Ðe Mawu Ƒe Nya La Xexlẽ Vivia Nuwò Vavã?

LORRAINE gblɔ be: “Esime medze Biblia xexlẽ gɔme la, ɖeko wònɔ nam abe dɔ sesẽ aɖe ene, mevivia nunye o. Egɔmesese sesẽna nam, eya ta ɖeko nye susu nɔa tsatsam.”

Ame bubu aɖewo hã gblɔ be, esi yewodze Biblia xexlẽ gɔme la, mevivia yewo nu o. Ke hã woyi edzi xlẽnɛ le esi wonyae be nu nyui aɖee wònye be ame naxlẽ Ŋɔŋlɔ Kɔkɔeawo ta. Marc gblɔ be: “Enɔa bɔbɔe be ame naɖe mɔ kplamatsedonuwo naxɔ ɣeyiɣi si wòtsɔ xlẽa Biblia alo tsɔ srɔ̃a nui la le esi. Medo gbe ɖa tso eŋu zi geɖe heku kutri vevie hafi Biblia xexlẽ gbe sia gbe va zu numame nam.”

Nu kae nàte ŋu awɔ be nàde asixɔxɔ Mawu ƒe Nya, Biblia, ŋu geɖe wu? Nu kae nàwɔ be exexlẽ navivi nuwò? Bu aɖaŋuɖoɖo siwo gbɔna la ŋu kpɔ.

Taɖodzinuwo Kple Mɔnu Vovovowo

Ne èle Biblia xlẽ ge la, do gbe ɖa, eye nàna wò susu nanɔ nuxexlẽa ŋu. Ƒo koko na Yehowa be wòakpe ɖe ŋuwò be nàse vivi na eƒe Nya si srɔ̃ ge nàla la. Ðe kuku nɛ be wòaʋu wò susu kple dzi be nàse eƒe nunya gɔme geɖe wu. (Ps. 119:34) Ne mèwɔe alea o la, ele bɔbɔe ŋutɔ be nàva bu Biblia sɔsrɔ̃ abe nane si wobia tso asiwò la wɔwɔ dzro ko ene, eye didia maganɔ mewò be yeayi esɔsrɔ̃ dzi o. Lynn gblɔ be: “Ɣeaɖewoɣi la, mexlẽa nu kabakaba akpa, eye esia nana be nyemetea ŋu dea dzesi nu dodzidzɔname siwo le nu si xlẽm mele la me o. Zi geɖe la, nyemesea nyati veviawo gɔme nyuie o. Eya ta medoa gbe ɖa biaa ɖokuidziɖuɖu, eye esia kpena ɖe ŋunye nye susu meganɔa tsatsam o.”

De asixɔxɔ nu si srɔ̃m nèle la ŋu. Ðo ŋku edzi be Biblia me nyateƒea gɔme sese kple edziwɔwɔe ana nàkpɔ agbe mavɔ. Eya ta dze agbagba vevie nàde dzesi aɖaŋuɖoɖo siwo akpe ɖe ŋuwò la le wò nusɔsrɔ̃a me eye nàwɔ wo dzi. Chris gblɔ be: “Media nya siwo akpe ɖe ŋunye be makpɔ nɔnɔme kple nukpɔsusu siwo le asinye, siwo mesɔ o, la adze sii. Edoa dzidzɔ nam be mekpɔa nya siwo akpe ɖe ŋunye la le Biblia kpakple míaƒe agbalẽ geɖewo me, togbɔ be ame siwo ŋlɔ agbalẽ siawo mekpɔm kpɔ o gɔ̃ hã.”

Ðo taɖodzinu siwo gbɔ nàte ŋu aɖo la na ɖokuiwò. Dze agbagba be nàsrɔ̃ nu yeye aɖe tso ame siwo ŋu woƒo nu tso le Biblia me ŋu. Ne èwɔ numekuku le Insight on the Scriptures (Étude perspicace des Écritures) alo Watch Tower Publications Index (Index des publications Watch Tower) me la, àkpɔ ame siawo ŋu nya dodzidzɔname geɖewo. Ne èva kpɔe be ŋutsu kple nyɔnu siwo ŋu woƒo nu tso le Biblia me la nye ame ŋutɔŋutɔ siwo si nɔnɔme nyuiwo le eye nu vea wo abe míawo ke ene la, nu si nèsrɔ̃ tso wo ŋu awɔ dɔ ɖe dziwò geɖe wu.

Di mɔ bubu siwo dzi nàto ade ŋugble kple amewo tso Ŋɔŋlɔawo ŋu. (Dɔw. 17:2, 3) Esia nɔa susu me na Sophia ne ele nu srɔ̃m. Egblɔ be: “Nye didie nye be, masrɔ̃ mɔ bubu siwo dzi mato ade ŋugble kple amewo le gbeadzi kpakple teƒe bubuwo, ale be mate ŋu aɖe Biblia me nyateƒea me nyuie. Gbetakpɔxɔ nye dɔwɔnu nyui aɖe si mate ŋu atsɔ awɔ esiae.”—2 Tim. 2:15.

Kpɔ Biblia me nudzɔdzɔwo le susu me. Hebritɔwo 4:12 gblɔ be: “Mawu ƒe nya la le agbe.” Ne èle Ŋɔŋlɔawo xlẽm la, kpɔ nu siwo kpɔm ame siwo ŋu Biblia ƒo nu tsoe le la le susu me, ale be Mawu ƒe gbedeasia nanɔ agbe le wò susu me. Dze agbagba nàse nya siwo sem wonɔ, eye nàse le ɖokuiwò me abe ale si wonɔ sesem le wo ɖokui me ene. Tsɔ nu si me woto la sɔ kple nane koŋ si me tom wò ŋutɔ nèle. Srɔ̃ nu tso ale si wokpɔ nyawo gbɔe la me. Esiawo wɔwɔ akpe ɖe ŋuwò nàse Biblia me nyawo gɔme nyuie eye woatsi susu me na wò.

Zã ɣeyiɣi geɖe ɖe mawunyakpukpui siwo gɔme sese sesẽ kple wo ŋu numeɖeɖewo ŋu, ale be nàte ŋu ase wo gɔme nyuie. Ðo ɣeyiɣi sɔgbɔ ɖi na nusrɔ̃ɣi ɖe sia ɖe. Ate ŋu adzɔ be nàva ke ɖe nyabiase dodzidzɔname aɖewo ŋu, siwo abia be nàwɔ numekuku ayi ŋgɔe. Di nya siwo mèkpɔ kpɔ o la ƒe gɔmesese, de ŋugble tso etenuŋɔŋlɔwo ŋu, eye nàxlẽ mawunyakpukpui siwo wofia asii, siwo woŋlɔ ɖe titinanuŋɔŋlɔawo me le Biblia me. Zi ale si nèle nu siwo xlẽm nèle la gɔme sem hele wo dzi wɔm la, zi nenemae Mawu ƒe Nya si woŋlɔ ɖi la xexlẽ anɔ nuwò vivim. Ne èwɔe alea la, àte ŋu agblɔe abe hakpalaa ene be: “Wò [Yehowa ƒe] ɖaseɖiɖiwo nye nye domenyinu tegbee, elabena woawoe nye nye dzi ƒe dzidzɔ.”—Ps. 119:111.

Ƒo asa na nuxexlẽ dzitsitsitɔe. Ðo ɣeyiɣi agbɔsɔsɔme si sɔ ɖi na wò ɖokuisinusɔsrɔ̃. Gake da sɔ, eye nàkpɔ egbɔ be yeɖo ɣeyiɣi ɖi na hame ƒe kpekpeawo hã dzadzraɖo. Raquel gblɔ be: “Zi geɖe la, nyemeɖea dzi ɖi o, eye esia wɔnɛ be nye susu menɔa nusɔsrɔ̃a ŋu o. Eya ta mekpɔe be, ne mesrɔ̃ nu ɣeyiɣi kpui aɖe le ɣeyiɣi vovovowo me la, edea dzinye.” Chris gblɔ be: “Ne mesrɔ̃ nu dzradzradzra la, nye dzitsinya ɖea fu nam, elabena nusɔsrɔ̃a ƒe akpa sue aɖe koe tsia susu me nam. Eye zi geɖe la, nu si mesrɔ̃ la metsia dzi me nam o.” Eya ta gbɔ dzi ɖi ne èle nu srɔ̃m.

Na Mawu ƒe nya nadzro wò vevie. Apostolo Petro gblɔ be: “Abe vidzĩwo ene la, mina nya la ƒe notsi si wometsɔ naneke tsakae o la nadzro mi vevie, bene miato edzi atsi hena xɔxɔ.” (1 Pet. 2:2) Mehiãna be vidzĩwo nadze agbagba hafi notsi nadzro wo o. Edzroa wo le dzɔdzɔme nu. Ke hã Ŋɔŋlɔawo gblɔ be ehiã be míawo ya míana Mawu ƒe nya nadzro mí. Ne èxlẽa Biblia ƒe axa ɖeka ko gɔ̃ hã gbe sia gbe la, eteƒe madidi hafi dzodzro ma naɖo mewò o. Eye eteƒe madidi hafi nu si dze le gɔmedzedzea me abe nu sesẽ ene la, nava nɔ nuwò vivim o.

De ŋugble le Ŋɔŋlɔawo me nyawo ŋu. Ne èdea ŋugble le nu siwo nèxlẽna ŋu la, aɖe vi geɖe na wò. Ana nàkpɔ ale si gbɔgbɔmenu siwo ŋu nèwɔ numekuku le do ƒome kple wo nɔewo la adze sii. Eteƒe madidi o, mawumenunya si le abe dzonu xɔasi aɖe ene—si nye kesinɔnu si doa dzidzɔ na ame—la asu asiwò.—Ps. 19:15; Lod. 3:3.

Ɣeyiɣi Ŋu Dɔ Wɔwɔ Nyuie

Ebiaa agbagbadzedze hafi nàte ŋu ayi edzi asrɔ̃ nu edziedzi, ke hã esia wɔwɔ ahe yayra manyagblɔwo avae na wò. Ana nàse Ŋɔŋlɔawo gɔme nyuie wu. (Heb. 5:12-14) Nunya kple gɔmesese deto si nàkpɔ tso Ŋɔŋlɔ siwo tso gbɔgbɔ me me la ana nàkpɔ dzidzɔ, àse vivi le agbe me, eye ŋutifafa asu asiwò. Nunya si wokpɔna tso Mawu ƒe Nya si tso gbɔgbɔ me me la nye “agbeti” na ame siwo ƒe asi su edzi eye wowɔa eme nyawo dzi la.—Lod. 3:13-18.

Mawu ƒe Nya la sɔsrɔ̃ tsitotsito ana dzi senugɔme nasu asiwò. (Lod. 15:14) Akpe ɖe ŋuwò be nàte ŋu aɖo aɖaŋu dedzigbɔname siwo wotu ɖe Biblia dzi la na amewo. Ne èwɔa nyametsotso wòwɔa ɖeka kple Ŋɔŋlɔawo kpakple “kluvi nyateƒetɔ kple aɖaŋudzela” ƒe agbalẽwo me nyawo la, àkpɔ ale si Yehowa ƒe Nya, si tso gbɔgbɔ me la, naa dzidzeme ame hedoa ŋusẽ ame la dze sii. (Mat. 24:45) Ana nàgblɔ nya siwo dea dzi ƒo na ame kple esiwo naa mɔkpɔkpɔ ame, eye ànye ame si Yehowa ƒe Nya la fiaa mɔe le nu sia nu me. Tsɔ kpe ɖe eŋu la, nu sia nu si ku ɖe mia kple Mawu dome ƒomedodoa ŋu la akpɔ dzidzedze.—Ps. 1:2, 3.

Wò dzi, si lɔlɔ̃ na Mawu yɔ fũu la, aʋã wò nàƒo nu tso wò dzixɔsewo ŋu na amewo. Esia hã ate ŋu ana nàkpɔ dzidzɔ ale gbegbe. Sophia le agbagba dzem be yeate ŋu anɔ ŋku ɖom mawunyakpukpui vovovowo dzi ahanɔ wo zãm, ale be yeƒe nyawo nawɔ dɔ ɖe aƒemenɔlawo dzi, eye wòana yeƒe Kristotɔwo ƒe subɔsubɔdɔa nakpɔ dzidzedze, eye yease vivi nɛ. Egblɔ be: “Dzidzɔ gã aɖee wònyena nam ne mekpɔ ale si amewo wɔa nui ne mexlẽ Biblia me nyawo na wo.”

Ke hã viɖe gãtɔ si dona tso eme na ame ne Mawu ƒe Nyaa xexlẽ vivia enu ye nye ale si ƒomedodo kplikplikpli va nɔa eya kple Yehowa dome. Biblia sɔsrɔ̃ ana nànya Yehowa ƒe dzidzenuwo, eye wòana nàde asixɔxɔ eƒe lɔlɔ̃, dɔmenyo, kple dzɔdzɔenyenye ŋu geɖe wu. Nu bubu aɖeke meli si me viɖe le wu Biblia sɔsrɔ̃ o. Do vevie Mawu ƒe Nya la sɔsrɔ̃. Esia wɔwɔ nye ɣeyiɣi ŋu dɔ wɔwɔ nyuie.—Ps. 19:8-12.

[Aɖaka/Nɔnɔmetatawo si le axa 5]

MAWU ƑE NYA LA XEXLẼ ƑE TAÐODZINUWO KPLE MƆNUWO

▪ Ne èle Biblia xlẽ ge la, do gbe ɖa, eye nàna wò susu nanɔ nuxexlẽa ŋu.

▪ De asixɔxɔ nu si srɔ̃m nèle la ŋu.

▪ Ðo taɖodzinu siwo gbɔ nàte ŋu aɖo la na ɖokuiwò.

▪ Di mɔ bubu siwo dzi nàto ade ŋugble kple amewo tso Ŋɔŋlɔawo ŋu.

▪ Kpɔ Biblia me nudzɔdzɔwo le susu me.

▪ Zã ɣeyiɣi geɖe ɖe mawunyakpukpui siwo gɔme sese sesẽ kple wo ŋu numeɖeɖewo ŋu, ale be nàte ŋu ase wo gɔme nyuie.

▪ Ƒo asa na nuxexlẽ dzitsitsitɔe.

▪ Na Mawu ƒe nya nadzro wò vevie.

▪ De ŋugble le Ŋɔŋlɔawo me nyawo ŋu.

[Nɔnɔmetata si le axa 4]

Ne èle Biblia me nudzɔdzɔ aɖe xlẽm la, tsɔ ɖokuiwò ɖo ame si ŋu wòku ɖo la teƒe