Ta 76

Nu Ðuɖu kple Farisitɔ Aɖe

ESI Yesu ɖo nya ŋu na glãkahela siwo tɔ gbe afisi wòkpɔ ŋusẽ tsoe tsɔ da gbe le ŋutsu aɖe si mete ŋu ƒoa nu o ŋu vɔ la, Farisitɔ aɖe kpee be wòava ye gbɔ ava ɖu nu. Hafi Farisitɔwo naɖu nu la, wowɔa kɔnu si nye be woklɔa asi vaseɖe abɔklugui nu ke. Wowɔa esia hafi ɖua nu kple le nuɖuɖua megbe kpakple ne wotsɔ nuɖuɖua bubu va kpee gɔ̃ hã. Togbɔ be kɔnyinyia menye dada le Mawu ƒe se si woŋlɔ ɖi la dzi o hã la, egbɔ nusi Mawu gblɔ be woawɔ le dzadzɛnyenye ɖe kɔnu nu me la ŋu.

Esi Yesu mewɔ ɖe kɔnyinyia dzi o la, ewɔ nuku na amesi kpee la. Togbɔ be ɖewohĩ metsɔ nu gblɔ alesi nya la wɔ mo yaa nɛ o hã la, Yesu kpɔe dze sii eye wògblɔ be: “Mi egbe farisitɔwo, mieklɔa kplu kple agba ŋuti, ke mia me yɔ fũ kple adzodada kple vɔ̃ɖinyenye. Mi movitɔwo! Alo ɖe menye amesi wɔ eŋuti la, wɔ eme hã o mahã?”

Yesu to ema dzi ɖe Farisitɔ siwo klɔa asi le kɔnu ta gake womeklɔa vɔ̃ɖinyenye ɖa le woƒe dzi me o la ƒe alakpanuwɔwɔ fia. Eɖo aɖaŋu na wo be: “[Mitsɔ] nusiwo le eme la, wɔ nunana na ame dahewo, eye kpɔ ɖa, nuwo katã le dzadzɛ na mi.” Ele be dzi si me lɔlɔ̃ le naʋã wo le nunana me, ke menye didi be yewoana yewoƒe alakpadzɔdzɔenyenye nawɔ dɔ ɖe amewo dzi o.

Yesu yi edzi be: “Baba na mi farisitɔwo! Elabena mienaa ahamee kple ƒãglo kpakple ama bubu ƒomeviwo katã ƒe ewolia, eye mietoa ʋɔnudɔdrɔ̃ kple Mawu ƒe lɔlɔ̃ ŋuti; ke esiawo le be, miawɔ, eye miagagblẽ ekeme hã ɖi mawɔmawɔ o.” Mawu ƒe Se si wòtsɔ na Israel la bia be woadzɔ agblemenuwo ƒe ewolia. Ahamee kple ƒãglo nye nu miemie alo amagbe sue siwo wodea nuɖuɖu me wòvivina. Farisitɔwo kpɔa egbɔ be yewodzɔ amagbe maɖinu siawo gɔ̃ hã ƒe ewolia, gake Yesu bu fɔ wo be woŋe aɖaba ƒu nudidi si le vevie wu, si nye be woaɖe lɔlɔ̃ afia, woanyo dɔme, eye woabɔbɔ wo ɖokui la dzi.

Le fɔbubu wo ɖe edzi me la, Yesu gblɔ be: “Baba na mi farisitɔwo! Elabena mielɔ̃a nɔƒe gbãtɔwo nɔnɔ le ƒuƒoƒewo, kple gbedonamewo le ablɔwo me. Baba na mi! Elabena miele abe yɔdo, siwo mele dzedzem o ene, eye amesiwo le wo dzi zɔm la, womenyɛ o.” Woƒe makɔmakɔnyenye la mele dzedzem ƒã o. Farisitɔwo ƒe subɔsubɔ dzena le gota gome gake asixɔxɔ aɖeke mele eŋu le ememe o! Enɔ te ɖe alakpanuwɔwɔ dzi.

Esi sefiala aɖe si nye amesiwo nya Mawu ƒe Se la nyuie dometɔ ɖeka se fɔbunya siawo la, ehe nya be: “Nufiala, esi nègblɔ esiawo la, èdzu míawo hã.”

Yesu da agba ɖe Sea nyala siawo hã dzi be: “Baba na mi sefialawo hã! Elabena mietsɔa agba kpekpe, siwo wu tsɔtsɔ la, ɖoa amewo dzi, eye mia ŋutɔwo la mietsɔa miaƒe asibide ɖeka ka agbawo ŋu o. Baba na mi! Elabena mieɖɔa nyagblɔɖilawo ƒe yɔdowo ɖo, ke mia fofowoe wu wo.”

Agba siwo ƒe nya gblɔm Yesu le le afisiae nye kɔnyinyi siwo woxɔ le nya me, gake sefiala siawo gbe eme se sue ɖeka gɔ̃ hã ɖeɖe ɖa be agba la nanya tsɔ na amewo. Yesu ɖee fia be wolɔ̃na ɖe nyagblɔɖilawo wuwu gɔ̃ hã dzi, eye wòxlɔ̃ nu wo be: “Woabia nyagblɔɖila, siwo katã ƒe ʋu woda ahe tso xexeme ƒe gɔmedzedze la, atso dzidzime sia si me tso Abel ƒe ʋu dzi vaseɖe Zaxarya, amesi wowu le vɔsamlekpui kple xɔ la domee la, ƒe ʋu la dzi. Ẽ, mele egblɔm na mi bena: Woabiae atso dzidzime sia si me.”

Ameƒomea ƒe xexeme si woate ŋu axɔ na la dze egɔme esime Adam kple Xawa dzi vi; eyata Abel nɔ agbe le “xexeme ƒe gɔmedzedze.” Esi wowu Zaxarya ŋutasẽtɔe megbe la, Aramtɔwo ƒe aʋakɔ aɖe va tsrɔ̃ Yuda. Gake Yesu gblɔe ɖi be tsɔtsrɔ̃ si vɔ̃ɖi wu ava yeƒe dzidzimea dzi le woƒe vɔ̃ɖinyenye si nu sẽ wu ta. Tsɔtsrɔ̃ sia va le ƒe abe 38 ene megbe, le ƒe 70 M.Ŋ. me.

Le eƒe fɔbunyawo dzi yiyi me la, Yesu gblɔ be: “Baba na mi sefialawo! Elabena mietsɔ nunya ƒe safui la dzoe, mia ŋutɔwo mieyi ɖe eme o, eye amesiwo le yiyim ɖe eme la, miexe mɔ na wo.” Enye amesiwo nya Sea nyuie ƒe dɔ be woaɖe Mawu ƒe Nya la me na amewo ahana woase egɔme. Gake wodo kpo esia wɔwɔ eye womenana egɔme sese ƒe mɔnukpɔkpɔa gɔ̃ hã sua ameawo si o.

Farisitɔwo kple senyalawo do dziku ɖe Yesu ŋu vevie be wòɖe ha yewo. Esi wòdzo le aƒea me la, wova nɔ tsitre tsim ɖe eŋu adãtɔe henɔ nyawo biamee fũ. Wodze agbagba be yewoatre mɔ nɛ wòagblɔ nya aɖe si ta yewoate ŋu ana woalée. Luka 11:37-54; Mose V, 14:22; Mixa 6:8; Kronika II, 24:20-25.

▪ Nukatae Yesu bu fɔ Farisitɔwo kple Sea nyalawo?

▪ Agba kawoe sefialawo da ɖe amewo dzi?

▪ Ɣekaɣie nye “xexeme ƒe gɔmedzedze”?