3:6). N’an b’a fɛ tiɲɛn kisɛw ka falen ka bonya mɔgɔw dusu la, an ka kan ka viziti kuraw kɛ walisa ka jii kɛ u la o min ye Ala ka Kuma ye.

2. Ɲɔgɔnyeko fɔlɔ la, an be se ka viziti kura juu sigi cogo di?

² Ɲiningali dɔ lawuli: N’an b’an ka baro dadon kumaw labɛnna, a ka ɲi an ka ɲiningali dɔ labɛn fana an bena min jaabi viziti kura kɛtɔ. An k’o ɲiningali lawuli ka baro kuncɛ ɲɔgɔnyeko fɔlɔ la, ani an ka labɛn tigitigi dɔw kɛ walisa ka segi ka na. Balima caaman y’a kɔrɔsi ko nafa b’a la ka fɛɛn dɔ sugandi gafe Bibulu ka kalan kɔnɔ, o min bena u dɛmɛ ka bibulukalan kɛcogo ɲɛyira.

3. Kunnafoni jumanw lo be se ka sɛbɛ ɲɔgɔnyeko fɔlɔ kɔ?

³ Kunnafoni dɔw sɛbɛ a tigi koo la: Ɲɔgɔnyeko fɔlɔ la, n’i bɔra a tigi kɔrɔ dɔrɔn, i ye baro kɛ koo minw kan i k’olu bɛɛ sɛbɛ. I k’a tigi tɔgɔ n’a ka ladɛrɛsi sɛbɛ. Baro kɛlon n’a wagati, baro kɛra koo min kan ani i ye sɛbɛ o sɛbɛ di a tigi ma, a ka ɲi i k’u fana sɛbɛ. Yala a tigi ko a be diinan dɔ la wa? Denbaya b’a fɛ wa? Yala a y’a jɔrɔko n’a ɲɛnako fɔ i ye wa? O kunnafoniw bena i dɛmɛ ka baro kɛ a ɲɛnakow kan n’i segira ka na. I b’a fɛ ka segi ka na tuma min na ani i bena ɲiningali min jaabi, i k’olu fana sɛbɛ.

4. N’an be makodon mɔgɔ dɛmɛna, mun na an man kan k’an fari faga?

⁴ Kana i fari faga: Ala ka Kuma kisɛ mana dan mɔgɔw dusukun na Sutana b’a seko bɛɛ kɛ walisa k’a ɲini “k’o kuma bɔ u kɔnɔ.” (Marka 4:14, 15). O kama mɔgɔ min y’a mako don, n’i tɛ sera k’a sɔrɔ a ka soo tugun, i kana i fari faga. N’a sɔrɔ i be se ka lɛtɛrɛ ci a tigi ma wala ka kunnafoni dɔ sɛbɛ k’a don a ka soda juu kɔrɔ. Balimamuso piyɔniye dɔ tun ye bibulukalan daminɛ ni muso dɔ ye a ka soo daa la. O kɔ, a gwɛlɛyara k’o muso nin sɔrɔ tugun a ka soo. O kama, balimamuso ye lɛtɛrɛ ci a ma. Loon min na balimamuso nana o muso sɔrɔ a ka soo, muso y’a fɔ a ye ko a y’a mako don ale la cogo min na, o y’ale dusukun sɔrɔ kosɔbɛ. N’an be jii kɛ tiɲɛn kisɛw la, an bena ninsɔndiya k’a ye k’u be falen, ka bonya ka kɔgɔ ani ka deen “bisaba kɛ, dɔ biwɔɔrɔ, dɔ kɛmɛ.”—Marka 4:20.