A ɲini k’i ka waajuli kɛcogo fisaya: Kunnafoniw sɛbɛ makodon mɔgɔw koo la

“I yɛrɛ minɛ ani k’i ka mɔgɔ kalancogo kɔlɔsi fana.” (1 Tim. 4:16). Hakili senu lo ye ciden Pol lasun k’o ladili di Timote ma. A b’a yira ko an ye waajulikɛla kura ye wo, an be waajuli kɛra a mɛɛnna wo, an ka ɲi ka banba ka ɲɛtaga kɛ. Walisa k’an dɛmɛ o koo la, barokun kura nin bena to ka bɔ An ka Masaya Cidenyabaara kɔnɔ: “A ɲini k’i ka waajuli kɛcogo fisaya.” O barokun kelen kelen bɛɛ kɔnɔ, u bena kuma fɛɛrɛ dɔ koo la min kɔrɔtanin lo. U fana bena ladili dɔw di an ma walisa k’o kɛcogo ɲɛfɔ an ye. Bɛɛ ka ɲi ka banba ka baara kɛ n’o fɛɛrɛ ye kalo kɔnɔ. Kalo bannin kɔ, waajuliko lajɛn na, an bena se k’a lakali cogo min na o fɛɛrɛ y’an nafa. Kalo nin na, u b’an jija ko an ka to ka kunnafoniw sɛbɛ makodon mɔgɔw koo la.

Mun na a kɔrɔtanin lo? Walisa ka se k’an ka cii dafa, an man kan ka dan waajuli dɔrɔn ma. Mɔgɔ minw y’u mako don, an ka kɔsegi ka taga u kalan walisa ka tiɲɛn kisɛw sɔn jii la (Mat. 28:19, 20; 1 Kor. 3:6-9). O kɔrɔ ko an k’a tigi ye tugun. A tun y’a mako don koo minw na, an ka basigi o kan ka taga ɲɛ ni baro tɛmɛnin ye. O kama, ni mɔgɔ dɔ y’a mako don koo dɔ la, a ka ɲi an k’o sɛbɛ.

A kɛcogo:

• I kana ɲinɛ ka sɛbɛrikɛ minanw don i ka sakɔsi kɔnɔ walisa ka se ka kunnafoniw sɛbɛ. U sɛbɛ ka gwɛ, u labɛn ka ɲɛ ani i mana kunnafoni kura dɔ sɔrɔ a tigi koo la, i k’o sɛbɛ fana. I mana bɔ a tigi fɛ dɔrɔn, i ka sɛbɛri kɛ.

• Kunnafoni nunu sɛbɛ a tigi koo la: a tɔgɔ, a ka ladɛrɛsi, a ka telefɔni nimɔrɔ wala ɛntɛrɛnɛti ladɛrɛsi n’a ɲɔgɔnnaw. I ye mun lo kɔrɔsi ale n’a ka denbaya koo la min be se k’i dɛmɛ?

• Aw ye baro kɛ koo minw kan, u bɛɛ sɛbɛ. I ye vɛrise juman lo kalan a ye? A ye mun lo fɔ a ka lannakow koo la? I ye gafe juman lo to a fɛ? I tagara bɔ a fɛ loon min na ani lɛri min na, i k’o sɛbɛ.

• I b’a fɛ ka min kɛ siɲɛ wɛrɛ, i k’o sɛbɛ. I y’a fɔ a tigi ye ko aw bena baro kɛ mun lo kan? I ko i bena segi ka na loon juman ani wagati juman?

• I mana taga bɔ a tigi ye, n’i ye kunnafoni kura dɔ sɔrɔ, o sɛbɛ. I ye kunnafoni caaman minw sɛbɛ, hali n’i mako ma kɛ u bɛɛ la, basi t’o la.

Nin kɛ ka filɛ kalo nin na:

• N’i be kunnafoni dɔ sɛbɛra, i k’a fɔ i waajulikɛɲɔgɔn ye i be fɛɛn min sɛbɛra.