Nu vevi etɔ̃lia
Nye Ame Si Kpɔa Ŋudzedze Ðe Nu Ŋu
NYA KAE BIBLIA GBLƆ? “Mida akpe le nu sia nu ŋuti.”—1 Tesalonikatɔwo 5:18.
NU KAE NYE MƆXENUA? Dadalawo kple ame madakpewo domee míele, eye woƒe nɔnɔme siawo ate ŋu akpɔ ŋusẽ ɖe mía dzi bɔbɔe. (2 Timoteo 3:1, 2) Tsɔ kpe ɖe eŋu la, nɔnɔmewo ate ŋu aƒoe ɖe mía nu be míava tsɔ nu geɖe fũu akpa ado agba na mía ɖokui tsɔ kpe ɖe nu siwo le fu ɖem na mí xoxo la ŋu. Kuxiwo ate ŋu aɖe kpe na mí, alo míawo ŋutɔwo míaƒe dzodzrowo yome titi ate ŋu awɔe be ɣeyiɣi mava nɔ mía si míade ŋugble ahakpɔ ŋudzedze ɖe nu siwo le mía si ŋu alo aɖee afia be míekpɔ ŋudzedze ɖe nu siwo ame bubuwo wɔ na mí la ŋu o.
NU KAE NÀTE ŊU AWƆ? Di ɣeyiɣi nàde ŋugble le nu siwo na nèle dzidzɔ kpɔm fifia la ŋu. Ele eme be kuxiwo ate ŋu ana be nàde vovo ge do kpoe ya. Gake de ŋugble le Fia David ƒe kpɔɖeŋua ŋu kpɔ. Ese le eɖokui me ɣeaɖewoɣi be woxlã ye ɖe anyi, eye nu te yeƒe dzi ŋu. Ke hã, edo gbe ɖa na Mawu be: “Meɖo ŋu blemaŋkekewo, mede ŋugble le wò nuwɔwɔwo katã ŋu, eye mesusu wò asinudɔwɔwɔwo ŋu.” (Psalmo 143:3-5) Le David ƒe dodokpɔwo katã me la, eyi edzi nye ame si kpɔa ŋudzedze ɖe nu ŋu, eye eƒe dzi dze eme.
Bu nu siwo amewo wɔ na wò la ŋu, eye nàda akpe na wo ɖe woƒe agbagbadzedzewo ta. Yesu ɖo kpɔɖeŋu nyui aɖe ɖi na mí le esia me. Le kpɔɖeŋu me, esi exɔlɔ̃ Maria tsɔ ami xɔasi aɖe va kɔ ɖe eƒe ta me kple eƒe afɔ la, ame aɖewo gblɔ be: “Nu ka tae wogblẽ ami ʋeʋĩ sia dome alea?”a Woƒe susu ye nye be ɖe wòle be woadzra ami ma atsɔ ga la ana hiãtɔwo. Ke Yesu ɖo eŋu be: “Miɖe asi le eŋu. Nu ka tae miebe yewoaɖe fu nɛ?” Eye wògagblɔ kpee be: “Ewɔ nu si wòate ŋui.” (Marko 14:3-8; Yohanes 12:3) Yesu mena eƒe susu nɔ nu si Maria mewɔ ŋu o, ke boŋ ekpɔ ŋudzedze ɖe nu si wòwɔ la ŋu.
Ame aɖewo mekpɔa ŋudzedze ɖe woƒe ƒometɔwo, xɔlɔ̃wo, kple yayra bubuwo ŋu o, va se ɖe esime womegava li o ko hafi. Àte ŋu aƒo asa na nɔnɔme sia ne èdea ŋugble le nu nyui siwo le asiwò fifia la ŋu! Ðe manyo ŋutɔ be nàde ŋugble le nu siwo ŋu nèkpɔa ŋudzedze ɖo la ŋu alo aŋlɔ wo ɖi gɔ̃ hã oa?
Esi “Nunana nyui ɖe sia ɖe” tso Mawu gbɔ ta la, anyo ŋutɔ be míanɔ akpe dam nɛ le gbedodoɖa me. (Yakobo 1:17) Ne míewɔnɛ alea la, ana be míanye akpedalawo kple ame siwo kpɔa ŋudzedze ɖe nu ŋu.—Filipitɔwo 4:6, 7.
[Etenuŋɔŋlɔ]
a Le ƒe alafa gbãtɔ me la, ne wokɔ ami ɖe ame ƒe ta me la, enye amedzrowɔwɔ nɛ; ke ne wokɔe ɖe afɔ nɛ la, enye ame ɖokui bɔbɔ nɛ.
[Nɔnɔmetata ŋu nya si le axa 6]
Ðe nèkpɔa ŋudzedze ɖe nu siwo amewo wɔna na wò la ŋua?