Akpa 7
Mawu Ƒe Tameɖoɖo Ava Eme Kpuie
1, 2. Nukatae míate ŋu aka ɖe edzi be Mawu awɔ nu atsɔ aɖe vɔ̃ɖinyenye kple fukpekpe ɖae?
1 Togbɔ be Mawu ɖe mɔ ɖe blibomademade kple fukpekpe ŋu ɣeyiɣi didi aɖe le amegbetɔwo ƒe nukpɔsusu nu hã la, maɖe mɔ be nɔnɔme gbegblẽwo nayi edzi ɖaa o. Biblia la gblɔ na mí be Mawu ɖe mɔ ɖe nusiawo ŋu be woadzɔ hena ɣeyiɣi aɖe.
2 “Ɣeyiɣi li na nusianu.” (Nyagblɔla 3:1) Ne ɣeyiɣi si Mawu ɖe mɔ ɖe vɔ̃ɖinyenye kple fukpekpe ŋu wu enu la, ekema ade nu amegbetɔwo ƒe nyawo me. Ahe vɔ̃ɖinyenye kple fukpekpe ava nuwuwui eye wòawɔ tame si wòɖo le gɔmedzedzea me be yeana amegbetɔƒome deblibo si le dzidzɔ kpɔm eye wòle ŋutifafa blibo kple ganyawo ƒe dedienɔnɔ me le Paradiso ƒe nɔnɔmewo me la nayɔ anyigba dzi la dzi.
Mawu ƒe Ʋɔnudɔdrɔ̃wo
3, 4. Aleke Lododowo ƒe agbalẽa ƒo nu tso nusiwo ado tso eme ne Mawu de nu nyawo me la ŋutie?
3 De dzesi Biblia me nyagblɔɖi geɖe siwo gblɔ nusi Mawu ƒe nudede nyawo me, si nye eƒe ʋɔnudɔdrɔ̃ me tsonuwo afia na amegbetɔƒomea kpuie la dometɔ ʋɛ aɖewo:
4 “Nuteƒewɔlawo anɔ anyigba la dzi, eye ame maɖifɔwo asusɔ ɖe edzi; ke woatsrɔ̃ ame vɔ̃ɖiwo ɖa le anyigba dzi, eye woaho ame maɖianukwarewo ɖa le edzi.”—Lododowo 2:21, 22.
5, 6. Aleke Psalmo 37 ɖe nusi adzɔ ne Mawu de nu nyawo me la fiae?
5 “Woatsrɔ̃ ame vlowo, ke amesiwo kpɔa mɔ na Yehowa la, woanyi anyigba la dome. Ekpɔtɔ vie ko ame vɔ̃ɖi la maganɔ anyi o . . . Ke ame [fafawo] anyi anyigba la dome, eye dzi adzɔ wo ɖe ŋutifafa gbogbo la ŋuti.”—Psalmo 37:9-11.
6 “Kpɔ mɔ na Yehowa, eye nalé ŋku ɖe eƒe mɔwo ŋu, ekema ado wò ɖe dzi, ne nanyi anyigba la dome, eye ne woatsrɔ̃ ame vɔ̃ɖiwo la, àkpɔ eteƒe. Lé ŋku ɖe ame maɖifɔ la ŋu, eye nakpɔ ame dzɔdzɔe la ɖa, elabena dzidzimeviwo le ŋutifafame la si. Woatsrɔ̃ dzidalawo katã eye woatsrɔ̃ ame vɔ̃ɖiwo ƒe dzidzimeviwo.”—Psalmo 37:34, 37, 38.
7. Aɖaŋu nyui kae Mawu ƒe Nya la ɖo na mí?
7 Eyata le etsɔme wɔnuku si ava na amesiwo lɔ̃na ɖe gome si le Wɔla ŋusẽkatãtɔ si be wòaɖu mía dzi la dzi ta la, woxlɔ̃ nu mí be: “Wò dzi nedzra nye sededewo ɖo; elabena woahe agbenɔnɔ didi, ƒe nyuiwo kple ŋutifafa vɛ na wò kpaŋkpaŋ.” Le nyateƒe me la, woana agbe mavɔ amesiwo tiae be yewoawɔ Mawu ƒe lɔlɔ̃nu! Eyata Mawu ƒe Nya la ɖo aɖaŋu be: “Ðo ŋu ɖe Yehowa ŋu tso dzi blibo me, ke megaɖo dzi ɖe wò gɔmesese ŋu o. Lé ŋku ɖe eŋu le wò mɔwo katã dzi, ekema ata mɔ na wò.”—Lododowo 3:1, 2, 5, 6.
Mawu ƒe Dziɖuɖu tso Dziƒo
8, 9. Mɔ ka dzie Mawu ato akɔ anyigba sia ŋu?
8 Mawu ato dziɖuɖu nyuitɔ kekeake si asu ameƒomea si dzi akɔ anyigba la ŋu le mɔ sia nu. Enye dziɖuɖu si aɖe dziƒonunya afia elabena aɖu dzi tso dziƒo le Mawu ƒe mɔfiafia te. Eye Dziƒofiaɖuƒe ma aɖe amegbetɔwo ƒe dziɖuɖu ƒomevi ɖesiaɖe ɖa le anyigba dzi. Womagana mɔnukpɔkpɔ amegbetɔwo azɔ be woatiae be yewoaɖu dzi Mawu manɔmee gbeɖe o.
9 Nyagblɔɖi si le Daniel 2:44 gblɔ le esia ŋu be: “Le fia mawo [egbegbe dziɖuɖuwo] ŋɔli la dziƒo ƒe Mawu la aɖo fiaɖuƒe aɖe anyi [ɖe dziƒo], si matsrɔ̃ gbeɖegbeɖe o, eye eƒe fiaɖuƒe mayi ɖe dukɔ bubu aɖeke si me o [womagaɖe mɔ na amegbetɔwo be woaɖu dzi Mawu manɔmee o]; agbã fiaɖuƒe mawo katã [siwo li fifia], eye wòagblẽ wo, ke eya ŋutɔ anɔ anyi tegbee.”—Kpɔ Nyaɖeɖefia 19:11-21; 20:4-6 hã.
10. Nukatae míate ŋu aka ɖe edzi be le Mawu ƒe Dziƒofiaɖuƒea te la, nugbegblẽwɔwɔ maganɔ dziɖuɖuwo me akpɔ o?
10 Eyata dziɖuɖu gblẽkuwo magaɖu ameƒomea dzi azɔ o, elabena ne Mawu he nuɖoanyi sia va nuwuwui la, amegbetɔ ƒe dziɖuɖu eya ŋutɔ manɔmee la maganɔ anyi o. Eye Fiaɖuƒe si aɖu dzi tso dziƒo la magblẽ o, elabena Mawue nye Eɖola kple Etakpɔla. Ke boŋ awɔ nusi aɖe vi gãtɔ kekeake na amegbetɔ siwo dzi ɖum wòle la. Ekema woawɔ Mawu ƒe lɔlɔ̃nu le anyigba bliboa katã dzi abe alesi wowɔnɛ le dziƒo ene. Ema tae Yesu te ŋu fia eƒe nusrɔ̃lawo be woado gbe ɖa na Mawu be: “Wò fiaɖuƒe nava! Woawɔ wò lɔlɔ̃nu le anyigba dzi, sigbe alesi wowɔna le dziƒo ene!”—Mateo 6:10.
Aleke Gbegbee Míegogo Nuwuwuae?
11. Biblia ƒe akpa kawoe míakpɔ nyagblɔɖi siwo akpe ɖe mía ŋu míanya alesi gbegbe míegogo nuɖoanyi sia ƒe nuwuwui la le?
11 Aleke gbegbee míegogo nuɖoanyi sia si me dzidzeme mele o ƒe nuwuwu kple Mawu ƒe xexeme yeyea ƒe gɔmedzedzee? Biblia me nyagblɔɖiwo ɖo eŋu na mí eme kɔ ƒã. Le kpɔɖeŋu me, Yesu ŋutɔ gblɔ nusi míakpɔ mɔ na ale be míanya akpa si míele na ‘nuɖoanyiawo ƒe nuwuwu’ la ɖi, abe alesi Biblia la gblɔe ene. Woŋlɔ esia ɖe Mateo ta 24, kple 25, Marko ta 13, kple Luka ta 21 me. Abe alesi woŋlɔe ɖe Timoteo II, ta 3 hã me ene la, apostolo Paulo gblɔ ɖi be ɣeyiɣi aɖe le vava ge si woayɔ be “ŋkeke mamlɛawo” si me nudzɔdzɔ vovovowo agaɖo kpe afisi míeɖo na ɣeyiɣiawo la dzi.
12, 13. Nya kae Yesu kple Paulo wogblɔ tso nuwuɣia ŋuti?
12 Yesu gblɔ be ɣeyiɣi sia adze egɔme kple nudzɔdzɔ siawo: “Dukɔ latsi tre ɖe dukɔ ŋuti, eye fiaɖuƒe ɖe fiaɖuƒe ŋuti, dɔwuame kple dɔléame kple anyigbaʋuʋu ava teƒeteƒewo.” (Mateo 24:7) Luka 21:11 ɖee fia be egblɔ hã be “dɔvɔ̃wo lava teƒeteƒewo.” Eye exlɔ̃ nu tso “nu madzɔmadzɔ wɔwɔ ƒe agbɔsɔsɔ” hã ŋu.—Mateo 24:12.
13 Apostolo Paulo gblɔ ɖi be: “Ke nya esia bena, le ŋkeke mamlɛawo me la ɣeyiɣi vɔ̃wo lava. Elabena ameawo lanye ɖokuilɔ̃lawo, galɔ̃lawo, adegbe ƒuƒlu ƒolawo, dadalawo, busunyagblɔlawo, ame maɖoto dzilawo, ame madakpewo kple ame makɔmakɔwo; amesiwo melɔ̃a ame ƒe nya o, amesiwo gbea avuléle, ameŋuzɔlawo, amesiwo mete ŋu ɖua wo ɖokui dzi o, ame wɔadãwo, amesiwo melɔ̃a nu nyui o, yomemɔfialawo, ame mabunuwo, amesiwo doa wo ɖokui ɖe dzi glodzo, amesiwo lɔ̃a hadzedze wu esi woalɔ̃ Mawu, amesiwo si mawusosroɖa ƒe nɔnɔme le, gake wogbe eƒe ŋusẽ. . . . Ame vɔ̃ɖiwo kple ameblelawo la woayi dzi vɔ̃ɖitɔe wu anɔ amewo blem, eye amewo able wo.”—Timoteo II, 3:1-5, 13.
14, 15. Aleke ƒe alafa 20 lia me nudzɔdzɔwo ɖo kpe edzie be ŋkeke mamlɛawo mee míele nyateƒe?
14 Ðe nusiawo siwo Yesu kple Paulo wogblɔ la va eme le míaƒe ɣeyiɣi sia mea? Ẽ, wova eme nyateƒe. Xexemeʋa I nye aʋa si gblẽ nu sã wu aʋa siwo katã wowɔ vaseɖe ɣemaɣi me la. Eyae nye xexemeʋa gbãtɔ eye wònye tɔtrɔƒe le egbegbe ŋutinya me. Dɔtoto, dɔléle ƒe dzidziɖedzi, kple afɔku bubuwo kplɔ aʋa ma ɖo. Abe alesi Yesu gblɔe ene la, nu mawo siwo dzɔ tso ƒe 1914 me heyina la nye “fuɖuame ƒe gɔmedzedze.” (Mateo 24:8) Woawoe dze ɣeyiɣi si wogblɔ ɖi si woyɔ be “ŋkeke mamlɛawo” la gɔme, esi nye dzidzime mamlɛtɔ si me Mawu aɖe mɔ ɖe vɔ̃ɖinyenye kple fukpekpe ŋu le, ƒe gɔmedzedze.
15 Anɔ eme be ènya ƒe alafa 20 lia me nudzɔdzɔwo nyuie. Ènya tɔtɔ si esia he vɛ. Wowu amesiwo ƒe xexlẽme ade miliɔn 100 le aʋawɔwɔwo me. Dɔwuame kple dɔléle wu ame miliɔn alafa geɖe bubuwo. Anyigbaʋuʋuwo wu amesiwo womenya xexlẽme na o. Bubumademade agbe kple nunɔamesiwo ŋu dzi ɖe edzi. Vɔvɔ̃ na hlɔ̃dodo xɔ gbesiagbegbenɔnɔ me. Woda agbenyuinɔnɔ ƒe dzidzenuwo ɖe aga. Amewo ƒe agbɔsɔsɔ fũ le kuxi siwo womele ta kpɔm na o la hem vɛ. Ðiƒoƒo le nu gblẽm le alesi woase vivi le agbenɔnɔ me ŋu eye wòle nu gblẽm le eŋu gɔ̃ hã. Nyateƒee, míele ŋkeke mamlɛawo me tso ƒe 1914 me eye míele Biblia me nyagblɔɖi siwo ku ɖe míaƒe ɣeyiɣia ŋu ƒe taƒoƒo gogom.
16. Ɣeyiɣi ƒe didime kae ŋkeke mamlɛawo axɔ?
16 Ɣeyiɣi didi kae ŋkeke mamlɛ siawo anɔ anyi ase ɖo? Yesu gblɔ tso ɣeyiɣi si anye “fuɖuame ƒe gɔmedzedze” tso ƒe 1914 me heyina ŋuti be: “Dzidzime sia nu mele yiyi ge, vaseɖe esime nusiawo katã nava ve me o.” (Mateo 24:8, 34-36) Eyata ele be ŋkeke mamlɛawo ƒe dzesiawo ƒe akpa ɖesiaɖe nava eme le ɣeyiɣi kpui aɖe me. Nyaɖeɖefia 12:12 gblɔ be le Satana nyanya ɖo ɖe anyigbanutowo me megbe la, ɣeyiɣi ʋɛ aɖewo koe asusɔ nɛ.
17, 18. Nyagblɔɖi kae ɖee fia be míete tu xexe sia ƒe nuwuwu ŋutɔ?
17 Apostolo Paulo gblɔ nya bubu ɖi si ɖee fia be nuɖoanyi sia ƒe nuwuwu gogo ŋutɔ be: “Yehowa ƒe ŋkeke la gbɔna, abe fiafitɔ le zã me ene. Ne wole gbɔgblɔm be: ‘Ŋutifafa kple dedienɔnɔ!’ la, tete tsɔtsrɔ̃ kpata ava lili wo kpoyi . . . , eye womate ŋu asi le enu o.”—Tesalonikatɔwo I, 5:2, 3, NW; kpɔ Luka 21:34, 35 hã.
18 Egbea Dukɔwo Dome Nyaʋiʋli la wu enu, eye dukɔwo dome ʋawɔwɔ maganye ŋɔdzidonu gã o. Eyata awɔ na dukɔwo be yewole xexemenuɖoanyi yeye aɖe gogom. Gake ne ewɔ na wo be yewoƒe agbagbadzedzewo le edzi dzem la, nusi to vovo kura na nusi wosusu lae adzɔ, elabena emae anye dzesi mamlɛtɔ be nuɖoanyi sia ƒe tsɔtsrɔ̃ si Mawu ahe vɛ la tu aƒe. Ðo ŋku edzi be dunyahehe me ɖoɖowɔwɔwo kple nubablawo mele tɔtrɔ ɖɔʋu aɖeke hem va amewo domee o. Womena amewo le wo nɔewo lɔ̃m o. Eye xexeamedziɖulawo mete ŋu le nuvlowɔwɔ nu tsim, alo le dɔléle kple ku ɖem ɖa o. Eyata mègaɖo ŋu ɖe amegbetɔwo ƒe ŋutifafa kple dedienɔnɔ si wogblɔ be yewoahe vɛ la ŋu eye nàsusu be xexe sia ava ɖe eƒe kuxiwo ɖa o. (Psalmo 146:3) Nusi koŋ ɣlidodo ma afia enye be xexe sia ƒe nuwuwu ɖo vɔ.
Gbeƒãɖeɖe Nyanyuia
19, 20. Gbeƒãɖeɖe le ŋkeke mamlɛawo me ŋuti nyagblɔɖi kae míekpɔ wòle eme vam?
19 Nyagblɔɖi bubu si ɖee fia be míele ŋkeke mamlɛawo me tso ƒe 1914 me enye esi Yesu gblɔ be: “Ele be, woaɖe gbeƒã nyanyui la afia dukɔwo katã gbãgbiagbã.” (Marko 13:10) Alo abe alesi Mateo 24:14 ɖe emee ene la: “Woaɖe gbeƒã fiaɖuƒeŋutinya nyui sia afia amewo le xexe blibo la katã me, bena wòanye ɖaseɖiɖi na dukɔwo katã, eye ekema nuwuwu aɖo.”
20 Egbea la, wole gbeƒã ɖem xexe sia ƒe nuwuwu kple Paradiso ƒe xexeme yeye si gbɔna si le Mawu ƒe Fiaɖuƒea te ƒe nyanyuia le anyigba bliboa katã dzi wu ɣeyiɣi bubu ɖesiaɖe le ŋutinya me. Amekawoe le eɖem? Yehowa Ðasefo miliɔn geɖewoe. Wole gbeƒã ɖem le dukɔ sia dukɔ me le anyigba dzi.
21, 22. Nuka koŋ ye de dzesi Yehowa Ðasefowo be wonye Kristotɔ vavãwo?
21 Hekpe ɖe Yehowa Ðasefowo ƒe gbeƒãɖeɖe Mawu ƒe Fiaɖuƒea ŋuti la, wole agbe nɔm ɖe mɔ si dea dzesi wo be wonye Kristo yomedzela vavãwo la nu, elabena egblɔ be: “Esia me amewo katã woanyae le bena, nye nusrɔ̃lawo mienye, ne lɔlɔ̃ le mia dome.” Eyata lɔlɔ̃ ƒe nublaka si melãna o la bla Yehowa Ðasefowo ɖekae le xexeame katã ƒe nɔviwo ƒe habɔbɔ la me.—Yohanes 13:35; kpɔ Yesaya 2:2-4; Kolosetɔwo 3:14; Yohanes 15:12-14; Yohanes I, 3:10-12; 4:20, 21; Nyaɖeɖefia 7:9, 10 hã.
22 Yehowa Ðasefowo xɔ nusi Biblia gblɔ la dzi se: “Mawu mekpɔa ame ŋku me o, hafi boŋ le dukɔ sia dukɔ me, amesi ke vɔ̃nɛ, eye wòwɔa nu dzɔdzɔe la, eya dzea eŋu.” (Dɔwɔwɔwo 10:34, 35) Wobua wo hati Ðasefo siwo le dukɔwo katã me la be wonye yewoƒe gbɔgbɔ me nɔviŋutsuwo kple nɔvinyɔnuwo eɖanye ameƒomevi kae wonye alo ŋutigbalẽ ƒe amadede kae le wo ŋu o. (Mateo 23:8) Eye nyateƒe si wònye be xexeame godoo ƒe nɔvisiléle ma le xexeame egbea la gaɖo kpe edzi be Mawu ƒe tameɖoɖo ava eme kpuie.
[Nɔnɔmetata si le axa 26]
Mawu ƒe Dziƒofiaɖuƒe deblibo la ɖeɖekoe aɖu ameƒomea dzi le xexe yeyea me