Tso Míaƒe Nuxlẽlawo Gbɔ
Zɔzɔ Kple Ame Kplikplikpli evɔ Menye ɖe Woɖoe be Woaɖee O Mele akpe dam na mi ɖe nyati si nye “Sɔhɛwo Biana Be . . . Aleke Mawɔ Aƒo Asa na Dzigbagbã si le Zɔzɔ Kple Ame evɔ Menye ɖe Woɖoe be Woaɖee O Me?” la ta. (December 8, 1991, Eŋlisigbe) Nyitsɔ laa la meto vevesese kple nugbegbe le ame gbɔ ƒe nuteɖeamedzi sesẽ me esime ɖekakpui si do ŋugbe nam be yeaɖem si mezɔ kpli la na mía dome ka zi ɖeka naneke mawɔmawɔe. Emegbe mesee be nenema koe wòwɔna ɣesiaɣi eye egbã dzi na ame bubuwo hã do ŋgɔ nam. Mekpɔe dze sii fifia be vevesese ƒe nɔnɔme sia ƒe akpa aɖe tso gbɔnye elabena meva “nyrɔ̃ nye seselelãme katã ɖe eme kaba akpa.” Adzɔ dzi nam ŋutɔ ne ɖe mieta nya siawo ɣleti geɖe do ŋgɔ.
G. T., United States
Ðekakpui aɖe gblɔ nam be ɖeko yedi be yeadze xɔlɔ̃m, eye melɔ̃ ɖe edzi nɛ. Gake eyi edzi nɔ gbɔnye vam eye wòbia tso asinye be míaɖi tsa ado go. Emegbe esi wòbiam be madi be maɖe ye hã la, mekpɔ dzidzɔ ŋutɔ! Gake ƒe ɖeka megbe la, egblɔ nam be yemedi ŋutɔŋutɔ be yeaɖe srɔ̃ o. Egblɔ be mele be manyrɔ nye seselelãme ɖe eme nenema gbegbe hafi o elabena yegblɔm nam le gɔmedzedzea me ke be yemedzra ɖo ɖe srɔ̃ɖeɖe ŋu o. Gake be wòagado ŋukpe eɖokui o la, egblɔ be yeaɖem kokoko.—gake le xexe yeyea me. Nya la kpɔtɔ le nu gblẽm le nye seselelãmewo ŋu, gake nyatia le kpekpem ɖe ŋunye be manɔ te ɖe nɔnɔmea nu.
S. Y., United States
Ƒome Siwo Dome Le Kplikplikpli Vifofo siwo metsɔa ɖeke le eme na wo viwo o dometɔ ɖekae menye. Nyemebu nusi esia ate ŋu agblẽ ɣeyiɣi didi la ŋu o. Miaƒe nyati si nye “Ƒome Siwo—Dome Le Kplikplikpli Hafi Wòava Tsi Megbe Akpa” (September 22, 1991, Eŋlisigbe) ɖe fu nam vevie! Mele ŋugbe dom be matrɔ nye nɔnɔme eye mawɔ nusi gbegbe mate ŋui be maɖe lɔlɔ̃ geɖe wu afia vinyewo.
J.B. M., Gabon
Nyati la ƒo nu tso alesi míakpɔ vidzĩ si le avi fam la gbɔe ŋu. Eƒe avifafa ɖesiaɖe yea? Ne ɖesiaɖee la, ɖe esia mana vidzĩa nakpɔ ŋusẽ ɖe edzilawo dzi be woawɔ eƒe lɔlɔ̃nu—esi agblẽ nu le eya ŋutɔ ŋu mlɔeba oa?
S. H., United States
Menye se sesẽ kpatsie wònye míede o ke boŋ dzie míede ƒo na vidadawo be woakpɔ wo vi siwo le avi fam la gbɔ kaba. Eye togbɔ be nusiwo ta woatsi dzimaɖi si sɔ ɖe vidzĩ tsitsiwo kple ɖevi siwo le agbagba ɖom ‘gbegblẽ’ ŋu li hã la, ɖɔkta akpa gãtɔ xɔe se be esesẽ be woagblẽ vidzĩwo ne wokɔa wo le woƒe avifafa me.—Kpɔ nyati si nye “Johnny, Please Be Quiet!” le September 8, 1982 ƒe “Awake!” me.—Etalawo.
Amebeble si le Dzɔdzɔmeŋutinunya Me Ðeko mewu nyati si nye “Shenanigans in the Halls of Science” (November 22, 1991) xexlẽ nu vɔ koe nye sia. Menya nusrɔ̃ƒe siwo mieyɔ ɖe nyatia me la dometɔ ɖeka nyuie, eye enye nusi tsoa dzika ƒo na ame be woanya be nudzɔdzɔ ma nado mo ɖa le dzɔdzɔmeŋutinunyala siwo dzi woka ɖo la dome. Ne hoʋiʋli kple nyaƒoɖeamenu be woanye ame gbãtɔ le nusianu me ɖu anukwareɖiɖi dzi la, nu mawoe dzɔna. Ðk. O’Toole ƒe dzideƒo kple anukwareɖiɖi—esi na woxɔ dɔ le esi—la nya kpɔ nam ŋutɔ! Ðeko nɔnɔmea dze abe ‘Amekae nye Ðk. O’Toole be wòaɖɔ Ðk. Imanishi-Kari ɖo?’ ene. Ele be ame bubuwo ƒe susu xɔxɔ nadze le dzɔdzɔmeŋutinunyalawo ŋu, gake ɣeaɖewoɣi la, nusi to vovo na emae dzɔna.
O. O., United States
Alẽfu Medi be mada akpe na mi ɖe nyati “Alẽfu ƒe Nu Wɔnuku La” ta, (September 22, 1991, Eŋlisigbe) Fifia mele nutɔtɔ srɔ̃m eye miesrɔ̃ nu tso alẽfu ŋu eye nyati sia dzie metu nye sukunusɔsrɔ̃ ɖo. Metsi dzi vie ɖe esia wɔwɔ ŋu elabena nye sukuhatiwo ɖua fewu le ŋunye le esi menye Yehowa Ðasefo ta. Míaƒe sukumegã ƒo nu gɔ̃ hã tsɔ xlɔ̃ nu sukuviawo tso Yehowa Ðasefowo ŋu! Gake miaƒe nufiala ya xlẽ nyatia kple dzidzɔ hebia be mana Nyɔ! ɖeka ye
P. A., Czechoslovakia