Baara kɛcogo ni kitabunin ye: Jɔn lo be Jehova sago kɛra bi?

A kuun ye ka Bibulu kalandenw ɲɛsin Jehova ka jɛnkulu ma

1. Kitabunin kura nin sɛbɛra kuun saba jumanw lo kama?

¹ Yala i y’a daminɛ ka baara kɛ n’o kitabunin kura ye wa? A kuun ye ka Bibulu kalandenw dɛmɛ: 1) u ka Jehova Seerew lɔn ka ɲɛ, 2) u k’a lɔn an ka baara ye min ye ani 3) u k’a faamu an ka ɔriganisasiyɔn be baara kɛ cogo min na. Kalansen dɔ be sɔrɔ a ɲɛɛ kelen kelen bɛɛ kan. Kalan bannin kɔ, an be se k’u kelen kelen lajɛ miniti duuru ka taga se miniti tan kɔnɔ.

2. Kitabunin kura labɛncogo n’a kɔnɔko dɔw lakali.

² Kitabunin labɛnna cogo min na: A tilanna yɔrɔ saba. U kelen kelen bɛɛ be Jehova ka ɔriganisasiyɔn faan dɔ lakali i ko a fɔra dakun fɔlɔ kɔnɔ cogo min na. Kalansen 28 be sɔrɔ a kɔnɔ. U kelen kelen bɛɛ barokun ye ɲiningali dɔ lo ye. U jaabiliw be sɔrɔ cɛtigɛw kɔnɔ minw sɛbɛra ka fin. Fotow be sɔrɔ kitabunin kuru bɛɛ kɔnɔ. U tara ka bɔ jamana 50 ni kɔ kɔnɔ walisa k’a yira ko an ka baara be kɛra jamana caaman kɔnɔ. Koorilen nin be sɔrɔ kalansen dɔw kɔnɔ: “A ɲini ka dɔ lɔn tugun.” Ladili minw be sɔrɔ a kɔnɔ, i ka kalanden jija a k’u sira tagama.

3. An be se ka baara kɛ ni kitabunin Jehova sago ye cogo di?

³ Baara kɛcogo n’a ye: Ɲiningali min sɛbɛra ka kɛ kalansen barokun ye, i k’o yira kalanden na fɔlɔ. O kɔ, cɛtigɛ minw sɛbɛra ka fin, i ka sinsin olu kan kalansen lajɛtɔ. A laban, ɲiningali minw sɛbɛra segikanni kama jukɔrɔla la, a’ ye olu lajɛ kalan bannin kɔ. Aw be se k’a latigɛ ka kalansen kuru bɛɛ kalan ka sɔrɔ ka baro kɛ a kan, wala k’a lajɛ cɛtigɛ ni cɛtigɛ. Vɛrise minw kofɔra, i ka hakili sɔrɔ k’a filɛ aw bena u minw kalan. I kana ɲinɛ ka fotow ni koorilen nin lajɛ ni kalanden ye: “A ɲini ka dɔ lɔn tugun.” A’ ye kalansenw lajɛ ka tugutugu ɲɔgɔn kɔ. Nka, kana sigasiga ka pan ka taga kalansen dɔ lajɛ ni kalanden ye n’o barokun ɲɛsinna a makoya tigitigi ma. Ɲɛyirali fɛ, ni lajɛnba dɔ bena kɛ yanni dɔɔni, aw be se ka pan ka taga kalansen 11nan lajɛ.

4. Mun na ninsɔndiya lo an fɛ ka kitabunin kura nin sɔrɔ?

⁴ N’an be bibulukalan kɛra ni mɔgɔ ye, an b’a tigi dɛmɛ a ka an sankolola Faa lɔn. Nka, an b’a fɛ k’a dɛmɛ fana a ka Jehova ka ɔriganisasiyɔn lɔn (Ntal. 6:20). Ninsɔndiya lo an fɛ k’o kitabunin kura sɔrɔ sabu a b’o baara nɔgɔya an bolo!