Nu vevi evelia
Dze Agbagba Be Nàgatsɔ Ðokuiwò Anɔ Sɔsɔm Kple Ame Bubuwo O
NYA KAE BIBLIA GBLƆ? “Ame sia ame nado nu si ye ŋutɔ ƒe dɔwɔwɔ nye la kpɔ, ekema akpɔ susu si ta wòatso aseye le eya ŋutɔ ɖokui ɖeɖe ŋu, ke menye le eɖokui tsɔtsɔ asɔ kple ame bubu me o.”—Galatiatɔwo 6:4.
NU KAE NYE MƆXENUA? Ate ŋu adzɔ be míadi be míatsɔ mía ɖokuiwo anɔ sɔsɔm kple amewo. Ɣeaɖewoɣi la, míetsɔa mía ɖokui sɔna kple ame siwo si nu mele abe míawo ene o, gake zi geɖe la, míetsɔa mía ɖokui sɔna kple ame siwo ŋu ŋusẽ le wu, ame siwo si ga le wu alo ame siwo si dzɔdzɔmeŋutete aɖewo le wu mí. Le go evea siaa me la, emetsonua menyona o. Míebunɛ vodadatɔe be nu si le ame si alo nu si wòte ŋu wɔna lae ɖenɛ fiana be asixɔxɔ le eŋu. Ate ŋu ana hã be míava nɔ ŋu ʋãm alo anɔ ho ʋlim kple amewo.—Nyagblɔla 4:4.
NU KA NÀTE ŊU AWƆ? Dze agbagba nàbu ɖokuiwò abe ale si Mawu bua wòe ene. Na eƒe susu le nuwo ŋu nakpɔ ŋusẽ ɖe ale si nèbua ame si nènye la dzi. “Menye ale si amegbetɔ kpɔa nui o; elabena amegbetɔ kpɔa ŋku nu, ke Yehowaa kpɔa keke dzi me ke.” (1 Samuel 16:7, 8a) Yehowa metsɔa wò sɔna kple ame bubuwo bene yeanya asixɔxɔ si le ŋuwò o, ke boŋ wò dzi mee wòkpɔna, edzroa wò tamesusuwo, seselelãmewo kple dzimedidiwo me. (Hebritɔwo 4:12, 13) Yehowa nya be seɖoƒe li na wò ŋutete, eye edi be wò ŋutɔ hã nanyae nenema. Ne ètsɔa ɖokuiwò sɔna kple ame bubuwo be nàtsɔ adzidze asixɔxɔ si le ŋuwò la, ɖeko nàva nɔ ɖokuiwò dom ɖe dzi loo alo anye ame si mekpɔa ŋudzedze ɖe ame si nènye la ŋu o. Eya ta bɔbɔ ɖokuiwò nàlɔ̃ ɖe edzi be màte ŋu akpɔ dzidzedze le nu sia nu me abe ale si dze ene o.—Lododowo 11:2.
Nu ka koŋue wòle be nàwɔ be asixɔxɔ nanɔ ŋuwò le Mawu ŋkume? Eƒe gbɔgbɔ ʋã nyagblɔɖila Mixa wòŋlɔ bena: “Amegbetɔ, egblɔ nu si nyo la na wò; nu si ko dim Yehowa le tso asiwò la, enye be, nawɔ nu si le eteƒe, nalɔ̃ dɔmenyowɔwɔ, eye nabɔbɔ ɖokuiwò ɖe anyi ahazɔ le wò Mawu ŋku me.” (Mixa 6:8) Ne èwɔ ɖe aɖaŋuɖoɖo ma dzi la, Mawu alé be na wò. (1 Petro 5:6, 7) Ðe susu bubu aɖe gali nyo wu esia si ta míakpɔ ŋudzedze ɖe nu ŋua?
[Etenuŋɔŋlɔ]
a Esiae nye Mawu ƒe ŋkɔ abe ale si wòdze le Biblia me ene.
[Nɔnɔmetata ŋu nya si le axa 5]
Nu si le míaƒe dzi mee Yehowa tsɔ dzidzea asixɔxɔ si le mía ŋu