Kpe Ðe Wo Ŋu Woatia Amesi Woaɖe le Nunya Me

ÐE VIWÒWO nya nɔnɔme siwo woadi le amesi woaɖe la ŋu kple alesi woatia amesi woaɖe le nunya mea? Ele vevie be nàbu nya la ŋu eye nàkpe ɖe wo ŋu woawɔ tiatia si me nunya le, elabena esia ahiã vevie hena woƒe etsɔ me dzidzɔkpɔkpɔ.

Le dukɔ siwo me gbeɖoɖo ɖi ado go bɔ le me la, nyaƒoɖeamenu dzea ŋgɔ sɔhɛwo be woazɔ kple ŋutsuviwo alo nyɔnuviwo tso woƒe ɖevime ke gɔ̃ hã. Ðk. Ronald W. Taffel si nye susuŋutinunyala si biaa nya amewo tsɔ nyaa woƒe nɔnɔmewoe le New York gblɔ be: “Ðevi siwo xɔ ƒe 10 dzilawo gblɔna nam be wole eƒom ɖe yewo nu vevie be yewoana yewo viwo naɖo gbe ɖi ado go kple ame aɖe. Dzilawo kpɔnɛ enumake be wotsɔa nya siwo yewomenɔ mɔ kpɔm na be yewoakpɔ wo gbɔ o vaseɖe yewo [viwo] ƒe tsitsime hafi la nɔa fu ɖemee na ye wo.”

Nukae ate ŋu ado tso eme ne èlɔ̃ heɖe mɔ na viwòwo be woadze gbeɖoɖoɖi gɔme esi wometsi haɖe o? The Journal of the American Medical Association gblɔ be: “Gbeɖoɖoɖi edziedzi esi wometsi o mee [gbɔdɔdɔ] dzea egɔme tsonɛ.” Ẽ, ɖewohĩ èxlẽ nu tso “nyɔnuvi siwo xɔ tso ƒe 10 vaseɖe 14 siwo le agbɔ sɔm ƒe vidzidzi” ŋuti nyawo ŋu.

Eyata nukae nàte ŋu awɔ atsɔ akpe ɖe viwòwo ŋu?

Fia Nu Wo tso Ðevime Ke

Ehiã be dzilawo naƒã Kristotɔwo ƒe nɔnɔme nyuiwo ɖe wo viwo me ahakpe ɖe wo ŋu be woatu wo ɖo. Eye ehiã be woakpe ɖe wo ŋu hã be woadi nɔnɔme siawo le amesi woaɖe la ŋu. Ne viwò bia gbeɖoɖoɖinya wò la, ɖe eme nɛ be womebunɛ nu nyuie be enye hadomemodzakaɖeɖe na amesiwo meɖo ƒewuiwo me haɖe o alo na amesiwo le woƒe ƒewuiwo ƒe gɔmedzedze gɔ̃ hã o. Ke boŋ ɖe eme na wo kɔte be amesiwo tsi nyuie hetsɔ moveviɖoɖo le srɔ̃ dim be yewoaɖe koe aɖo gbe ɖi ado go.

Abe alesi wòle be ɖeviwo nalɔ̃ ɖe edzi bɔbɔe ene la, nuteƒekpɔkpɔ mesu wo si be woakpɔ nɔnɔmewo adze sii o. Indianyɔnuvi aɖe ɖe nu me na srɔ̃ɖeɖe ŋuti aɖaŋuɖola gbeɖeka be: “Mia dzilawo tsi wu mi eye wonya nu wu mí, womeblea wo bɔbɔe abe alesi woable mí ene o. . . . Ele vevie ŋutɔ be ŋutsu si maɖe la nanye nyuitɔ. Eyata ne nye ŋutɔe adii na ɖokuinye la, mate ŋu awɔ vodada bɔbɔe.” Le nyateƒe me la, ame tsitsiwo ƒe kpekpeɖeŋu ate ŋu aɖe vi na sɔhɛwo!

Zi geɖe la, sɔhɛwo bua amesiwo woaɖe la le dzidzenu siwo meku ɖe woƒe srɔ̃ŋutsu alo srɔ̃nyɔnu nyui nyenye ŋu o la nu. Ðewohĩ tugbedzedze kple ŋutilãmedzedzeme awɔ dɔ ɖe ŋutsuviwo dzi​—gake emegbe ya ɖe? Ŋutilã kple mo ƒe dzedzeme trɔna, eye ɖikeke mele eme o be emegbe la ŋutsuvi la adi nyɔnu tsitsi ƒe nɔnɔmewo, esiwo dometɔ aɖewoe nye nunya kple agbanɔamedziwo gbɔ kpɔkpɔ ƒe ŋutete. Zi geɖe la, nyɔnuviwo léa ŋku ɖe ŋutsuvia ƒe ɖekadzedze, eƒe atsyɔ̃ɖoɖo, kple eƒe nunya ŋu gbã wu nɔnɔme siwo le vevie wu siwo nye eƒe dɔmenyonyo kple lɔlɔ̃ na Mawu kple havi amegbetɔwo.

Eyata nukae nàte ŋu awɔ? Nukatae màhe viwòwo ƒe susu ayi amesiwo wonya siwo ƒe srɔ̃ɖeɖe le edzi dzem na la dzii o. Àte ŋu aɖee afia wo be menye nyɔnu dzetugbee alo ŋutsu si dze ɖeka wu amesiame le dua me kokokoe amesiawo dometɔ aɖewo tia o, ke boŋ ame aɖe si si nɔnɔme nyuiwo le eye nudidi kple nɔnɔme kpakple taɖodzinu ɖeka ma ke le woawo hã si ye woɖe.

Nukatae màdzro nya siawo me kple viwo wo o? Esime Ann xɔ ƒe 13 la, dadaa biae be nɔnɔme kawoe wòadi le ŋutsu si wòaɖe ŋu hã. Wodzro esia me, eye Ann ŋlɔ nɔnɔme siwo wòadi la da ɖi. Menye nu dzro aɖe koe wònye wòŋlɔ ɖi o. Nɔnɔmeawo dometɔ aɖee nye be wòanye ame aɖe si ŋu woade bubui, eye nusiwo me wòtsɔa ɖe le la nasɔ kple etɔ. Fifia Ann si xɔ mamayɔvi eye wòle dzidzɔ kpɔm la gaɖoa aɖaŋu be ame bubuwo nasrɔ̃ yeƒe kpɔɖeŋu sia.

Le Kristotɔ gome la, Biblia ƒe sedede be woaɖe srɔ̃ “le Aƒetɔ la me ko” nye nusi hiã be wòade ŋugble le eŋu vevie. (Korintotɔwo l, 7:39) Amesi le “Aƒetɔ la me” lae nye Kristotɔ si ɖe adzɔgbe hexɔ nyɔnyrɔ eye wòdoa vevie nu le gome kpɔkpɔ le dɔ si Yesu wɔ la ke wɔwɔ me. Zi geɖe la, amesiwo ŋea aɖaba ƒua sedede sia be woaɖe srɔ̃ ɖe Aƒetɔ la me ko dzi la kpea fu geɖe. Eyata kpɔ egbɔ be nàfia viwòwo alesi wòle vevie be amesiwo wɔna ɖe agbenyuinɔnɔ kple gbɔgbɔ me gɔmeɖose mawo ke siwo dzi wowɔna ɖo la dzi eye wonye amesiwo akpe ɖe wo ŋu be woatsɔ gɔmeɖose siawo anyi vi siwo woadzi lae ko hafi woabu wo ɖeɖe ŋu.

Dzra Wo Ðo be Woanɔ Te Ðe Kuxiwo Nu

Ne èva nya be ye viwo tsi nyuie aɖo gbe ɖi ado go la, fia wo nunya si le eme be woadze si amesi woaɖe la le dutoƒo, le gome kpɔkpɔ le nuwɔnawo abe nuɖuɖudzraƒewo, blemanudzraɖoƒewo, lãwo kpɔƒe, alo nɔnɔmetatawo fiaƒe, siwo naa mɔnukpɔkpɔ wo be woaɖo dze ahanya wo nɔewo tsɔ wu be woaɖe wo ɖokui ɖa le amewo gbɔ ene me. Kpe ɖe wo ŋu woase egɔme nusitae nunya le esia me sãa wu be woawo ɖeɖe nanɔ ʋu si wotɔ ɖi me alo le teƒe bubu aɖe si ame aɖeke mele o. Ele vevie hã be nàfia wo be ne woa kple amesiwo ɖo gbe ɖi do go trɔ gbɔ va aƒeme la, nunya le eme be woagblɔ na amea le ʋɔtrua nu be dɔdɔ nenyo eye womana amea nage ɖe xɔa me o negbe ɖe mieli hele ŋu hafi.

Xlɔ̃ nu viwòwo tso nusi ate ŋu adzɔ la ŋu. Le kpɔɖeŋu me, nyadzɔdzɔgbalẽ me nyatakaka aɖe gblɔ be nyɔnuvi sukuvi aɖe kpe amesi aɖee la va xɔ si me wòmlɔna le sukukpo dzi la me esi woɖu fiẽnu vɔ megbe be yewoaɖu ɣe ahaɖo dze. Togbɔ be edo ahiãnya ɖe egbɔ hã la, meƒoe ɖe enu be wòadzo o. Ke boŋ esi wògbe la, ŋutsua ɖe kuku nɛ be netsɔ nya si yegblɔ nɛ la ke ye, gake egadze agbagba ake be yeable enu kokoko. Nyatakaka la gblɔ be: “Mlɔeba la ezi nyaa ɖe dzi” eye wòdɔ egbɔ sesẽe. Nublanuinya kae nye si!

Eyata kpɔ egbɔ be ye viwo nya alesi woatsɔ tameɖoɖo kplikpaa awɔ nui ne ame aɖe ado ahiãnya ɖe wo gbɔ gɔ̃ hã. Ele be woasi le nɔnɔmea nu abe alesi ɖekakpui Yosef si le Potifar srɔ̃ si nɔ nya ƒom ɖe enu atraɖii gbɔ ene. (Mose l, 39:​7-12) Ele be woanya be kokoƒonya si wogblɔna tso gbaɖegbe ke si nye “Ne èlɔ̃m la, àɖe mɔ miadɔ” ye nye mɔ si dzi ameblela tona zi geɖe. Ðewohĩ amesi gblɔa nya ma la gblɔnɛ zi geɖe, emegbe wòsina le amesi wòdɔ kplii la gbɔ gadia ame bubu si wòadɔ kplii. Ele be viwòŋutsu alo viwònyɔnu nanya be alesi yeatsɔ kakaɖedzi agblɔ be ao ye nye nya nyuitɔ si yeatsɔ aɖo ahiãnya ŋui.

Kpɔ egbɔ be nafia viwònyɔnu be wòaƒo asa na nɔnɔme siwo me woate ŋu adɔ egbɔ sesẽe le. Te gbe ɖe alesi wòhiã vevie be wòanya ɖekakpui si woa kplii woaɖo gbe ɖi ado go la nyuie dzi eye wòana wò dzila la hã nanya amesia nyuie. Ne viwòwo megale teƒe si te ɖe ŋuwò o la, ekema kpɔ egbɔ be woabia aɖaŋuɖoɖo tso dzikpɔla Kristotɔ aɖe gbɔ ku ɖe amesi woaɖe la ŋu. Ðo ŋku edzi be ameblelawo li siwo gblɔna be Kristotɔwoe yewonye eye wova trana ɖe hamea me dzaa, abe alesi wonɔ anyi le ƒe alafa gbãtɔ me hã ene.​—Petro II, 2:​13-15, 17, 18.

Hekpe ɖe eŋu la, ehiã be nàfia viwòŋutsuwo be ŋutsu nyuiwo meɖonɛ gblẽa nu le ame bubuwo ŋu o. Wo ta boŋ ye woʋlina hekpɔa wo ta. Ŋutsu nyuiwoe ɖua woƒe nudzodzrowo dzi, ke womeɖea mɔ na wo o. Ele be woawɔ nu ɖe nyɔnuwo ŋu nyuie le bubu kple sisiɖa me abe alesi woawɔ nu ɖe woa ŋutɔwo wo dadawo, alo nɔvinyɔnuwo ŋui ene.​—Timoteo I, 5:​1, 2.

Mègana viwòwo naŋlɔ Biblia me gɔmeɖose vevi si gblɔ be: “Habɔbɔ vɔ̃wo gblẽa nuwɔna nyuiwo” la be o. (Korintotɔwo I, 15:33) Eyata ele be viwòwo nakpɔ alesi wohiã be woatsri zɔzɔ kple ame aɖe si menɔa agbe dzadzɛ o la adze sii. Ele be nàɖe eme na wo kɔte tso woƒe ɖevime ke be togbɔ be amewo makpɔ nusi wɔm wole o hã la, Mawu ya kpɔnɛ, eye aɖo eteƒe na mía dometɔ ɖesiaɖe ɖe eƒe nuwɔnawo nu.​—Romatɔwo 2:⁠6.

Agbe Nyui Nɔnɔ le Agbegbegblẽnɔnɔ ƒe Xexea Me

Togbɔ be xexeame ƒe setɔwo fa konyi be ‘yewomenya nu gobii aɖeke tso alesi yewoawɔ agbe na ƒewuivi maɖesrɔ̃wo be woagadɔ o ŋu hã la, dzila Kristotɔwo ya nya be yewoate ŋui. Ne dzilawo tua lɔlɔ̃ na Mawu kple eƒe sewo dzi wɔwɔ anukwaretɔe ɖe wo viwo me la, ekema wodzraa wo ɖo be woanɔ te ɖe agbegbegblẽnɔnɔ ƒe xexeame ƒe tetekpɔwo nu ahanɔ agbe nyui si le dzɔdzɔe. Habɔbɔ gã aɖe si me Yehowa Ðasefo miliɔn geɖe le la ɖe dzesi ƒã le woƒe wɔwɔ ɖe Mawu ƒe Nya la me agbenyuinɔnɔ ƒe dzidzenu kɔkɔwo dzi me. New Catholic Encyclopedia gɔ̃ hã gblɔ be ƒuƒoƒo sia ƒe “srɔ̃ɖeɖe kple gbɔdɔdɔ me agbenyuinɔnɔ metrɔna kura o.”​—Babla 7, axa 864.

Sɔhɛ siwo le Yehowa Ðasefowo dome siwo nɔa agbe nyui nya be menye yewo dzilawo koe lɔ̃ yewo ƒe nya hekpɔa ŋudzedze ɖe yewo ŋu o, ke boŋ yewo hati Kristotɔ siwo le xexeame katã hãe. Woɖea dzi ɖi, wokpɔa gome le hame ƒe kpekpewo me, wobina ɖe edzi le nufiafia me hekpɔa gome le Biblia me hehexɔxɔ me. Woɖea Mawu-vɔvɔ̃ ƒe nɔnɔmewo fiana, wosena le wo ɖokui me be bubu le yewo ŋu, eye agbe nɔnɔ le Mawu ƒe xexe yeye dzɔdzɔea me ƒe mɔkpɔkpɔ le wo si.​—Yohanes I, 2:​17; Nyaɖeɖefia 21:​3, 4.

[Aɖaka si le axa 27]

Amekae Nàɖe?

Agbalẽ si nye Questions Young People Ask​—Anwers That Work ɖo aɖaŋu nyuiwo le alesi sɔhɛwo ate ŋu awɔ anya amesi woadi be yewoaɖe la ŋu.a Efia alesi wòbiã be woanya amea ƒe nɔnɔme nyuiwo kple eƒe gbɔdzɔgbɔdzɔwo, kpakple amesi ƒomevie wònye. Aleke nàte ŋu awɔ anya?

Gbã la, àte ŋu alé ŋku ɖe amea ŋu. Aleke eƒe agbenɔnɔ le? Aleke wòwɔa nu ɖe ame bubuwo ŋui? Aleke wòƒoa nu na edzilawo alo ƒomea me tɔ bubuwoe? Nusiawo hiã vevie elabena woɖea alesi wòavawɔ ɖe ŋuwò la fiana.

To dze si ŋu miedzra ɖo ɖo o ɖoɖo dzila, àte ŋu anya ne nusiwo me wòtsɔa ɖe le kple eƒe taɖodzinuwo sɔ kple tɔwò. Àgate ŋu ada ŋku ɖi akpɔ be aleke ame bubuwo bua amesiae hã.

Àdi be yeanya amesi ƒomevi amesia nye, eƒe susuwo, nukpɔsusuwo, kple nɔnɔme siwo le esi. Aleke wòwɔa nui ne nu te ɖe edzi? Amekawoe nye exɔlɔ̃wo? Aleke eƒe ƒomea le, eye aleke wowɔa nu ɖe wo nɔewo ŋui?

Dɔ wɔwɔ ɖekae ate ŋu ana nànya amea ƒe nɔnɔme nyuie wu. Na ɣeyiɣi be nɔnɔme manyomanyo siwo anɔ esi nadze. Ekema abe alesi agbalẽ nyui sia gblɔ ku ɖe sɔhɛ siwo wɔ ɖe aɖaŋuɖoɖo nyui mawo dzi ŋu ene la: “Esi wonya wo nɔewo nyuie la, woate ŋu aɖe wo nɔewo le esi woka ɖe edzi be yewoate ŋu aɖɔ masɔmasɔ siwo ado mo ɖa la ɖo ta. Dzidzedze si wokpɔ le wo nɔewo didi me la dzra wo ɖo ɖe srɔ̃ɖeɖe si me dzidzedze kple dzidzɔ le ŋu.”​—Ta 29-32.

[Etenuŋɔŋlɔwo]

[Nɔnɔmetata si le axa 25]

Ðekadzedze alo tugbedzedze ate ŋu adzro ame, gake nɔnɔme nyui siwo Ie amea sie le vevie wu

[Nɔnɔmetata si le axa 26]

Ame nɔewo nyanya le gaglãgbe nye nusi me nunya le wu be woaɖe ame ɖokui ɖe aga tso amewo gbɔ