An ka baara kɛ ni jw.org ye waajuli la: “Questions bibliques”

Yɔrɔ dɔ be jw.org kan min be weele ko “La Bible et vous.” O yɔrɔ la, barokun nin be sɔrɔ: “Questions bibliques.” Mɔgɔw ka teli ka ɲiningali minw kɛ, olu be sɔrɔ yen. N’an b’o ɲiningaliw lɔn ka ɲɛ, an be se ka Bibulu ka jaabiliw yira mɔgɔw la jw.org kan. An fana be se ka tɛmɛ o ɲiningaliw fɛ ka baro daminɛ ni mɔgɔw ye waajuli la. An ka kiinmɔgɔw ka teli ka ɲiningali minw kɛ, an be se k’o dɔ sugandi. An ka lamɛnbaga ɲininga a be min miiri o koo la. Bibulu ka jaabili dira cogo min na jw.org kan, an k’a tigi jaabi o cogo la. O kɔ, an be se k’a yira wala k’a ɲɛfɔ a ye an y’o jaabili sɔrɔ yɔrɔ min na. An fana be se ka taga jw.org kan ani k’a to ale yɛrɛ k’o jaabili kalan yen. Kɔrɔsibaga tagamakɛla dɔ ka muso b’a fɔ mɔgɔw ye ko: “Mɔgɔ caaman b’u yɛrɛ ɲininga ko ‘Yala an ka tɔɔrɔw ye Ala lo nɔɔ ye wa?’ E b’a fɛ k’o jaabili lɔn sekɔndi 51 dɔrɔn kɔnɔ wa?” O kɔ, a tun y’o ɲiningali ka jaabili min telesarse, a b’a to o tigi k’o kalan lamɛn a ka telefɔni selilɛri la. A be baro kuncɛ a kɛtɔ ka gafe nin ka sapitiri 11nan yira a tigi la: Bibulu ka kalan. A ye nafa caaman sɔrɔ o kɛcogo la.