Nyabiabia Siwo Tso Exlẽlawo Gbɔ
Mateo 17:20 gblɔ be apostoloawo mete ŋu da gbe le ŋutsuvi aɖe si dɔléle nɔ fu wɔm la ŋu o ‘le woƒe xɔse ʋee ŋuti.’ Gake wogblɔ le Marko 9:29 be esi gbedodoɖa hiã wo tae wodo kpo nu ɖo. Nukata susuawo to vovo le Nyanyuigbalẽ vovovoawo me?
Le nyateƒe me la, menye ɖe nuŋlɔɖi evea tsi tre ɖe wo nɔewo ŋu o, ke boŋ ɖe wode nu wo nɔewo me. Gbã la, xlẽ Mateo 17:14-20. Ŋutsu aɖe va gblɔ be yeviŋutsu nye kpeŋuikula eye be Yesu ƒe nusrɔ̃lawo mete ŋu da gbe le ɖevia ŋu o. Emegbe esi Yesu nyã gbɔgbɔ vɔ̃ si nɔ fu wɔm ɖevia le eme vɔ la, eda gbe nɛ. Nusrɔ̃lawo bia nusita woawo mete ŋu nyã gbɔgbɔ vɔ̃a o. Le Mateo ƒe nuŋlɔɖia me la, Yesu ɖo eŋu be: “Le miaƒe xɔse ʋee ŋutie; elabena vavã mele egblɔm na mi bena: Ne xɔse le mia si abe logoku ene la, miagblɔ na to sia bena: Te ɖa tso afisia nayi afime, eye ate ayi, eye naneke mele miaƒe ŋutete wu ge o.”—Míawoe te gbe ɖe edzi.
Azɔ ʋu Marko 9:14-29, afisi míagakpɔ nya geɖe le. Le kpɔɖeŋu me, Marko 9:17 tsɔ numeɖeɖe bubu kpee be le go sia me la, gbɔgbɔ vɔ̃ aɖee na wònɔ kpeŋui kum. Enyo be míade dzesii be Biblia gblɔ le teƒe bubu be Yesu da gbe le kpeŋuikulawo kple amesiwo me gbɔgbɔ vɔ̃wo nɔ ŋu. (Mateo 4:24) Le go tɔxɛ sia me la, atikewɔla Luka ɖi ɖase le eŋu be “gbɔgbɔ si nye mumui kple tokunɔ,” si nye gbɔgbɔ vɔ̃ aɖee na wòkua kpeŋui. (Luka 9:39; Kolosetɔwo 4:14) Àkpɔ be wogblɔ nyagbe aɖe le Marko 9:18 be, “Afisi ke [gbɔgbɔ vɔ̃a lée] le la.” Eyata gbɔgbɔ vɔ̃a menɔa ɖevia nyamam atraɖii o, ke ɣeaɖewoɣi koe. Ke hã, nusrɔ̃laawo mete ŋu nyã gbɔgbɔ vɔ̃a o eyata wodo kpo gbedada na ŋutsuvia. Esi wobia nusi gbɔ wòtso la, Yesu ɖo eŋu be: “Esia ƒomevi la mate ŋu ado go to naneke me o, negbe to gbedodoɖa . . . me ko.”
Gake ne míexlẽ Marko ƒe nuŋlɔɖia nyuie la, míakpɔe be metsi tre ɖe nusi Mateo ŋlɔ ŋu o. Míexlẽ le Mark 9:19 be Yesu fa konyi ɖe dzidzime ma ƒe xɔsemanɔsi ta. Eye ele kpukpui 23 be egblɔ na ŋutsuvia fofo be: “Amesi xɔe se la, ate ŋu awɔ nusianu.” Eyata Marko hã te gbe ɖe xɔse ƒe vevienyenye dzi. Nya la koe nye be Marko gatsɔ numeɖeɖe bubu kpee le kpukpui 29. Marko tsɔ nusi Yesu gblɔ le gbedodoɖa ŋu kpee, evɔ Mateo kple Luka ya metsɔe kpee o.
Ke nukae míagblɔ azɔ? Le ɣeyiɣi bubuwo me la, apostolo 12 la kple nusrɔ̃la 70 la nyã gbɔgbɔ vɔ̃wo. (Marko 3:15; 6:13; Luka 10:17) Gake nusrɔ̃laawo mete ŋu nyã gbɔgbɔ vɔ̃a le go sia me ya o. Nukatae? Ne míetsɔ nya siwo le nuŋlɔɖi vovovoawo me ƒo ƒu la, míakpɔe be womenɔ dzadzraɖoɖi na esia wɔwɔ o. Ðewohĩ gbɔgbɔ vɔ̃ si ƒomevi wodo goe hã tae, elabena edze abe gbɔgbɔ vɔ̃wo ƒe amenyenye, nudidiwo, kple ŋutetewo gɔ̃ hã to vovo ene. Le esia gome la, xɔse si sẽ ŋutɔ kpakple gbedodoɖa vevie hena Mawu ƒe kpekpeɖeŋu hiã. Nyateƒe wònye be xɔse ma le Yesu si. Gbedodoɖasela, si nye Fofoa, hã nɔ megbe nɛ. (Psalmo 65:3) Menye ɖeko Yesu ate ŋu anyã gbɔgbɔ vɔ̃ ahada gbe le ŋutsuvi si nɔ fu kpem ŋu ko o ke ewɔe hã.