Gbetɔame na Dzilawo
Xexeame meganye agbenyuinɔƒe abe tsã ene kura o. Gbɔdɔdɔ ŋuti boblododo bɔ fũ ŋutɔ. Wodzraa magazine siwo ƒoa nu tso nyɔnuwo ŋu abe fefenuwo ko ene la le fiasewo me. Haƒoƒo kafua gbeɖoɖoɖi me gbɔdɔdɔ. Le nyateƒe me la, abe alesi nusi míekpɔna hesena gbesiagbe ɖenɛ fiana ene Ia, agbegbegblẽ ƒe xexee nye esia!
ƑOMENUSƆSRƆ̃WO ƒe nufialagã Greer Litton Fox gblɔ be gbɔdɔdɔnuwɔna alo nusi fia gbɔdɔdɔ si “ade abe 40 ene” “si woate ŋu aɖe afia ame le television dzi tso ŋdɔ 1:30 vaseɖe zã ga 11:00 gbesiagbe dometɔ siwo ku ɖe srɔ̃tɔwo ŋu la mede 5 le alafa ɖesiaɖe me o.” Esi television kple magazinewo le agbagba dzem vevie be woade gbɔdɔdɔ ƒe dzi ƒo ta la, menye nusi wɔ nuku be woaxlẽ nu tso “ƒewuiviwo ƒe fufɔfɔ ƒe dzidziɖedzi kple emetsonu siwo gblẽa nu le ame ŋu hã ŋu o.”
Le nyateƒe me le dzila siwo dia nu nyui na wo viwo gome la, enyea gbetɔame na wo be woahe wo le agbegbegblẽnɔnɔ ƒe xexe sia me. Gake esia mefia be sɔhɛwo katãe le wo ɖokui ƒom ɖe gbɔdɔdɔ me o. Numekuku siwo wowɔ ɖee fia be Amerikanyɔnuvi siwo xɔ tso ƒe 15 vaseɖe 19 dometɔ afã dɔ ŋutsu gbɔ kpɔ, esi ɖo kpe edzi be wo dometɔ afã ya medɔ ŋutsu gbɔ kpɔo! Gawu la, edzro amesiwo ƒo wo ɖokui ɖe gbɔdɔdɔ me dometɔ geɖe gɔ̃ ha be adzɔ dzi na yewo wu ne ɖe yewomewɔe o. Wo dometɔ ɖeka ŋlɔ agbalẽ na nyadzɔdzɔgbalẽŋlɔla Ann Landers be:
“Nye dɔdɔ kple Joe (nye ahiãvi gbãtɔ) nye nusi me dziɖeleameƒo le, eyata mena Mike hã dɔ gbɔnye, emegbe Neal, kple emegbe la George. Nyemenya nusi dim menɔ o. Nyemekpɔ nusi tututu wònye menɔ didim o. Magazinewo, television dzi nuwɔnawo, kple sinimawo mee mekpɔ susu gbegblẽ geɖe tsoe. Menye aleae agbe le ŋutɔŋutɔ o.
“Ne ɖe mate ŋu aƒo nu na nyɔnuvi siwo xlẽa miaƒe nyadzɔdzɔgbalẽa la, anye ne magblɔ na wo be ƒewuimenɔɣi ƒe gbɔdɔdɔ mekpɔa kuxiwo gbɔ o, geɖe boŋ ye wòhena vɛ. Menana nyɔnuvi sena le eɖokui me be wolɔ̃ ye o, enana wosena le eɖokui me be asixɔxɔ aɖeke mele ye ŋu o. Mana woanya be menana ‘nyɔnu ƒe nɔnɔmewo nyuiwo’ sua nyɔnuvi si wu o, ate ŋu ana mànye nyɔnu nyui o.
“Ne ɖe mate ŋu aƒo nu na dzilawo la, made dzi ƒo na wo be woate gbe ɖe bubudeameɖokuiŋu kple dzidzenu kɔkɔwo dzi na wo viwo.”
Le nyateƒe me la, sɔhɛ kple wo dzila siwo dome le kplikplikpli siwo sena le wo ɖokui me be yewole dedie le yewoƒe ƒomewo me eye woƒe dzi dzea eme la megena dzea agbegbegblẽnɔnɔ ƒe mɔ̃ me bɔbɔe abe sɔhɛ siwo woa kple wo dzilawo dome mele kplikplikpli ene o. Eye habɔbɔ aɖe le anyigba dzi egbea si me nɔlawo wu ame miliɔn ene si me wokpena ɖe sɔhɛwo ŋu le be woalé dzidzenu siwo kɔ sã wu esiwo dzi amewo zɔna ɖo egbea la me ɖe asi.
Le nya siawo ta la, aleke nàte ŋu akpe ɖe viwòwo ŋu be woakpɔ wo ɖokui ta tso agbegbegblẽnɔnɔ si le dzidzim ɖe edzi le egbexexea me la si me? Aleke nàte ŋu akpe ɖe wo ŋui be woanɔ agbe nyui si me dzidzɔ geɖe wu le? Eya ŋue nyati eve siwo gbɔna aƒo nu tsoe.