Fiaɖuƒe Gbeƒãɖelawo Ka Nya Ta

Greenland Saɖagakɔƒewo Me Yiyi

YEHOWA ÐASEFOWO zã Gbetakpɔxɔ kple Nyɔ! magazinewo tsɔ ɖe gbeƒã nyanyuia ƒe geɖe. Magazine siawo doa Yehowa ƒe nunya si ŋu woƒo nu tsoe le eƒe Nya, Biblia, me la ɖe dzi. Woléa ŋku ɖe xexemenudzɔdzɔ siwo do ƒome kple Biblia me nyagblɔɖiwo ŋu, eye wozãa Biblia me aɖaŋuɖoɖo siwo me nunya le la le kuxi siwo li fifia gbɔ kpɔkpɔ me.—Yakobo 3:17.

Le ƒe 1994 me la, Ðasefo siwo le Greenland dze agbagba etɔxɛe be yewoana Gbetakpɔxɔ kple Nyɔ! ame geɖe alesi yewoate ŋui. Le dzomeŋɔli me la, wowɔ ɖoɖo be yewoayi kɔƒenuto siwo gbɔ didi wu le Greenland la me. Fiaɖuƒe gbeƒãɖelawo ƒe ƒuƒoƒo aɖe ɖo tɔdziʋu zɔ mɔ kilometa 4,000 yi Qaanaaq (Thule) le ɣetoɖoƒeƒuta gome heyi nuto siwo le anyigba ƒe dzigbe ɖaa la me. Kwasiɖa adre ye woƒe mɔzɔzɔa xɔ. Ðasefo aɖe kple srɔ̃a yi kɔƒe si le Ittoqqortoormiit le ɣedzeƒeƒuta eye wotsɔ nyanyui la kpee ɖo le ɖoɖo nu zi gbãtɔ.

Do ŋgɔ le ƒe ma me le April ƒe ɣletia me la, wona Gbetakpɔxɔ kple Nyɔ! 7,513 Greenlandtɔwo. Ema fia be le mamã dedie nu la, Fiaɖuƒe gbeƒãɖela 127-awo dometɔ ɖesiaɖe na magazine 59—magazine 1 na dukɔa me tɔ 7 ɖesiaɖe. Le ɣleti ma me la, wota nyati siwo ƒe tanyae nye “No me Dɔdzẽ—Nyɔnu Ðesiaɖe Vɔ̃nɛ” la ɖe Nyɔ! me. Ðasefo aɖe si na magazine 140 la gblẽ Nyɔ! ma ƒe ɖewo ɖe television dzi nyadzɔdzɔgblɔla aɖe gbɔ. Ŋkeke ʋee aɖewo megbe la, woƒo nu tso no me dɔdzẽ ƒe nyatiawo ŋu le television dzi. Nyadzɔdzɔgblɔla la ɖe magazinea ƒe foto fia, eye eɖe axa geɖe fia hekafu alesi woɖe egɔme nyuie ɖe Greenlandgbe me ta. Eƒo nu tso lãmesẽtakpɔkpɔ ŋuti aɖaŋuɖoɖo nyui siwo le Nyɔ! me hã ŋu.

Wobia gbe Ðasefo si tsɔ magazineawo na nyadzɔdzɔgblɔla la le television dzi wɔna ma ke me. Nyɔnua ɖo biabia geɖe ŋu ku ɖe Yehowa Ðasefowo ŋu eye wòƒo nu tso magazine siwo wona ame geɖe le ɣleti ma me ŋu. Eƒo nu tso nunya vavãtɔ si le Biblia me ŋu eye wòɖee fia be aɖaŋuɖoɖo nyui siawo ate ŋu akpe ɖe mía ŋu míanɔ te ɖe kuxiwo nu egbea.

Wobia gbe Greenland Dɔdzẽ Habɔbɔa ƒe amegã tsɔ ƒo wɔna la tae. Egblɔ be yemekpɔ nya sia ŋuti nyatakaka nyui sia tɔgbe le yewo degbe me kpɔ o. Eye ekpe amesiwo katã tsɔ ɖe le no me dɔdzẽ ƒe nya la me be woaxlẽ Nyɔ! la me nyatiawo. Egblɔ be ele be woakafu Yehowa Ðasefowo ɖe alesi woxɔa ŋgɔ wɔa nui ta.

Yehowa Ðasefo siwo le xexeame katã yi edzi le gbeƒã ɖem nyanyuia “na nuwɔwɔwo katã le dziƒo te” abe alesi wole ewɔm le Greenland ene. (Kolosetɔwo 1:23; Dɔwɔwɔwo 1:8) Wozãa Biblia-srɔ̃gbalẽ siwo me Gbetakpɔxɔ kple Nyɔ! le tsɔ kpena ɖe ameƒomeviwo katã ŋu be woakpe akɔ kple egbegbe kuxiwo eye wonaa etsɔme si nyo wu ƒe mɔkpɔkpɔ hã wo.

[Anyigbatata si le axa 8]

(Edze nyuie le agbalẽa ŋutɔ me)

Qaanaaq (Thule)

Ittoqqortoormiit

Nuuk (Godthåb)