Nɔnɔme Nyui Siwo Ðea Vi Ɣesiaɣi—Lɔlɔ̃

BIBLIA ƑE MƆFIAME: “Mido lɔlɔ̃, elabena enye ɖekawɔwɔ ƒe nublanu deblibo.”—Kolosetɔwo 3:14.

VIÐEAWO: Menye lɔlɔ̃ si nɔa ŋutsu kple nyɔnu dome ŋue Biblia ƒoa nu tsoe zi geɖe o. Ke boŋ enye lɔlɔ̃ si wotu ɖe nɔnɔme nyuiwo abe veveseseɖeamenu, tsɔtsɔke, ɖokuibɔbɔ, nuteƒewɔwɔ, dɔmenyonyo, tufafa kple dzigbɔɖi ene la dzi. (Mika 6:8; Kolosetɔwo 3:12, 13) Lɔlɔ̃ sia menye esi nu va yina kaba o, ke boŋ enye esi nɔa tsitsim ɖe edzi ɖaa.

Brenda, si ɖe srɔ̃ anɔ abe ƒe 30 ene la, gblɔ be: “Ne srɔ̃ɖeɖea nɔ anyi eteƒe didi la, lɔlɔ̃ si nɔa srɔ̃tɔwo dome la dea to sãsãsã wu esi nɔ wo dome esime woɖe wo nɔewo teti.”

Sam, si nye ŋutsu aɖe si ɖe srɔ̃ ƒe 12 ye nye esia la, gblɔ be: “Nye kple srɔ̃nye míekpɔa dzidzɔ eye míaƒe nu kuna ɣeaɖewoɣi gɔ̃ hã ɖe ale si Biblia ƒe aɖaŋuɖoɖowo ɖea vi kple ale si wo me kɔ la ŋu! Ne míewɔ ɖe wo dzi la, nuwo zɔna nyuie. Medina be mawɔ ɖe wo dzi ɣesiaɣi, gake ɣeaɖewoɣi la wòtoa miame nam. Esia dzɔna ne metsɔ nyawo vevie akpa, di ɖokuinye tɔ alo ɖeɖi te ŋunye. Ne edzɔ alea la, medoa gbe ɖa na Yehowa be wòakpe ɖe ŋunye maɖu seselelãme ma dzi. Eyome mekplaa asi kɔ na srɔ̃nye, eye kaka nàkpɔ la, ɖeko wònɔna abe ɖe naneke medzɔ o ene!”

Yesu Kristo gblɔ be “nunya ƒe dɔwɔwɔwo mee eƒe dzɔdzɔenyenye dzena le.” (Mateo 11:19) Nya siawo ɖee fia kɔtɛe be nunya vavã bɔ ɖe Biblia me. Eƒe nufiamewo kple nɔnɔme nyui siwo wòdea dzi ƒo be míaɖe afia la ɖea vi. Woɖea vi ɣesiaɣi. Emenyawo sɔ na amegbetɔ ɖe sia ɖe. Eƒo nu tso amegbetɔwo ƒe nɔnɔme ŋu wòde pɛpɛpɛ ale gbegbe eye wòɖo kpe edzi be Nunyala Kɔkɔtɔ, si nye mía Wɔla Yehowa Mawu, gbɔe wotso. Gake ne míetsɔ emenyawo wɔ dɔ hafi ko wòɖea vi na mí. Eya ta Biblia de dzi ƒo na mí be “miɖɔe kpɔ, eye miakpɔ be, Yehowa ƒe dɔme nyo.” (Psalmo 34:9) Àdi be yeaɖɔe kpɔa?