Gbɔgbɔmenutowo—Ame Kawoe Le Afi Ma?
Le Europa la, nyɔnu tsitsi aɖe lé rosario ɖe asi ge ɖe gbedoxɔ me hedze klo bubutɔe ɖe Maria ƒe kpetata ŋkume. Le Afrika la, ƒome aɖe yi ɖaƒo aha ɖi le woƒe ƒometɔ aɖe si ŋu wodea bubui la ƒe yɔdo dzi. Le nuto si woyɔna be Americas me la, ɖekakpui aɖe tsi nu dɔ heyi ŋugble me ʋĩi kple susu be yeate ŋu aƒo nu kple mawudɔla si wòsusu be eyae kpɔa ye ta la. Le Asia la, nunɔla aɖe le dzo tɔm nu siwo le abe pepa kakɛwo ene siwo le amadede vovovowo me la na tɔgbui kukuwo.
NU KAE ɖe dzesi le ame siawo katã ŋu? Wo katã woxɔe se be ame aɖewo le gbɔgbɔmenutowo me siwo yewoate ŋu ado ka kple, eye woxɔe se be ŋutete le wo si be woakpɔ ŋusẽ gã aɖe ɖe amegbetɔwo ƒe agbe dzi. Le nyateƒe me la, mewɔ nuku be dzixɔse sia le amewo si o, eye menye nu yeyee hã o. Nu si wɔ nukue nye ale si susu vovovo siwo tsi tsitre ɖe wo nɔewo ŋu la le amewo si ku ɖe ame siwo le gbɔgbɔmenutowo me la ŋu.
Moslemtɔwo subɔa Mawu ɖeka, si nye Allah.a Ame siwo gblɔna be Kristotɔwoe yewonye la dometɔ geɖe gblɔna be Mawuɖekaetɔ̃e Mawu nye, si fia be Mawu Fofo la, Mawu Vi la, kple Mawu Gbɔgbɔ Kɔkɔe la ƒo ƒu wɔ Mawu ɖeka. Hindutɔwo xɔe se be mawu kple mawunɔ siwo wu akpe ɖeka ye li. Ame bubuwo hã xɔe se be gbɔgbɔwo nɔa lã, ati, agakpe, kple tɔsisi aɖewo me. Tsɔ kpe ɖe eŋu la, woƒoa nu tso mawudɔlawo kple gbɔgbɔ vɔ̃wo, ŋɔliwo kple gbetsi vɔ̃wo, mawuwo kple mawunɔwo ŋu le agbalẽ, video, kple television dzi wɔna gbogbo aɖewo me, eye nu siawo kpɔa ŋusẽ ɖe ame bubuwo hã dzi.
Ale si ko susu vovovo siwo tsi tsitre ɖe wo nɔewo ŋu le amewo si ku ɖe mawuwo ŋu la, nenema kee susu vovovo siwo tsi tsitre ɖe wo nɔewo ŋu ye le amewo si ku ɖe ale si woawɔ ate ɖe mawu siawo ŋui la ŋu. Nuwo ŋu bubu nyuie ana míakpɔe be mɔ vovovoawo dometɔ ɖe sia ɖe mate ŋu anye nyuitɔ o. Bu kpɔɖeŋu sia ŋu kpɔ: Hafi míaƒo ka na ame aɖe la, ele be míanya ame si míele kaa ƒom na, eye míaka ɖe edzi be amea li ŋutɔŋutɔ, eye be alɔ̃ aɖo to mí. Ne míele agbagba dzem be míaƒo nu kple ame aɖe si míesusu be eli evɔ meli hafi o la, dzodzroe. Nu si me afɔku anɔ wu ye nye be míado ka kple ame bubu si wɔ eɖokui abe ame si míedi be míado ka kplii la ene.
Eya ta nya si míabiae nye be ame kawo tututue le gbɔgbɔmenutowo me? Menye ɖeko Biblia ɖo nya sia ŋu na mí o, ke eƒo nu tso ame si wòle be míaƒo nu kplii kple ale si míakpɔ mɔ be wòaɖo eŋu na mí la hã ŋu. Ne èyi nuxexlẽa dzi la, ɖewohĩ ale si Biblia ɖe nya sia mee la awɔ nuku na wò.
[Etenuŋɔŋlɔ]
a Menye ŋkɔe “Allah” nye o, egɔme koe nye “Mawu.”