Ðeviwo Nyinyi Le Afrika Le Ɣeyiɣi Sesẽwo Me

ABE ALESI CARMEN MCLUCKIE GBLƆE ENE

Ƒe 1941 mee. Xexemeʋa II nɔ edzi yim. Menye vidada si xɔ ƒe 23, tso Australia, gake wode mía kple vinye si xɔ ɣleti atɔ̃ pɛ ko la game le Gwelo, Southern Rhodesia (si nye Gweru, Zimbabwe, fifia). Srɔ̃nyeŋutsu hã nɔ game le Salisbury (si nye Harare fifia). Nye atikɔmevi ƒewuivi eve ye nɔ mía vi bubuawo​—siwo xɔ ƒe eve kple ƒe etɔ̃​—dzi kpɔm. Mina magblɔ alesi wòdzɔe be meva nɔ nɔnɔme sia me na mi.

MENƆ Danye kple Fofonye gbɔ le Port Kembla, si anɔ abe kilometa 50 ene tso Sydney ƒe anyiehe gome, le Australia. Le ƒe 1924 me la, Clare Honisett va srã Danye kpɔ eye wòna wòva tsɔ ɖe le Biblia nufiafiawo me esi wòbiae be ese Aƒetɔ ƒe Gbedodoɖa la gɔme hã. Clare ɖe nusi wòfia be woana Mawu ƒe ŋkɔ ŋuti nakɔ me, emegbe egblɔ alesi Fiaɖuƒea ana woawɔ Mawu ƒe lɔlɔ̃nu le anyigba dzi nɛ. (Mateo 6:​9, 10) Dada ƒe nu ku. Togbɔ be Fofonye tsi tre ɖe Danye ŋu hã la, edze egɔme nɔ Biblia ƒe nyateƒe mawo me kum vevie.

Eteƒe medidi o, míeʋu yi Sydney ƒe nuto aɖe me. Mía kple Danye míezɔna abe kilometa 5 ene tso afima yia Yehowa Ðasefowo, amesiwo woyɔna be Biblia Nusrɔ̃viawo ɣemaɣi la ƒe kpekpewo. Togbɔ be Fofonye meva zu Ðasefo o hã la, eɖe mɔ wowɔ Biblia-nusɔsrɔ̃ le míaƒe aƒeme. Nɔviaŋutsu eve​—Max kple Oscar Seidel​—va zu Ðasefowo, eye Max ƒe ƒomea me tɔ aɖewo kple tsenye, Terry, kpakple ƒenye, Mylda, hã zu Ðasefowo.

Le ƒe 1930 me la, Gbetakpɔxɔ Habɔbɔa ƒle tɔdziʋu si didi meta 16, si wova trɔ ŋkɔ na emegbe be Lightbearer. Wode seke tɔdziʋu sia ɖe Georges-tɔsisia dzi wònɔ afima ƒe eve sɔŋ, le míaƒe aƒe gbɔ tututu. Wova dzrae ɖo le afima be Yehowa Ðasefowo nate ŋu azãe le woƒe gbeƒãɖeɖedɔa me le Indonesia-ƒukpowo dzi. Ɣeaɖewoɣi mía kple nɔvinyenyɔnu Coral míeklɔa tɔdziʋua me kple edzi, eye míeɣea abalatiŋukaɖia ɖaɖea bɔlu.

Afrika Yiyi Kple Srɔ̃ɖeɖe

Ganya va sesẽ ŋutɔ le Australia le ƒe 1930 ƒeawo ƒe domedome, eye mía kple Danye míezɔ mɔ yi South Africa be míakpɔ be afima nɔnɔ asɔ na míaƒe ƒomea hã. Yehowa Ðasefowo ƒe alɔdzedɔwɔƒe si le Australia ŋlɔ amenuɖelɛta tsɔ de asi na mí be míatsɔ na George Phillips, si nɔ gbeƒãɖeɖedɔa dzi kpɔm le Afrika ƒe anyiehenutome ɣemaɣi. George nɔ melidzeƒea le Cape Town be yeado go mí le tɔdziʋua me. Etsɔ Gbetakpɔxɔ Habɔbɔa ƒe agbalẽ si nye Riches de axatome be míate ŋu akpɔ ye adze sii. Eɖe mí fia alɔdzekɔmitia me tɔ atɔ̃awo, siwo dome Robert A. McLuckie hã nɔ gbemagbe ke, le June 6, 1936 dzi.a Le ƒe ma me la, mía kple Bertie​—si nye ŋkɔ si mí katã míeyɔna nɛ​—míeɖe mía nɔewo.

William McLuckie si nye Bertie ƒe tɔgbuitɔgbui, tso Paisley, Scotland, va Afrika le ƒe 1817 me. Le William ƒe mɔzɔzɔ gbãtɔawo me la, eva dze si Robert Moffat, si nye amesi to Tswanagbe me ŋɔŋlɔ vɛ eye wòɖe Biblia gɔme ɖe gbegbɔgblɔ ma me.b Le gɔmedzeɣi mawo me la, William kple eƒe kpeɖeŋutɔ si nye Robert Schoon koe nye yevuŋutsu siwo dzi Mzilikazi, si nye aʋawɔla ɖedzesi aɖe, le Zulu-fia xɔŋkɔ Shaka ƒe asrafowo dome la, ka ɖo. Ale wɔ William kple Robert koe nye yevu siwo woɖe mɔ na woge ɖe Mzilikazi ƒe kɔƒe me, si nye afisi wotso dugã si nye Pretoria ɖo fifia le South Africa. Emegbe Mzilikazi va zu dziɖuɖumegã, eye eyae ƒo to geɖe nu ƒu wòzu Afrika-fiaɖuƒe ɖeka le ƒe alafa 19 lia ƒe domedome.

Bertie nye aho si si vinyɔnu ƒe 12 vi Lyall, kple viŋutsu ƒe 11 vi Donovan, nɔ hafi míedo go mía nɔewo. Ƒe 1927 mee Bertie srɔ̃ Biblia ƒe nyateƒea zi gbãtɔ, si nye ɣleti ʋɛ aɖewo le srɔ̃anyɔnu Edna ƒe ku megbe. Le ƒe asieke siwo kplɔe ɖo me la, eɖe gbeƒã Mawu ƒe Fiaɖuƒe ŋuti nyanyuia le Mauritius kple Madagascar ƒukpowo dzi kpakple le Nyasaland (si nye Malawi fifia), Portuguese East Africa (si nye Mozambique fifia), kple South Africa katã.

Ɣleti ʋɛ aɖewo le esi mía kple Bertie míeɖe mía nɔewo vɔ megbe la, míekplɔ Lyall kple Donovan ɖe asi ʋu yi Johannesburg, afisi Bertie kpɔ dɔ le bɔbɔe. Meva zu gbesiagbe mɔɖela, si nye alesi woyɔa Yehowa Ðasefowo ƒe ɣeyiɣiawo katã ƒe subɔlawoe hena ɣeyiɣi aɖe. Emegbe mefɔ fu va dzi Peter.

Míeʋu Yi Southern Rhodesia

Mlɔeba la, Bertie nɔviŋutsu Jack mia asi mí be míava akpe ɖe ye ŋu le sikakudɔ me le teƒe aɖe si gogo Filabusi, le Southern Rhodesia. Mía kple Bertie míezɔ mɔ yi teƒea, eye míekplɔ Peter, si xɔ ƒe ɖeka ɣemaɣi ɖe asi yii, eye míegblẽ Lyall kple Danovan ɖe danye ƒe dzikpɔkpɔ te vie gbɔ. Esime míeva ɖo Mzingwani-tɔsisia gbɔ la, eɖɔ ale gbegbe, eye ele na mí be míanɔ aɖaka aɖe si wotsi ɖe ka si wohe to yame tso tɔsisia ƒe go ɖeka dzi yi evelia dzi la ŋu me woahe mí atso tɔae. Pauline ƒe fu si xɔ ɣleti ade nɔ ƒonye, eye ele nam hã be mabla Peter hã ɖe akɔnu sesĩe! Mevɔ̃ ŋutɔ, vevietɔ esime wòsusɔ vie kaa de tsia me ɖo ge kloe le tɔsisia titina. Azɔ hã enye zãtitina, eye tsi hã nɔ dzadzam sesĩe! Esi míetso tɔa vɔ la, míezɔ ade kilometa eve lɔƒo hafi ɖo ƒometɔ aɖe ƒe aƒeme.

Emegbe míehaya nyikplɔƒexɔ xoxoe aɖe si me babawo xɔ aƒe ɖo. Xɔmenu ʋɛ aɖewo koe nɔ mía si​—aɖaka siwo me wolɔ kpegbãtu (dynamite) kple nu bubuwo ɖo va yi lae wotsɔ wɔ wo dometɔ aɖewoe. Kpedɔ sesẽ aɖe dzea Pauline dzi enuenu, eye míekpɔ atikeƒlega o. Meléa blanui vevie, gake míeda akpe be Pauline ƒe lãme kana ɖe eme nɛ ɣesiaɣi si wòdze edzi.

Wode Mía Kple Bertie Siaa Game

Míezɔa mɔ zi ɖeka le ɣleti ɖeka me yia dugã si nye Bulawayo, si didi tso mía gbɔ anɔ kilometa 80, me ɖadzraa míaƒe sika le gadzraɖoƒea. Míedea Gwanda, si nye du sue aɖe si gogo Filabusi, hã ɖadia nuɖuɖu eye míeva ɖea gbeƒã hã. Le ƒe 1940, si nye ƒe si kplɔ Xexemeʋa II ƒe gɔmedzedze ɖo me la, woxe mɔ ɖe míaƒe gbeƒãɖeɖedɔa nu le Southern Rhodesia.

Eteƒe medidi o, wolém esime menɔ gbeƒã ɖem le Gwanda. Ɣemaɣi la, Estrella, si nye vinye etɔ̃lia ƒe fu nɔ ƒonye. Esime wonɔ nye nyagbugbɔgadrɔ̃ ƒe biabiaa me dzrom la, wolé Bertie le gbeƒãɖeɖe ta eye wodee game le Salisbury, si didi wu kilometa 300 tso afisi míenɔ gbɔ.

Ale míaƒe nɔnɔmea nɔ ɣemaɣie nye si: Woxɔ Peter ɖe kɔdzi le vemexexedɔ ta, le Bulawayo, eye kakaɖedzi menɔ anyi be ahaya o. Ðeko medzi Estrella eteƒe medidi o ye nye ma, eye xɔ̃nye aɖe kplɔm tso kɔadzi yi Bertie gbɔ le gaxɔa me be wòakpɔ vianyɔnu yeyea. Emegbe esime wogbe be yewomagbugbɔ nye nya adrɔ̃ o la, Indiatɔ kesinɔtɔ aɖe si nye fiasetɔ xe nye megbedanamefewo katã dɔmenyotɔe. Ɣeyiɣi aɖe megbe la, kpovitɔ etɔ̃ va sikakuƒea be yewoalém aɖade game. Wotsɔ tiatia aɖe ɖo ŋkunye me. Matsɔ vinye si xɔ ɣleti atɔ̃ la ɖe asi ayi game loo alo magblẽe ɖe mía vi ƒewuiviawo, Lyall kple Donovan, ƒe dzi kpɔkpɔ te. Metso nya me be matsɔe ɖe asi ayii.

Wode dɔ si nye nuvuvuwo tɔtɔ kple nuwo ŋuti tutu asi nam. Wodi vixɔnamela aɖe nam be wòakpe ɖe ŋunye le Estrella gbɔ kpɔkpɔ me. Enye ɖetugbi aɖe si hã nye gameme si ŋkɔe nye Matossi, eye wobu fɔe be anɔ game se ɖe eƒe kugbe le esi wòwu srɔ̃aŋutsu ta. Esi woɖe asi le ŋunye la, Matossi wó avi le esi magate ŋu akpɔ Estrella dzi o ta. Aƒenɔ si nye nyɔnugamenɔlawo dzi kpɔla kplɔm yi eƒe aƒeme henam ŋdɔnuɖuɖu emegbe wòdem keteke meva srã Bertie kpɔ le Salisbury gaxɔ me.

Esime mía kple Bertie míenɔ gaxɔ me la, Lyall kple Donovan ye kpɔ Peter kple Pauline sueawo dzi. Togbɔ be ƒe 16 koe Donovan xɔ hã la, eyi míaƒe sikakudɔa dzi. Esime woɖe asi le Bertie ŋu le game la, míetso nya me be míaʋu ayi Bulawayo, le esi sikakudɔa mele ame dzi dem o ta. Bertie kpɔ dɔ le ketekedɔwɔƒea eye mena kpekpeɖeŋu le míaƒe ganya gome to nutɔtɔɖaŋu yeye si su asinye ŋudɔwɔwɔ me.

Wobu Bertie ƒe dɔ si nye ketekemɔŋutigaviwo dede dɔ vevii, eyata woɖee le asrafodɔwɔwɔ me. Le aʋawɔƒe mawo me la, yevu Ðasefo siwo ƒe xexlẽme ade wuieve lɔƒo siwo le Bulawayo kpea ta wɔa kpekpewo le míaƒe aƒe sue si me xɔdɔme ɖeka ko nɔ la me, eye mía nɔviŋutsu kple nɔvinyɔnu ameyibɔ ʋɛawo hã kpena le afi bubu le dua me. Gake fifia Yehowa Ðasefowo ƒe hame siwo wu 46, siwo me ameyibɔwo kple yevuwo siaa le ye le Bulawayo!

Míaƒe Aʋamegbesubɔsubɔdɔ

Le aʋaa megbe la, Bertie bia tso ketekedɔwɔƒea si be woaɖe ye ayi Umtali (si nye Mutare fifia), si nye du dzeani aɖe le Mozambique ƒe de dzi. Míedi be míasubɔ le afisi Fiaɖuƒe gbeƒãɖelawo hiã le wu, eye edze abe Umtali sɔ nyuie ene, le esi Ðasefo aɖeke menɔ afima o ta. Le ɣeyiɣi kpui si míenɔ afima me la, Holtshauzen ƒomea, si me viŋutsu atɔ̃ nɔ la, zu Ðasefowo. Fifia hame 13 ye le dua me!

Le ƒe 1947 me la, míaƒe ƒomea dzro eme kpɔ ne anya wɔ be Bertie nagage ɖe mɔɖeɖedɔa me ake. Lyall si gbɔ tso mɔɖeɖedɔa wɔƒe le South Africa, da asi ɖe susua dzi. Donovan nɔ mɔɖeɖedɔa wɔm le South Africa ɣemaɣi. Esi Cape Town alɔdzedɔwɔƒea se nu tso Bertie ƒe didi be yeagage ɖe mɔɖeɖedɔa me ake ŋu la, wobia tso esi be wòaʋu agbalẽdzraɖoƒe aɖe nu ɖe Bulawayo boŋ. Eyata eɖe asi le dɔ ŋu le ketekedɔwɔƒea, eye míegaʋu yi afima. Le esia megbe kpuie la, Southern Rhodesia dutanyanyuigblɔla gbãtɔwo va ɖo Bulawayo, amesiwo dome Eric Cooke, George kple Ruby Bradley, Phyllis Kite, kple Myrtle Taylor hã nɔ.

Le ƒe 1948 me la, Nathan H. Knorr, si nye Gbetakpɔxɔ Habɔbɔa ƒe zimenɔla etɔ̃lia, kple eƒe agbalẽŋlɔla, Milton G. Henschel, ɖi tsa va Bulawayo eye wowɔ ɖoɖo be míatrɔ agbalẽdzraɖoƒea wòazu alɔdzedɔwɔƒe, eye Nɔviŋutsu Cooke nanye edzikpɔla. Le ƒe si kplɔe ɖo me la, míedzi mía vinyɔnu Lindsay. Emegbe le ƒe 1950 me la, woɖe alɔdzea yi Salisbury, si nye Southern Rhodesia ƒe dugã, eye míawo hã míeʋu yi afima. Míeƒle aƒe gã aɖe si me míenɔ ƒe geɖe. Gbesiagbe mɔɖelawo kple amedzrowo va dzea mía gbɔ ɣesiaɣi, eyata wova yɔa míaƒe aƒea be McLuckie amedzrodzeƒe!

Le ƒe 1953 me la, mía kple Bertie míede Yehowa Ðasefowo ƒe dukɔwo dome takpekpe le New York City ƒe Yankee Stadium. Nudzɔdzɔ si míaŋlɔ be o kae nye si! Le ƒe atɔ̃ megbe la, Lyall, Estrella, Lindsay, kple Jeremy, si xɔ ɣleti 16 nɔ mía ŋu míede ƒe 1958 dukɔwo dome takpekpe le Yankee Stadium kple Polo Grounds si te ɖe eŋu la ŋkeke enyia katã. Vavalawo ƒe xexlẽme si womekpɔ kpɔ o, si nye amesiwo wu 250,000 ye va se dutoƒonuƒoa le ŋkeke mamlɛa dzi!

Gbeƒãɖeɖedɔdasi Yeye

Bertie nye Salisbury alɔdzedɔwɔƒea ƒe dɔwɔla si tsoa aƒeme yia dɔ me anɔ ƒe 14 sɔŋ, gake míetso nya me be míasubɔ le afisi hiahiã lolo wu le le Seychelles. Míedzra míaƒe aƒe kple míaƒe xɔmenuwo eye míeƒo esiwo susɔ la nu ƒu ɖe míaƒe agbatsɔʋu si nye Opel me. Míekplɔ Lindsay, si xɔ ƒe 12, kple Jeremy, si xɔ ƒe 5, ɖe asi zɔ mɔ si ƒe didime anɔ kilometa 3,000 to mɔ dzekpodzeʋe siwo dzi womedzra ɖo o dzi, to Northern Rhodesia (si nye Zambia fifia), Tanganyika (si nye Tanzania ƒe akpa aɖe fifia), kple Kenya, eye mlɔeba míeɖo melidzeƒedu si nye Mombasa.

Mombasa xɔ dzo ale gbegbe, gake ƒuta dzeaniwo nɔ afima. Míegblẽ míaƒe ʋu ɖe Ðasefo aɖe gbɔ le dua me eye míedze míaƒe ŋkeke etɔ tɔdziʋumemɔzɔzɔ yi Seychelles la gɔme. Esi míeɖo la, Norman Gardner, si nye ŋutsu aɖe si Ðasefo siwo tso Dar es Salaam, Tanganyika, fia Biblia ƒe nyateƒea ŋuti sidzedze vevi aɖewoe la, va kpe mí. Ewɔ ɖoɖo na mí be míahaya aƒe aɖe si nɔ Sans Souci Bali me, si wotu na kpovitɔ siwo dzɔ Makarios, si nye Greece Orthodɔks Bisiɔpgã ŋu, amesi woɖe aboyo tso Cyprus le ƒe 1956 me.

Esi míaƒe aƒea sa ɖe aga ŋutɔ ta la, míeʋu le ɣleti ɖeka megbe yi ƒutaƒe aɖe si le Beau Vallon me. Le afima la, míekpe amewo wova se nuƒo siwo Bertie ƒo le míaƒe akpata me. Míedze Biblia sɔsrɔ̃ gɔme kple Bindschedler ƒomea, eye le ɣleti aɖewo megbe la, Bertie na nyɔnyrɔ wo hekpe ɖe woƒe atikɔmevi nyɔnu kpakple Norman Gardner kple srɔ̃a ŋu. Mía kple Norman míenɔ eƒe tɔdziʋu me de Cerf-ƒukpo dzi hã, afisi Bertie ƒo Biblia me nuƒowo le aƒe aɖe si nye tɔdziʋu me la me.

Esi míenɔ Seychelles anɔ ɣleti ene la, kpovitɔwo ƒe amegã gblɔ na mí be míadzudzɔ gbeƒãɖeɖe ne menye nenema o la, yeanyã mí. Ganyawo va nɔ sesẽm na mí, eye megafɔ fu ake. Míetso nya me be míayi míaƒe dutoƒogbeƒãɖeɖedɔa dzi. Elabena míenya be aleke ke wòanɔ hã míanɔ anyi wòadidi o. Eva dzɔ be esime tɔdziʋu bubu tso India va le ɣleti ɖeka megbe la, wonyã mí.

Tɔtrɔgbɔ Dziŋɔ Aɖe

Esi míeɖo Mombasa la, míexɔ míaƒe ʋua eye míeɖo ta anyiehe to ƒutamɔ si dzi ke geɖe nɔ la dzi. Esime míeɖo Tanga la, míaƒe ʋua ƒe mɔ̃ dzudzɔ dɔwɔwɔ. Ga vɔ le mía si, gake ƒometɔ aɖe kple Ðasefo bubu kpe ɖe mía ŋu. Esime míenɔ Mombasa la, nɔviŋutsu aɖe gblɔ na mí be yeakpe ɖe mía ŋu le ga gome ne míayi dziehe lɔƒo le Somalia ava ɖe gbeƒã. Gake nye lãme menɔ kɔkɔm o, eyata míeɖoe be míatrɔ ayi aƒe le Southern Rhodesia.

Míetso eme tso Tanganyika yi Nyasaland eye míezɔ mɔa to anyigbe gome to Nyasa-ta, si woyɔna fifia be Malawi-ta, ƒe ɣetoɖoƒe gome. Nye lãme gblẽ vevie ale gbegbe be mebia tso Bertie si be wòaɖim da ɖe mɔ to maku! Míete ɖe du si nye Lilongwe ŋu, eyata etsɔm yi kɔdzi le afima. Wodo vevesesenutsitike aɖewo nam eye mekpɔ gbɔdzɔe vie. Esi nyemagate ŋu anɔ ʋu me ayi mɔzɔzɔa dzi o ta la, Bertie kple ɖeviawo yi mɔzɔzɔa dzi kple ʋu, zɔ anɔ kilometa 400 de Blantyre. Le ŋkeke ʋɛ aɖewo megbe la, ƒometɔ aɖe wɔ ɖoɖo nam be maɖo yameʋu ayi wo gbɔe. Meɖo yameʋu tso Blantyre trɔ yi Salisbury, eye Bertie kple ɖeviawo ɖo ʋu tsɔ zɔ mɔa ƒe akpa mamlɛa va aƒe.

Aleke gbegbe mí katã míaƒe dzi dze emee nye si be míegbɔ va Salisbury le mía vinyɔnu Pauline kple srɔ̃a ƒe aƒeme! Míedzi mía vi mamlɛa, Andrew, le ƒe 1963 me. Eƒe dzitodzito gbã eye womebu agbe ɖe eŋu o, gake dzidzɔtɔe la, etsi agbe. Mlɔeba la, míeʋu yi South Africa eye míetso aƒe ɖe Pietermaritzburg azɔ koŋ.

Woyra Mí Kple Ƒome Lɔ̃ame Aɖe

Bertie ku le ŋutifafa me esi wòxɔ ƒe 94, le ƒe 1995 me, eye tso ɣemaɣi la, mele ɖokuinye si le míaƒe aƒea me le afisia. Gake nyemetsi akogo o! Lyall kple Pauline kple woƒe ƒomeawo le Yehowa subɔm le South Africa afisia, eye wo dometɔ aɖewo le Pietermaritzburg afisia tututu. Lindsay kple eƒe ƒomea le California, U.S.A., afisi wo katã nye Ðasefo siwo le vevie dom nu le. Mía vi mamlɛtɔ siwo nye Jeremy kple Andrew, ʋu yi Australia, afisi wo ame evea siaa nye srɔ̃tɔ kpɔdzidzɔwo le eye wonye hamemegãwo le woƒe hamewo me.

Mía vi enyiawo katã wɔ mɔɖeɖedɔa ɣeaɖeɣi kpɔ, eye wo dometɔ ade subɔ le Gbetakpɔxɔ Habɔbɔa ƒe alɔdzedɔwɔƒewo. Donovan wu Gbetakpɔxɔ Habɔbɔa ƒe Gilead Biblia Suku ƒe klass 16 lia nu le February 1951 me eye wònye dzikpɔla mɔzɔla le United States hafi trɔ yi ɖawɔ dɔ le South Africa alɔdzedɔwɔƒea. Fifia enye Kristotɔ hamemegã le Klerksdorp, si didi anɔ kilometa 700 tso Pietermaritzburg gbɔ. Estrella le srɔ̃aŋutsu, Jack Jones, gbɔ le Yehowa Ðasefowo ƒe xexeme katã ƒe dɔwɔƒe gã le Brooklyn, New York.

Peter, si nye vinye ŋgɔgbea, wɔ ɣeyiɣiawo katã ƒe subɔsubɔdɔa ƒe aɖewo, le mɔɖeɖedɔa kple Gbetakpɔxɔ Habɔbɔa ƒe alɔdzedɔwɔƒe le Rhodesia siaa me. Gake ƒe aɖewoe nye si va yi la, melé blanui vevie esi wòdzudzɔ hadede kple Kristotɔwo ƒe hamea.

Ne metrɔ bu nye agbenɔnɔ ŋu la, mate ŋu agblɔ be dzi dzɔm nyateƒe be menɔ danye ŋu esi menye ƒewuivi míeyi Afrika. Nyateƒee, agbenɔnɔ menɔ bɔbɔe ɣesiaɣi o, gake enye mɔnukpɔkpɔ nam be menɔ megbe na srɔ̃nye eye míenyi ƒome si kpe asi ɖe ŋgɔxɔxɔ le gbeƒãɖeɖe Mawu ƒe Fiaɖuƒe ŋuti nyanyuia ŋu le Afrika ƒe anyiehenutome.​—Mateo 24:⁠14.

[Etenuŋɔŋlɔwo]

[Anyigbatata si le axa 15]

SOUTH AFRICA

Pietermaritzburg

Kierksdorp

Pretoria

Johannesburg

ZIMBABWE

Gwanda

Bulawayo

Filabusi

Gweru

Harare

Mutare

ZAMBIA

MOZAMBIQUE

MALAWI

Biantyre

Lilongwe

TANZANIA

Dar es Salaam

Tanga

KENYA

Mombasa

SEYCHELLES

SOMALIA

[Nɔnɔmetata si le axa 12]

Mía kple Peter, Pauline, kpakple Estrella, hafi makplɔ Estrella ɖe asi ayi gamee

[Nɔnɔmetata si le axa 13]

Lyall kple Donovan le míaƒe nyikplɔƒexɔ si gogo Filabusi la ŋgɔ

[Nɔnɔmetata si le axa 14]

Cape Town

[Nɔnɔmetata si le axa 15]

Mía kple Bertie, Lyall, Pauline, Peter, kpakple Donovan le ƒe 1940 me

[Nɔnɔmetata si le axa 16]

Carmen kple via atɔ̃ (tso miame yi ɖusime va kpe): Donovan, esime wònɔ Gilead le ƒe 1951 me, kple Jeremy, Lindsay, Estrella, kpakple Andrew egbea