“Bena Naneke Nagagblẽ o”
ETSO Nyɔ! Ƒe nuŋlɔla si le Ghana gbɔ
MEDO GOE le eƒe dɔwɔƒe le Labadi, si nye Accra ƒe akpa aɖe wònɔ ati dzem henɔ ati ŋu zrɔ̃m kple ŋusẽ ŋkubiãtɔe. Eƒe ŋkɔe nye Adams Akuetteh. Exɔ ƒe 70 eye wònye atikpala ƒe 50 enye si va yi.
Esi mebiae be nukae do dzidzɔ nɛ wu le eƒe atikpakpadɔa me hã la, egblɔ enumake be ƒe ene siwo yetsɔ wɔ dɔe le Gbetakpɔxɔ Habɔbɔa ƒe alɔdzedɔwɔƒe yeyea tutu me le Nungua, Ghana ye. Esia nye tso ƒe 1984 vaseɖe 1988 me.
Mebiae be: “Dɔ kae nèwɔ le alɔdzea tuƒe?”
“Ʋuƒo babla siwo me woblua kɔnkriti kɔna ɖo ŋue mewɔa dɔ le eye me kpe ɖe xɔgbalawo ŋu.”
Megblɔ nɛ be: “Èwɔ abe ɖe wote ŋu ɖoa ŋku dziwò wu le gatagbadzɛ si nènaa dɔwɔlawo ta ene.
Ẽ, nenema tututue. Gatagbadzɛwoe. Abe alesi nènyae ene la, gatagbadzɛwo xɔ asi ŋutɔ le Ghana. Le ŋkeke mawo me la, gatagbadzɛ kilogram afã xɔna tsoa dɔlar eve vaseɖe etɔ̃. Eyata megblɔ na ɖokuinye be, ‘Ðe míate ŋu agbugbɔ asi atrɔ le gatagbadzɛawo dometɔ aɖewo ŋu oa? Matrɔ asi le wo ŋu kpɔ.’
Eyata nye ŋutɔ metso le ɖokuinye si dze egɔme le nye ŋutɔ nye vovoɣi. Esi amesi nɔ dɔa dzi kpɔm kpɔ nusi wɔm menɔ la, edzɔ dzi nɛ ŋutɔ. Etsɔm ɖo dɔ ma nu koŋ. Eyata ƒe ene sɔŋ metsana le teƒea ŋdi sia ŋdi dia gatagbadzɛ siwo ge bu la. Meɖea siwo le ʋuƒo siwo me wokɔa kɔnkriti ɖo siwo kaka la hã ŋu.”
“Ðe nètsɔa esiwo ŋu ŋusẽ mele o kple esiwo glɔ̃ la ƒua gbea?”
“Ao. Wogazãa esiwo ŋu ŋusẽ mele o tsɔ daa ga ati bɔbɔewoe alo wotsɔa nuŋɔnu ŋɔa ati sesẽawoe gbã hati tsɔa gatagbadzɛawo daa woe. Metsɔa zu dzɔa esiwo gɔ̃ la nyuie.”
“Dɔ sia menye dɔ ɖeka ŋugbe wɔwɔ kple dɔ tiame na wo oa?“
“Anye dɔ tiame na ɖevi, gake menye nye ya o. Dɔdzikpɔlaa gblɔ nam be nye dɔa le ga si Habɔbɔa agblẽ hafi, si nye Yehowa ƒe ga dzram ɖo, eyata edzɔ dzi nam ŋutɔ. Enye dzidzɔ tɔxɛ nam be makpɔ gatagbadzɛ siwo medzɔ ƒe lolome vovovo siwo melia kɔe fũ. Eye megblɔna na ɖokuinye be, ‘Ahã! Fifia mele ŋgɔ na xɔgbalawo!’ Gake kaka ko esiwo meli kɔe la vɔna. Wodoa ɣli tso xɔta be yewogahiã geɖe! Eyata megatsɔa dzo ɖe ewɔwɔ ŋu wu.”
“Ke esi miewu xɔtudɔa nu ɖe, dɔ ka wɔm nèle fifia?”
“Megage ɖe ɣeyiɣiawo katã ƒe subɔsubɔdɔa me ake, eye mele lalam vaseɖe esime miagava akeke Ghana-lɔdzedɔwɔƒea ɖe enu. Ekema mava afima anɔ gatagbadzɛ gɔglɔ̃wo dzɔm be madzra ga si woagblẽ hafi la ɖo—kple dzidzɔ.”
Ewɔ dɔ si ame aɖewo abu dɔ tsɛe ƒe ene sɔŋ. Gake Adams Akuetteh, “si nye gatagbadzɛdzɔla si nɔ Ghana-lɔdzedɔwɔƒea” ya mebui nenema kura o! Etsɔ dzidzɔ dzra gatagbadzɛwo ɖo be Yehowa ƒe ga dome nagagblẽ o!
Nenemae Yesu hã ha susui. Togbɔ be nukunuwɔŋusẽ geɖe nɔ esi be woana aboloa nasɔ gbɔ ɖe edzi hã la, egblɔ le nuɖuɖu aɖe ɖuɖu vɔ megbe be: “Miƒo kakɛ, siwo susɔ la, nu ƒu, bena naneke nagagblẽ o.”—Yohanes 6: 12.
[Nɔnɔmetata si le axa 31]
Adams Akuetteh, “gatagbadzɛdzɔla si nɔ Ghana-lɔdzedɔwɔƒea”